Pahiwatig na may lalaking darating sa oras na malungkot at pinanghihinaan ng loob

ni Seigusmundo Del Mundo - @Panaginip, salamin ng inyong buhay | February 18, 2021

Salaminin natin ang panaginip ni Irene na ipinadala sa Facebook Messenger.

Dear Professor,

May kinakain akong puti na parang bubble gum sa panaginip ko, pero masarap siya at parang palitaw. Tapos, nasa magazine ‘yung lalaki na may pagka-matured na, tapos sabi niya sa akin, hanapin ko siya. Ibinigay niya ang full name niya, pero ang naalala ko lang ay ang pangalang “Adonis” na first name niya. Ano ang kahulugan ng panaginip kong ito?

Naghihintay,

Irene

Sa iyo, Irene,

Ang kumain ng bubble gum sa panaginip ay nangangahulugang ang bibig ay lumilinis at ang digestive system ay awtomatikong gumagana, kaya hindi lang bibig ang nalilinis kundi ang iba pang bahagi ng tiyan.

Sa pagkain ng bubble gum, ang isip din ay wala sa loob na gumagana kung saan nagiging positibo ang laman ng utak. Minsan, mahirap paniwalaan ang katotohanan, ngunit bilang isang katuwaan pero isa ring seryosong bagay, subukan mong kumain ng bubble gum kapag ikaw ay nananamlay, malungkot o tinatalo ng mga negatibong kaisipan. Makikita mo na babalik ang iyong kasiglahan.

Kapag napanaginipan ang bubble gum, ang nanaginip ay pinaniniwalaang makadidiskubre ng mga bago at kakaibang pormula sa kung paano mas aasenso o uunlad at magiging maligaya ang buhay.

Ang lalaki naman na nasa magazine ay sikat at dahil sikat lang ang mga nalalagay sa

magazine, ayon sa iyong panaginip, may isang sikat na lalaki na magiging bahagi ng buhay mo.

Sino kaya siya sa buhay mo at paano mo siya mahahanap? Siya ang panggagalingan ng tapang at lakas ng loob mo dahil ang kanyang pangalan na “Adonis” ay nangangahulugan ng matapang at malakas ang looban.

Siya ay iyong matatagpuan sa panahon na ikaw ay mahina, walang lakas at naduduwag sa mga hamon ng kapalaran. At dahil sa ganu’ng sitwasyon, hanapin mo ang magpapalakas ng iyong loob. Kaya ang sabi ng iyong panaginip na siya ay iyong hanapin ay awtomatikong mangyayari sa iyo at siya ay iyo na ring makikita dahil kung sino ang magbibigay sa iyo ng tapang at lakas ng loob, wala nang iba pa kundi ang lalaking napanaginipan mo.

Ito naman ang espesyal na tulong ko sa iyo upang mahanap o makikilala mo. Sa Chaldean Numerology, ang numerical value ng Adonis ay 6, at sa Pythagorean Numerology, ang numerical value ng Adonis ay 3.

Hanggang sa muli,

Professor Seigusmundo del Mundo

Pahiwatig na umuwi sa probinsiya para muling sumigla

ni Seigusmundo Del Mundo - @Panaginip, salamin ng inyong buhay | February 17, 2021

Salaminin natin ang panaginip ni Jemuel na ipinadala sa Facebook Messenger.

Dear Professor,

Ano ang ibig sabihin ng umuwi ako sa amin sa probinsiya? Taga-Camarines Norte ako at ngayon ay nandito ako sa Quezon City. Sa aking panaginip, sinalubong ako ng maraming kamag-anak, kaibigan at ka-baryo namin, tapos sa bahay namin, may masayang handaan at sabay-sabay kaming kumain. Habang nagkakainan, saka ako nagising. Ano ang kahulugan ng panaginip kong ito?

Naghihintay,

Jemuel

Sa iyo, Jemuel,

Ngayong malapit na ang Semana Santa, mapapansing nag-uuwian ang mga tao sa kani-kanilang probinsiya. At pagpasok ng Abril at Mayo, ito rin ang panahon ng mga fiesta at kadalasang isinasagawa ang mga espesyal na araw para sa natatanging okasyon tulad ng kasalan, magarbong selebrasyon ng araw ng kapanganakan. Kumbaga, kapag ang birthday ay natapat sa summer time, hindi maiiwasang maghanda nang bongga, pero sa panahon ngayong may pandemya pa at hindi pa nababakunahan ang mga pangkaraniwang mamamayan, malamang na hindi na gaanong magiging bongga at masaya ang nalalapit na summer vacation sa mga probinsiya.

Samantala, alam mo, may malalim na kahulugan ang pag-uwi sa lupang sinilangan, kumbaga, hindi ito parang magsasaya, para lang mamasyal at magsama-sama ang mga magkakapamilya at magkakaibigan.

Ang pag-uwi sa lupang sinilangan ay nagbibigay ng sigla, lakas at ligaya, pero ang termino o angkop na salita ay ang rebirth o muling pagsilang.

Ito ay nararansan ng mga matagal nang hindi nagbabalik sa kanilang lupang sinilangan. Ito rin ay nangyayari sa mga taong sobrang problemado, sakitin at sa mga nabigo sa buhay, nabigo sa love life o nabigo sa career.

Sa buong mundo at sa lahat ng pamayanan ay may walang kamatayang kuwento na isang nilalang na napalaban kung saan ang kalaban niya ay tinatalo siya sa biglang tingin, pero sa tuwing siya ay babagsak sa lupa ay muli siyang lumalakas. Kumbaga, tuwing tatamaan siya ng malakas na bigwas, siya ay nabubuwal, kaya inaakala ng kanyang kalaban na siya ay talo na, pero tulad ng nasabi na, sa tuwing siya ay sasayad sa lupa, bumabalik ang lakas niya, ganu’n nang ganu’n, kaya sa huli ay sumuko na ang nakalaban niya.

Malalim ang kahulugan ng nabanggit na kuwento at sa panahong ito ay itinuturing na lang na isang mitolohiya, pero kapag ang nagkuwento ay halimbawang OFW, sila ang magpapatunay na kakaibang lakas ang kanilang nadarama tuwing umuuwi sila sa kanilang lupang sinilangan.

Ito rin ang mensahe ng panaginip mo, pero hindi simpleng mensahe dahil ito rin ay nagpapayo sa iyo na umuwi ka sa Camarines Norte kapag ikaw ay may pagkakataon. Sapagkat kapag nagawa mo ‘yan, magkakaroon ka ng bagong lakas at kasiglahan na maghahatid sa iyo ng dagdag pang suwerte at magandang kapalaran sa taong ito ng 2021.

Hanggang sa muli,

Professor Seigusmundo del Mundo

Dapat gawin para hindi bangungutin

ni Seigusmundo Del Mundo - @Panaginip, salamin ng inyong buhay | February 16, 2021

Salaminin natin ang panaginip ni Eunice na ipinadala sa Facebook Messenger.

Dear Professor,

Ang panaginip ko ay tungkol sa tiyahin ko dahil palagi ko siyang napapanaginipan, bakit kaya? Masama ang loob ko sa kanila at maging ‘yung patay ko nang tiyahin ay napapanaginipan ko rin. Masama rin ang loob ko sa tiyahin ko na ‘yun.

Bukod pa ru’n, nanaginip din ako ng daanang pataas. Gayundin, ang ate ko ay nanaginip na kasama niya sa picture ang nanay naming matagal nang patay. Ano ang kahulugan ng mga panaginip kong ito? Maraming salamat!

Naghihintay,

Eunice

Sa iyo, Eunice,

Ganito ang nasusulat, bago ka matulog, patawarin mo ang iyong kapatid na nagkasala sa iyo. Ang nabanggit na banal na utos ay tila hindi natutupad ng kahit na sino. Kaya minsan ay sadyang nakapagtataka dahil utos nang utos si Lord, pero ang mga iniuutos naman niya ay mahirap sundin, kaya walang sumusunod.

Kaya lang, sabi nga, si Lord ang tunay na nakakaalam kung ano ang dapat at ang mga hindi dapat ay alam nating mga tao. Ang tao mismo ay puwedeng-puwede ring makaalam ng kung ano ang mabuti at masama.

Sabi ng mga dalubhasa, mas magandang matulog nang walang anumang sama ng loob sa puso at isipan. Ang mga salitang ‘yan ay madali namang paniwalaan, pero ang mahirap paniwalaan ay ang dagdag na kaalaman mula sa mga dalubhasa kung saan ang sabi nila, puwedeng bangungutin ang matutulog na mabigat ang dibdib o kalooban.

Narinig mo na ba ang kuwento ng mga taong nababangungot? Hindi ba ang sabi nila, parang may mabigat na dumadagan sa katawan kaya hindi sila makagalaw?

Parang tama ang mga dalubhasa sa pagsasabing dapat matulog nang walang sama ng loob.

Kaya, kahit mahirap sundin ang nasusulat, patawarin mo muna ang iyong mga kaanak sa kasalanang nagawa nila sa iyo. Sa ganyang paraan, mawawala na ang mga panaginip mo hinggil sa iyong tiyahin, gayundin, hindi ka na babangungutin at higit sa lahat, makakatulog ka pa nang mahimbing.

Hanggang sa muli,

Professor Seigusmundo del Mundo