55 health workers sa Marikina, umatras sa Sinovac

ni Mary Gutierrez Almirañez | March 1, 2021

Mahigit 1,500 healthcare workers ng Amang Rodriguez Memorial Medical Center sa Marikina City ang nakatakdang mabakunahan ng Sinovac COVID-19 vaccines bukas, Marso 2, ayon kay Mayor Marcelino Teodoro.

Pero batay sa ulat, umatras magpabakuna ang 55 healthcare workers sa lungsod sapagkat anila ay gusto nila ang mas mataas na efficacy rate ng bakuna, na kaagad namang naunawaan ng alkalde.

“Sinabi ko nga ru’n sa ospital namin dito, ‘yung Amang Rodriguez Medical Center, eh, ‘yung 55 na tumanggi para maturukan ngayon ay isama ru’n sa susunod na ano na listahan, hangga’t maaaring makatanggap ng ibang brand ng bakuna na maaaring maging available sa mga darating na araw,” pahayag ni Mayor Teodoro.

Giit pa niya, hindi dapat mabahala ang mga umatras na healthcare workers dahil hindi sila mapaparusahan.

“Dito sa Marikina, nakikipag-ugnayan kaming mabuti ru’n sa aming medical director. Pero nababalitaan ko nga sa ibang ospital, parang mayroong pananakot at mayroong parang panggigipit na ginagawa na sinasabing hindi sila maisasama ru’n sa priority list na gagawin. Pero ito’y mali. Hindi tama. Mabuti na malinaw natin itong masabi sa mga kababayan natin.”

Dagdag niya, dapat lamang maibigay sa mga healthcare workers ang bakunang may pinakamataas na efficacy rate dahil sila ang pananggalang ng mga mamamayan laban sa COVID-19.

180 health workers sa Tala, babakunahan ng Sinovac

ni Mary Gutierrez Almirañez | March 1, 2021

Unang dinala ang 600 doses ng Sinovac COVID-19 vaccines sa Tala Hospital sa Caloocan City kaninang 12:40 nang madaling-araw, Marso 1. Eksaktong 1:08 AM nang tanggapin ng ospital ang bakuna at bawat vial nito ay katumbas ng .5 millimeter na kaagad idiniretso sa cold storage facility na nasa bandang Pharmacy section ng ospital kung saan nandu'n ang freezer na may 2 hanggang 8 degree celsius na temperatura.

Noong nakaraang linggo pa nasimulan ang pre-registration at ngayong 10:30 AM nakatakdang simulan ang pagbabakuna.

Magsisimula ang proseso sa Waiting Area na makikita sa labas ng ospital. Dito sila uupo habang hinihintay tawagin ang pangalan papunta sa Registration Area. Pagkarating sa Registration Area, dito ibe-verify ang kanilang pangalan.

Pagka-verify ay didiretso sa Vital Signs Area upang ma-check kung nakakaranas ng high blood, allergy o mga sintomas ng COVID-19.

Hindi babakunahan ang taong mayroon ng mga ito. Kapag nakapasa sa Vital Signs Area, didiretso sa Screening Area kung nasaan ang doktor para i-double check ang mga naunang proseso at katanungan bago bakunahan.

Kapag nakapasa sa ika-apat na steps ay didiretso na sila sa actual procedure ng pagbabakuna. Matatagpuan sa second floor ang Holding Area kung saan hihintayin matawag ang pangalan para mabakunahan.

Sisiguraduhing naipapatupad ang social distancing at iba pang health protocols upang makatiyak na hindi magdidikit-dikit ang binakunahan at mga naghihintay mabakunahan. Pagdating sa Vaccination Area ay dito na isasagawa ang pagbabakuna.

Matapos mabakunahan, didiretso sa Monitoring Area kung saan kailangang manatili nang 15 minuto para obserbahan at masiguro na walang magiging adverse reaction sa bakuna.

Sakaling magkaroon ng reaction sa Sinovac ay kaagad ididiretso sa Treatment Area ang indibidwal na nakaranas ng side effect.

Ngunit kapag sobrang tindi ng naging reaction ay kaagad itong isusugod sa Emergency Room upang doon gamutin at bigyang lunas.

Kung wala namang nararanasang side effect ay puwede nang umuwi.

Ayon sa survey, 180 healthcare workers ng Tala Hospital lamang ang pumapayag na mabakunahan ng Sinovac sa mahigit 1,165 na sumagot. Ganunpaman ay hindi ito ikinakabahala ng mga executives ng ospital.

Anila, "Wala itong puwersahan. Kung ayaw nila ng Sinovac na ito, ang kanilang option is to wait for the arrival, kung ano mang vaccine 'yun."

Sinovac vaccine, nasa storage na sa Marikina

ni Lolet Abania | February 28, 2021

Dumating na ang 600,000 COVID-19 vaccine doses ng Sinovac ngayong gabi sa MetroPac Movers Inc. facility sa Barangay Concepcion Uno sa Marikina City, na siyang storage ng mga vaccine bago ito dalhin sa mga ospital bukas.

Umaga pa lamang ngayong Linggo, ininspeksiyon na ni Marikina Mayor Marcy Teodoro ang cold chain facility bago pa dumating ang mga nasabing bakuna.

Ang donasyon ng China na Sinovac COVID-19 vaccine doses ay dumating sa bansa sa Villamor Airbase sakay ng isang Chinese Y-20 Transport aircraft pasado alas-4:00 ng hapon.

Ayon kay Vaccine Czar Secretary Carlito Galvez Jr., sa pagdating ng mga vaccine ng Sinovac, masisimulan na rin ang nakatakdang inoculation program ng gobyerno.

Gayundin, makakapag-administer na ng unang shots sa maraming COVID-19 referral hospitals sa buong National Capital Region bukas.

Ilang ospital din ang naghahanda na tanggapin ang first batch ng Sinovac COVID-19 vaccines para sa mga prayoridad na sektor sa bansa.

Kabilang sa mga priority groups ang mga frontline health workers, indigent senior citizens, ang mga natitirang indigent population, at uniformed personnel.