Modus, buking ng Chinese BF... 23-anyos na GF, kulong sa P330K love scam

ni Gina Plenago @News | September 27, 2026

Photo: National Capital Region Police Office - NCRPO

Natimbog ang 23-anyos na babae at isang lalaking kasabwat, sa entrapment operation ng National Capital Region Police Office (NCRPO) dahil sa umano'y romance-scheme estafa sa isang Chinese national na hinuthutan para sa pamamanhikan at kasal, sa Pasay City, nitong Sabado ng umaga.

Hinuli ang babaeng suspek nang tanggapin ang P10,000 marked money kung saan inaresto rin ang 29-anyos na lalaking kasama nito, na nagtangkang itakas siya sa mga awtoridad.

Alas-10:20 ng umaga (Setyembre 26) nang mangyari ang entrapment sa Seaside Boulevard, Brgy. 76, Pasay City.

Ayon sa Sub-Station 10 (MOA) ng Pasay City Police Station, dumulog sa pulisya ang 30-anyos na Chinese national na nagtatrabaho sa isang money changer dahil sa umano'y P130,000 na nakuha sa kanya at patuloy pa sa panghihingi, sa modus na kailangang ipakita sa mga magulang ng babaeng suspek ang pera, para payagan ang pamamanhikan at kasal.

Pilit umanong kinumbinse ng babae ang Chinese na babasbasan ng kanyang magulang ang kanilang relasyon sa paghingi ng P130,000, nasundan ng P200,000 at nang sundan pa ng karagdagang P10,000 ay idinulog na ng biktima sa pulisya.

Nahaharap ang mga suspek sa reklamong Estafa sa ilalim ng Article 315 ng Revised Penal Code at Obstruction of Justice sa ilalim ng Presidential Decree 1829.

27-anyos na utak ng scam at money laundering, kulong

ni Justine Berganio @Overseas News | September 24, 2026

Photo: Tinatawag na “Da Xiang” ang suspek at pinaniniwalaang nagre-recruit at nagkokontrol ng mga Malaysian runner na kumokolekta ng pera. - Singapore Police Force

Timbog ang isang 27-anyos na Malaysian na umano’y utak sa government official impersonation scams at money laundering operations sa Singapore matapos arestuhin sa Malaysia at i-turn over sa Singapore Police Force (SPF) nitong Martes.

Ayon sa SPF, tinatawag na “Da Xiang” ang suspek at pinaniniwalaang nagre-recruit at nagkokontrol ng mga Malaysian runner na kumokolekta ng pera at mahahalagang gamit mula sa mga biktima.

Sa imbestigasyon, nakipagkita umano siya sa hindi bababa sa apat na runner sa Malaysia, nagbigay ng mga gawain, nag-coordinate ng ATM withdrawals at nagbayad sa kanilang serbisyo. Ang mga gintong nakukuha ng mga runner sa scam victims ay dinadala umano sa Johor Bahru at direktang ibinibigay sa kanya.

Tinatayang nasa S$500,000 o US$392,000 (P24M) ang na-scam ng suspek.

Haharap siya sa korte at kakasuhan ng criminal conspiracy kaugnay ng pagtulong sa pagpapanatili ng benepisyo mula sa criminal conduct. Kapag napatunayang guilty, maaari siyang makulong ng hanggang 10 taon at pagmultahin ng hanggang S$500,000 (P24M).

Ayon sa SPF, dumarami ang Malaysian runners na pumupunta sa Singapore para tumulong sa scam syndicates sa pagkolekta ng cash at valuables mula sa mga biktima.

Binigyang-diin ni Senior Assistant Commissioner Justin Wong na walang hangganan ang scam syndicates kaya mahalaga ang koordinasyon ng Singapore at Malaysia sa pagtugis sa mga sangkot, saanman sila nagtatago.

48 arestado sa scam hub

ni Gina Pleñago @News | April 21, 2026

Photo: National Bureau of Investigation (NBI)

Nasa 48 indibidwal kabilang ang pitong dayuhan ang inaresto ng National Bureau of Investigation (NBI) na sinasabing sangkot sa “Love Scamming,” “Pig Butchering" at “Cryptocurrency Investment Fraud,” sa entrapment operation sa isang condominium sa Parañaque City, noong Abril 17.

Ayon sa ulat, sinalakay ng NBI-Special Action Unit (NBI-SAU) ang online scam hub, na mala-call center office ang set-up nang mapatunayan sa isinagawang validation ang ilegal na gawain, gamit ang Warrant to Search, Seize, and Examine Computer Data (WSSECD).

Inabutan pa ng mga ahente ng NBI-SAU sa ilang condo units ang maraming computer workstations, laptops, mobile phones, internet routers, at iba pang digital devices, na katulad ng set-up ng lehitimong call center.

Sa pagsusuri ng computer units, natukoy ang mga nakahandang scripts sa digital files—ang step by step na susundin ng scam agent sa pakikipag-usap at panghihimok sa potensyal na mga biktima, para sa modus-operandi.

Sa patuloy na komunikasyon, gumagamit ang scam agent ng mapanlinlang na pagpapakilala, emosyonal na manipulasyon upang makuha ang tiwala ng mga biktima, gamit ng pekeng profiles at pagkukunwaring naghahanap ng romantic relationships.

Lahat ng paraan ginagawa nila hanggang sa mahulog na ang loob ng biktima, sisimulan itong himukin na magpadala ng pera sa pamamagitan ng gawa-gawang senaryo tulad ng financial emergency, investment opportunities at kagyat na personal na pangangailangan.

Uutusan din umano ang biktima na maglipat ng pondo sa pamamagitan ng iba’t ibang cryptocurrency wallets at pinapanatili rin ang pakikipag-ugnayan sa mga biktima upang patuloy na makuha ang lahat ng gusto.

Sa mga nakitang ebidensya, inaresto ang 41 Pilipina at pitong banyaga.

Isinailalim na sa inquest proceedings ang mga suspek sa reklamong paglabag sa Section 4(b)(2) (Computer-Related Fraud) ng Republic Act 10175 (Cybercrime Prevention Act of 2012) at ng RA 12010 (AFASA Law).