ni Janiz Navida @Showbiz Special | February 8, 2026
Photo: FB Ice Seguerra
Nakakabilib ang mag-asawang Ice Seguerra at Liza Dino-Seguerra pagdating sa kanilang dedikasyon at pagmamahal para sa kanilang craft – ang music at teatro.
Sa ginanap na grand media launch ng Fire and Ice Entertainment, ang production company na itinayo nina Ice at Liza 10 yrs. ago, na ngayon ay may iba’t ibang sangay na — ang Fire and Ice LIVE!, Fire and Ice Music, Fire and Ice Studios, Fire and Ice Media, at Fire and Ice Consultancy – inamin ng mag-asawa na dahil sa kanilang itinayong negosyo, umabot sa puntong sampung libong piso na lang ang laman ng kanilang savings sa bangko.
Sa kabila nu’n, hindi sumuko sina Direk Ice at Chair Liza, ipinagpatuloy pa rin ang pagpo-produce ng mga concerts hanggang dumating sa point na ngayon nga ay magma-manage na rin sila ng mga talents.
Kasama sa mga talents na ipinrisinta sa press people sa Noctos Bar last February 5 ang kaibigan at co-acoustic singer-performer ni Ice na si Princess Velasco, ang newbie singer from Cebu na si Louise at ang mga drag queens na Divine Divas na binubuo nina Precious Paula Nicole, Viñas DeLuxe at Brigiding.
Inamin ni Princess sa mediacon na pansamantalang na-set aside ang singing career niya nang magkaroon siya ng pamilya, pero ngayong nagbabalik siya sa pagkanta, nagtiwala siya sa Fire & Ice para mag-manage sa kanyang singing career dahil alam niyang right projects ang maibibigay sa kanya.
Bukod nga sa pagigigng bahagi ng Love, Sessionistas concert, may ire-release ring EP si Princess under Fire & Ice Music titled Still Here.
Na-impressed naman ang press people sa ganda ng boses ni Louise na kumanta ng Himala sa media launch. No wonder na maging si Direk Ice, bilib na bilib nang marinig siyang kumanta sa isang singing contest online na judge ang singer kaya kinuha siyang talent at isinasama na nga sa mga shows nito.
Napaka-talented din ng Divine Divas at pang-international ang performance kaya pambato talaga sila ng Fire & Ice Music.
Sa loob nga ng 10 taon, ang lawak na ng narating ng Fire & Ice Entertainment dahil hindi lang mga concerts here and abroad ang ipino-produce nila kundi pati mga pelikulang nakakatulong sa mga kapwa nila artista at mga production people.
Ilan lang sa mga pelikulang naka-lineup ng Fire & Ice Media ang Aid directed by Brillante Mendoza, Karaoke News directed by John Paul Su, Becoming Ice documentary by Tey Clamor, Funeral Flowers na project mismo nina Ice at Liza at Island Girl na original project din ni Direk Ice.
Tinanong namin si Direk Ice sa exclusive interview namin sa kanya na despite their busy schedule nila ni Chair Liza ay may time pa rin ba sila sa isa’t isa?
Aniya, good thing naman na nasa iisang mundo lang sila dahil nagkakatulungan talaga sila sa trabaho at kahit ito rin ang nagiging dahilan ng away nila, hindi naman umaabot sa puntong nasira ang kanilang relasyon.
Sa matagal nang plano ni Ice na magpa-transplant para tuluyan nang maging lalaki, aniya ay nandu’n pa rin ang kagustuhan niyang gawin ‘yun, pero sa ngayon, hindi pa ‘yun ang priority. As long as trans naman na siya sa mata ng publiko, okay na raw ‘yun. Ang mahalaga, hindi nababago ang kanyang boses na siyang puhunan niya sa kanyang trabaho bilang singer-performer.
Napaka-in demand pa rin ni Ice at in fact, sa Feb. 27, nasa New Frontier Theater siya para sa Being Ice: Live!. At sa April 18 naman, nasa Waterfront Cebu Hotel and Casino sila nina Juris, Sitti, Princess Velasco, Nyoy Volante, Duncan Ramos at Kean Cipriano para sa Love, Sessionistas.
PARANG hindi galing sa sakit ang kaibigan naming singer na si Tita Token Lizares nang mag-perform last Friday night sa Music Museum para sa Love Ablaze pre-Valentine benefit concert na ang beneficiary ay ang mga kaibigan niyang madre sa The Daughters of St. Paul.
Seventeen days na naospital si Tita Token dahil sa pagtaas-baba ng kanyang BP na hindi pa ma-trace ng mga doktor kung saan nanggagaling. Kaya nga nang umakyat siya sa stage, ang pabirong sabi ni Tita Token, from Charity Diva na kanyang title, ngayon ay Catapress Diva na siya. Hahaha!
Pero nang bumirit na siya ng Where Do I Begin, Remember Us This Way at You are The Reason, walang bakas na naospital siya.
Well, isa lang ang itinuturong dahilan ni Tita Token, si Lord talaga ‘yan, and we believe her, dahil sa dami ng mga natulungan niya at kaibigan niyang madre na nagdarasal para sa kanyang paggaling at para kayanin niyang mag-concert, ayun, nagawa niyang mag-perform with flying colors pa, ‘ika nga.
Ang gagaling din ng mga guest performers niyang sina Mitch Valdez at Jun Polistico na halos hindi na makaalis ng stage dahil sa “More! More! More!” na sigaw ng audience. Kahit pareho nang may-edad ang dalawa, wala pa rin silang kupas sa pagkanta at mapapasabay ka talaga.
Grabe rin ang comedy ni Mitch na pang-intellectual pero matatawa ka nang bongga.
Other performers sa Love Ablaze were Lindsay Custodio, Patricia Javier and Thor Valiente. Si John Ryan Englis naman ang nag-host at kasama rin ang Moments Band.
