Pagbabakuna ng COVID-19 sa Metro Manila bukas, kasado na

ni Lolet Abania | February 28, 2021

Ikinasa na ang pagsisimula ng pagbabakuna ng COVID-19 vaccines sa bansa na nakatakda bukas, Marso 1, sa mga COVID-19 referral hospitals sa Metro Manila matapos na dumating ngayong Linggo ang donasyon na 600,000 doses ng CoronaVac vaccine ng Chinese company na Sinovac.

Ayon sa Philippine Information Agency (PIA), isasagawa ang ceremonial vaccination bukas sa Philippine General Hospital (PGH), Lung Center of the Philippines, Dr. Jose N. Rodriguez Memorial Hospital, Veterans Memorial Medical Center, Philippine National Police General Hospital at V. Luna General Hospital na dadaluhan ng mga opisyal ng gobyerno.

Magiging simultaneous ang programa na magsisimula nang alas-9:00 ng umaga. Inaasahan ang pagdalo sa UP-Philippine General Hospital nina Vaccine Czar Carlito Galvez, Presidential Spokesperson Harry Roque at Food and Drug Administration (FDA) Director General Eric Domingo.

Kabilang din sa mga dadalo sa programa sina MMDA Chairman Benhur Abalos, Manila Mayor Isko Moreno at Dr. Maria Paz Corrales, assistant regional director ng DOH-NCR.

Sa advisory ng PIA, sina PGH Director Dr. Gerardo Legaspi at PGH Spokesperson Dr. Jonas del Rosario ang magbibigay ng welcome address sa nasabing programa.

Sa Lung Center of the Philippines inaasahan namang pumunta sina Department of Health (DOH) Secretary Francisco Duque III, MMDA General Manager Jojo Garcia, Quezon City Mayor Joy Belmonte at Dr. Corazon Flores, regional director ng DOH-NCR.

Inaasahang dumalo sa Dr. Jose N. Rodriguez Memorial Medical Center and Sanitarium (Tala) sina Testing Czar Vince Dizon, Caloocan City Mayor Oscar Malapitan, MMDA Chief of Staff Michael Salalima at DOH Asec. Elmer Punzalan.

Maliban sa mga referral hospitals, nakatakda ring magkaroon ng programa sa Veterans Memorial Medical Center, kung saan inaasahang pupunta sina Department of National Defense (DND) Secretary Delfin Lorenzana at DOH Director Napoleon Arevalo.

Kabilang din ang Philippine National Police General Hospital na inaasahang dadaluhan nina Department of Interior and Local Government (DILG) Usec. Bernardo Florece, PNP Chief Debold Sinas at DOH Director Aleli Annie Grace Sudiacal.

Samantala, alas-10:00 ng umaga naman ang programa sa V. Luna Medical Center. Inaasahang pupunta sina AFP Chief of Staff Cirilito Sobejana, Surgeon Gen. Nelson Pecache, Quezon City Mayor Joy Belmonte at Dr. Corazon Flores, regional director ng DOH-NCR.

Dumating nang alas-4:10 ngayong hapon ang COVID-19 vaccine na Sinovac ng China sa Villamor Airbase na sinalubong ni Pangulong Rodrigo Duterte. Kasunod nito, dadalhin sa DOH cold storage facility sa Marikina City ang mga naturang bakuna.

Sinovac, 'di bubuksan at ie-X-ray ng BOC

ni Mary Gutierrez Almirañez | February 28, 2021

Dumating na sa Villamor Air Base ang mga tauhan ng Philippine National Police ( PNP) upang salubungin at mabigyang seguridad ang pagdating ng bakunang Sinovac sa ‘Pinas ngayong araw, Pebrero 28.

Kapag lumapag sa bansa ang Sinovac ay hindi ito puwedeng buksan at hindi rin ito idadaan sa X-ray machine ng Bureau of Customs dahil anila, nakapagsagawa na sila ng advance processing hinggil dito. Ang gagawin na lamang nila ay bilangin ang mga darating na kahon hanggang makarating sa Research Institute for Tropical Medicine (RITM).

“Nai-submit na sa amin 'yung necessary documents at bago pa po lumapag ito, ipoproseso na namin ‘yung clearances sa Customs,” giit ni BOC Spokesperson Atty. Vincent Maronilla.

“Pagdating ho doon, ang mangyayari rito, papalabasin na lang namin at babantayan namin hanggang makarating siya sa RITM,” dagdag pa niya.

“Pagdating po ng Research Institute for Tropical Medicine, nandoon po ‘yung Customs officers namin para lang po tingnan ‘yung paglipat niya sa cold storage facility.”

Inaasahang 600,000 doses ng Sinovac COVID-19 vaccine ang darating sa bansa ngayong araw.

Sa ngayon ay naghahanda na rin ang ilang ospital na makakatanggap ng unang batch nito.

Pagdating ng Sinovac ng China, sasalubungin mismo ni P-Duterte

ni Lolet Abania | February 27, 2021

Personal na sasalubungin ni Pangulong Rodrigo Duterte ang 600,000 doses ng Sinovac COVID-19 vaccine ng China na nakatakdang dumating sa Linggo, February 28. Ayon kay Sen. Christopher “Bong” Go, sasamahan niya ang Pangulo sa pagtanggap ng nasabing bakuna.

“Darating na sa February 28. I think 5:00 p.m. po ay tatanggapin ni Pangulong Duterte,” ani Go. Sinabi ni Go na ang 600,000 doses ng Sinovac vaccine ay donasyon ng Chinese government sa Pilipinas.

Sa kabuuang bilang nito, 100,000 doses ang nakalaan para sa mga militar. Una nang binanggit ni Presidential Spokesperson Harry Roque na nais ng Pangulo na siya mismo ang tumanggap ng mga vaccine bilang pasasalamat sa China sa naturang donasyon.

“Gusto po nating tumanaw ng utang na loob, kaya nais sumalubong ni Presidente. Magkakaroon po ng ceremony kapag dumating na ang donated vaccines ng People’s Republic of China,” ani Roque sa Palace briefing.

Ayon pa kay Go, na siyang chair ng Senate Committee on Health, isang "simple turnover" ceremony ang magaganap sa Linggo. “Matagal na natin itong inaantay. Ako, as a legislator, talagang kinukulit ko po.

Naaawa na ako kina Vaccine Czar Secretary (Carlito) Galvez, Jr. at (Department of Health) Secretary (Francisco) Duque. Halos araw-araw ko silang nire-remind,” sabi ni Go.