1M doses ng Sinovac COVID-19 vaccine, dumating na sa ‘Pinas

ni Ronalyn Seminiano Reonico | June 6, 2021

Dumating na sa bansa ang karagdagang 1 million doses ng Sinovac COVID-19 vaccine ngayong Linggo nang umaga.

Lumapag sa Ninoy Aquino International Airport ang Cebu Pacific flight 5J671 na may lulang Sinovac COVID-19 vaccines kaninang alas-7 nang umaga.

Sina Health Secretary Francisco Duque III at Vaccine Czar Carlito Galvez Jr. at Chinese Embassy officials ang sumalubong sa pagdating ng naturang bakuna na dadalhin sa storage facility sa Marikina City.

Ayon naman kay Philippine Ambassador to China Jose Santiago “Chito” Sta. Romana, inaasahang makatatanggap pa ang Pilipinas ng 2 million doses ng Sinovac COVID-19 vaccine bago matapos ang taong ito.

300 K Moderna vaccine, darating sa June 21

ni Mary Gutierrez Almirañez | May 24, 2021

Inaasahang darating sa ika-21 ng Hunyo ang 300,000 doses ng Moderna COVID-19 vaccines, batay sa kumpirmasyon ni Philippine Ambassador to the United States Jose Manuel Romualdez ngayong araw, May 24.

Aniya, "June 21 is the target date of delivery for the first batch of Moderna vaccines. It will be 300,000 doses as a start. We will be getting more by July, August and September."

Matatandaang mahigit 20 million doses ng Moderna ang binili ng ‘Pinas sa America, kasama rito ang 7 million na binili ng private sectors. Ito ay nagtataglay ng 94% efficacy rate at puwede sa 18-anyos pataas.

Sa ngayon ay 8,279,050 doses ng COVID-19 vaccines na ang kabuuang bilang ng mga nai-deliver sa bansa, kabilang ang mga brand na Sinovac, AstraZeneca, Sputnik V at Pfizer.

'Wag na raw choosy sa brand... Mahihirap, unahin nang turukan — P-Du30

ni Mary Gutierrez Almirañez | May 18, 2021

Pinaboran ni Pangulong Rodrigo Duterte ang rekomendasyon na gawing prayoridad sa COVID-19 vaccination rollout ang mga mahihirap na mamamayan, batay sa kanyang public briefing ngayong umaga, May 18.

Aniya, "This is really for the poor, because if they get sick, they do not have the money. Let us be real about it… Wala silang pambili. They are at the mercy of their poverty. It is the sacred duty of the government to look after them.”

Matatandaang pang-5 pa sa prayoridad mabakunahan kontra COVID-19 ang mga low income families, kung saan mauuna muna ang mga health workers, senior citizens, persons with comorbidities at economic frontliners.

Tugon naman ni Vaccine Czar Secretary Carlito Galvez, Jr., “Ito po ang gusto naming i-suggest sa inyo dahil marami sa business sector at saka po sa COVAX na dapat buksan na natin ang A4 at A5. Dapat, ang bakuna, unahin ang mahihirap.”

Dagdag nito, “Kung makita natin ang recommendation ng business sector, karamihan ng Gabinete at sa Senate, eh, ibukas na po natin as soon as possible time. Puwede na tayo mag-start sa mahihirap para ang mga bakuna sa COVAX ay mabigyan ang mahihirap.”

Tiniyak din ni Galvez na magiging mas mabilis na ang vaccination rollout sa bansa, kung saan 500,000 katao ang tina-target mabakunahan kada araw, upang tuluyang maabot ang herd immunity sa pagsapit ng Nobyembre.

Iginiit pa nitong sasapat na ang suplay ng COVID-19 vaccines sa pagdating ng milyun-milyong doses ng bakuna sa kalagitnaan ng Mayo.

Kabilang dito ang inaasahang 2.2 million doses ng Pfizer, 1.3 million doses ng Sputnik V at karagdagang 500,000 doses ng Sinovac. Darating din sa Hunyo ang 3.3 million doses ng AstraZeneca (kabilang ang 1.3 million na binili ng private sector), ang 250,000 doses ng Moderna (kabilang ang 50,000 na binili ng private sector), at ang 2 million doses ng Sputnik V.

Sa kasalukuyan nama’y tinatayang 7,779,050 doses ng mga bakuna na ang dumating sa ‘Pinas, kung saan 3,001,875 ang mga nabakunahan.

Nilinaw din ni Pangulong Duterte na hindi dapat mamili ng brand ng COVID-19 vaccines ang mga nais magpabakuna upang mapabilis ang rollout.

“‘Wag n'yo na silipin kung Moderna, Pfizer, or AstraZeneca because I won’t allow it. Mahirap ka man o mayaman, kung gusto mo, pumunta ka sa vaccination sites. If you are there in the community, go there and have yourself vaccinated with any of the vaccines available. They are all potent, they are all effective. So there is no reason to be choosy about it,” aniya.