Kinumpirma ng abogado ng aktres… BEA AT VINCENT, PUMIRMA SA PRENUP AGREEMENT BAGO IKINASAL

ni Reggee Bonoan @Sheet Matters | July 16, 2026

Photo: IG @bealonzo

Nagkaroon pala muna ng pirmahan ng prenuptial agreement sina Vincent Co at Bea Alonzo bago sila ikinasal nitong Lunes, Hulyo 13, sa Makati City Hall na in-officiate ni Mayor Nancy Binay.

Eksklusibong nakausap ng GMA News ang abogado ni Bea na si Atty. Joey V. Garcia ng The Law Firm of Garcia Elauria Ruanto and Associates (GERA LAW) Office nu’ng Martes nang gabi at iniere ang pahayag nito sa nasabing news program.

Pahayag nito, “Yes, I confirm that the civil wedding of Bea Alonzo and Mr. Vincent Co took place yesterday evening at around 7:00 PM at the Makati City Hall, and the ceremony was solemnized by Mayor Nancy Binay.”

Nabanggit din ng legal counsel ng aktres, “With regard to the alleged issues on the prenup agreement, I must state clearly and unequivocally, for the record and in fairness to all concerned, that the prenuptial agreement was duly signed, executed, and entered into freely and voluntarily by the contracting parties, Bea Alonzo and Mr. Vincent Co, without issue.”

Sa madaling salita, maayos ang naging pirmahan ng mag-asawa at walang naging sagabal sa magkabilang kampo.

Dagdag pa, “The earlier reports suggesting that there was any dispute, hesitation, or unresolved issue concerning a prenuptial agreement are not accurate.”

---

HINDI naman pala nalalayo ang gagampanang karakter ni James Reid bilang si Jordan Valentin sa upcoming TV series na Someone, Someday (SS) dahil musician, bar owner, at composer ito.

Sa totoong buhay ay ito rin ang trabaho ng singer-actor at may restobar siya sa Makati City kaya hindi mahirap ang naging adjustment sa role niya.

Pero inamin ng aktor na super-nerbiyos siya sa unang taping day niya dahil isang dekada rin siyang nawala sa paggawa ng serye.

“It has been a great experience working with Kathryn (Bernardo) and Maja (Salvador) even

though we do not have too many scenes together. I love Ate Maja. Of course, working with Directors Chad (Vidanes) and Dolly (Dulu) was highly collaborative and welcoming. To my Dreamscape family, thank you so much,” sey ni James.

Nabanggit pa ng aktor na it feels like he never really left dahil sa mainit na pagtanggap sa kanya ng Dreamscape Entertainment.

Anyway, tinanong namin si James kung ano ang naging dahilan at napaoo siya sa SS para balikan ang pag-arte at paano niya ito pinaghandaan.

“Actually, I always knew that I would go back to acting. Since 2019 or 2020, when I decided to take a pause, I always said I planned to come back to acting. It was never really goodbye for me,” sagot ng binata.

Nagbigay siya ng panahon sa sarili upang kapag bumalik siya ay kaya na niyang gawin muli ang lahat. Dahil sa mga nangyari noon, sa tingin niya ay perfect time na ngayon ang pagbabalik niya sa paggawa ng serye.

“Maybe it’s an emotional thing. I’m in a good place right now. I can handle the workload. I can handle everything that comes with it again,” sabi pa.

Ang Someone, Someday ay kinatatampukan din nina Dimples Romana, Rowell Santiago, Rita Avila, McCoy De Leon, Daniela Stranner, at Migz Casimiro. Mula ito sa direksiyon nina Chad V. Vidanes at Dolly Dulu.

Mapapanood ito simula Hulyo 27, 8:45 PM, sa ALLTV2, TV5, A2Z, Kapamilya Channel, at Kapamilya Online Live sa YouTube (YT) at Facebook (FB). 

Una itong mapapanood sa Netflix sa Hulyo 24 at sa iWant sa Hulyo 25. Magiging available rin ito sa TFC.

Payo sa lahat ng babae after maikasal ang kliyenteng si Bea… ATTY. KAPUNAN: DON’T GET MARRIED!

ni Reggee Bonoan @Sheet Matters | July 16, 2026

Photo: House of Representatives & _bealonzo

Nakausap din ng GMA News ang isa pang legal counsel ni Bea Alonzo na si Atty. Lorna Kapunan sa isang presscon at naisingit ang tanong tungkol sa prenuptial agreement.

“People are asking, did I make the prenuptial agreement? Actually, I wish I did,” sambit ni Atty. Kapunan.

Wala umanong alam si Atty. Kapunan tungkol sa prenup kaya binalikan niya ng tanong ang female reporter.

Sey niya, “Where did you get that (prenup issue)?”

May binanggit na vlog ang reporter kung saan niya ito napanood.

At dito inamin ng isa sa legal counsel ng aktres, “I really have no personal knowledge. Well, putting on my lawyer’s hat, I’ll advise all of you girls here, don’t get married.”

Bago nagpaliwanag si Atty. Lorna tungkol sa prenup ay binati muna niya si Bea.

Mensahe niya sa aktres, “I wish you well, Bea.”

For the record, kay Kapunan ipinagkatiwala ni Bea ang paghawak sa mga personal nitong kontrata at ilang high-profile civil matters, kaya tinanong siya tungkol sa prenup, pero nagulat ang lahat na wala siyang alam tungkol dito.

Itinago sa mga magulang para wala nang hadlang… BEA AT VINCENT, IKINASAL NA SA MAKATI NU’NG JULY 13!

ni Reggee Bonoan @Sheet Matters | July 15, 2026

Photo: FB Nancy Binay

Trending ang ipinost ng netizen na si AltIndayBadiday sa kanyang X (dating Twitter) account na ikinasal na sina Vincent Co at Bea Alonzo sa Makati City noong July 13.

Ayon sa tweet na may 1.1M views na, “Here it is, the CHIKANG you've all been waiting for!!! FINALLY GOT MARRIED in Makati!!! I have a receipt in hand; picture and certificate of marriage. All’s well that ends well! I’m so happy for you! (crying & clapping emoji). Congrats and best wishes!!!”

Kasunod nito ay naglabasan na ang pangalang Vincent Co at Bea Alonzo na nagpa-civil wedding sa Makati, around 7 PM nu’ng July 13. Ginanap umano ito sa isang kuwarto na ang tanging naroroon ay ang nagkasal, assistant, mga may-ari ng Secosana bags, si Bea at si Vincent na may kasama rin.

Walang kasamang magulang ang dalawa, na ibig sabihin ay hindi ipinaalam ng ikinasal sa kanilang mga magulang o kaninuman para wala nang hadlang.

Ayon sa taong nakausap namin tungkol dito, “Kung ibabase ko sa paniniwala ko, posible kasi mahal nila ang isa’t isa. Masyadong magulo kasi dati, ang daming naglabasang isyu, parang ‘di mo na alam kung saan nanggagaling.

“Saka remember, ano ang sabi ko sa ‘yo dati, base sa kampo nina Vincent, ‘di ba, sabi ‘postponed’ lang? Tapos, biglang may nagsabi ‘cancelled’ na? Sino ang nag-cancel? Malaki ang pagkakaiba ng postponed at cancelled, saan galing?”

Sabi namin, ‘di ba dapat alam ng mga magulang ng dalawa na nagpakasal ang kanilang mga anak?

“Eh, baka after na lang sasabihin,” sagot sa amin.

Sa tsikang hindi okay si Vincent sa parents niya kaya umalis na siya sa kanilang poder, plus hindi siya bibigyan ng mana ay malaking fake news.

“Kung ‘di okay si Vincent sa parents, eh, bakit s’ya pa rin ang namamahala ng Puregold? Wala namang pagbabago at saka dati nang may sariling pad si Vincent. Ilang beses nang nasulat ‘yan,” katwiran naman ng isa pa naming kausap.

Totoo naman dahil sa katatapos na Puregold OPM Con Generations 2026 noong Sabado sa Smart Araneta Coliseum ay nakita namin ang presidente ng Puregold Price Club. 

Simula 2015 hanggang ngayon ay maganda ang takbo ng kumpanya ng mga Co.

Nabanggit din ang manager ni Bea na si Shirley Kuan. 

Sey pa, “Ano kaya ang reaction n’ya if ever na totoo? Naisahan s’ya kasi ‘di ipinaalam ng alaga n’ya?”

Napaisip kami kung kasama sa mina-manage ni SK (tawag kay Shirley) ang personal life ni Bea.

Anyway, magkakaalaman isa sa mga araw na ito kung sino ang maglalabas ng resibo sa nabanggit na kasalan.

---

BLIND ITEM:

TRULILI kaya na kinausap ng manager niya ang kilalang aktor na mamimili siya ng project para sa alaga at hindi muna tatanggap nang tatanggap para may mystery?

Nagtaka kami dahil hindi ba’t ang manager naman ang tumatanggap ng project para sa mga alaga nila?

“Ito kasing si (aktor), pinagkatiwalaan na ng manager n’ya na s’ya ang tumanggap ng project kasama ang handler n’ya at saka na lang ipapaalam kung ano’ng gagawin. Binigyan kasi ni (manager) ang lahat ng alaga n’ya na sila na ang magdesisyon kung type nila o hindi.

“Saka malaki kasi ang tiwala ni (manager) kay (aktor) pagdating sa projects kasi halos lahat naman ay magaganda at acting piece naman. ‘Di ba, win s’ya noon?” katwiran ng aming kausap tungkol sa aktor.

Nasambit pa ng aming kausap na nagulat ang manager ng aktor na hindi kumita ang pelikulang huling ginawa nito. Akala raw ay hindi ipapalabas sa theater.

“Ang akala, sa Netflix ipapalabas,” sabi sa amin.

Anyway, bihira na kasi talaga ang kumikitang pelikula ngayon kaya nga may mga mall na nagsara na ng kanilang mga sinehan.