Nag-VP ako dahil kay Sen. Imee — Sara.. Walang Romualdez!

ni BRT | May 9, 2023

Binigyang-diin ni Vice President Sara Duterte na walang kinalaman si Speaker Martin Romualdez sa kanyang desisyon na tumakbo bilang bise presidente.

Aniya, hindi tama at isang insulto sa libu-libong mga grupo at indibidwal na walang humpay na nakiusap sa kanya na muling isaalang-alang ang nauna niyang desisyon na huwag sumali sa national politics para sabihin na malaki ang naitulong ni Romualdez sa pagtulak sa kanyang Vice Presidential bid.

Pagbibigay-diin ni Sara, si Senator Imee Marcos ang nag-udyok sa kanya na tumakbo bilang bise presidente at ito ay isang desisyon aniya na naselyuhan lamang pagkatapos pumayag si Pangulong Ferdinand R. Marcos, Jr. sa mga kondisyon na itinakda niya bago tumakbo bilang bise.

“There was no Speaker Romualdez in the picture,” giit ng Pangalawang Pangulo.

Middle name ni P-BBM, out.. 'Romualdez', ayaw banggitin ni VP Sara

ni Mai Ancheta | June 6, 2023

Sinadyang hindi banggitin ni Vice President Sara Duterte ang middle name ni Pangulong Ferdinand Marcos, Jr. na Romualdez sa kanyang talumpati nitong Lunes sa isang aktibidad.

Sa "Pasidungog" event na ginanap sa isang hotel sa Pasay City nitong Lunes, sinadyang hindi binanggit ng Bise Presidente ang middle name ng Pangulo habang isa-isang binati ang mga panauhin.

Kinilala ni VP Sara ang suportang ibinibigay ng Pangulo sa kanyang tanggapan at nagpasalamat ito sa Presidente.

"Before anything else, I would like to acknowledge the all out support of President Ferdinand Marcos Jr. to the Office of the Vice President. Di ko na banggitin ang middle initial niya. Apo alam mo yan na mahal kita," ani VP Sara.

May mga natawa sa mga bisita sa tila simpleng biro ng pangalawang Presidente.

Hindi naman nagbigay ng dagdag-paliwanag si VP Sara kung bakit sinadya nitong huwag banggitin ang middle name ng Pangulo.

Matatandaang nag-post ng matalinghagang post ang pangalawang pangulo matapos alisin si Congresswoman Gloria Macapagal-Arroyo bilang Senior Deputy Speaker at ginawa itong Deputy Speaker.

Binanggit nito ang salitang "tambaloslos" na kadalasang ginagamit bilang insulto sa isang lalaki. May mga nagsasabi naman na si House Speaker Martin Romualdez ang tinutukoy nito.

After ng gulo sa Kongreso.. Marcos kay 'BFF' Sara: Ako pa rin ang no. 1 fan mo

ni Mylene Alfonso | May 28, 2023

Inilarawan ni Pangulong Ferdinand Marcos, Jr., ang kanyang sarili bilang number one fan at best friend forever o BFF ni Vice President Sara Duterte.

Si Duterte, ang kanyang running mate noong 2022 national elections, sa gitna ng kamakailang gulo sa House of Representatives sa pagitan nina House Speaker Martin Romualdez at dating pangulo at kasalukuyang Pampanga 2nd District Rep. Gloria Macapagal Arroyo.

Ipinahayag ng Pangulo ang paghanga niya kay Duterte bago ibigay ang kanyang talumpati para sa grand launching ng Pier 88, ang unang smart port ng Cebu, sa Liloan, Cebu province kahapon.

Binalikan ni Marcos ang kampanya noong 2022 at ibinahagi kung paano sila karaniwang nagtatawanan ni Duterte.

"Parang nabalik ako doon sa kampanya, nandoon kaming dalawa ni Inday Sara nagbubungisngisan ulit," wika ni Marcos.

"And the reason I made her laughed is that I told her, dito sa mga gulong nangyayari, I have just officially designated myself as your self-appointed official BFF (best friend forever)," saad ng Pangulo.

"So kahit… Sorry na lang. Sa ayaw mo at sa gusto mo, I’m still your number one fan," dagdag pa ng Chief Executive.

Nabatid na dumalo rin sa nasabing event si Romualdez na pangulo ng Lakas-Christian Muslim Democrats (Lakas-CMD), kasama si dating Liloan mayor at ngayo'y Tourism Secretary Christina Frasco at ang kanyang mister na si Cebu 5th District Rep. Duke Frasco.

Kilala ang mga Frasco na malapit kay Duterte kung saan nagsilbing spokesperson nito noong nakaraang kampanya.

Matatandaang nagbitiw si Duterte bilang chairperson ng Lakas-CMD, ang dominant political party sa bansa, matapos i-demote ng Kamara si Arroyo, ang chairman emeritus nito, bilang deputy speaker mula sa senior deputy speaker.