Dagdag sa minimum wages sa Mimaropa at SOCCSKSARGEN, aprub ng regional wage boards — DOLE

ni Lolet Abania | May 21, 2022

Asahan na ng mga manggagawa sa Regions IV-B at XII ng dagdag sa kanilang minimum wages matapos kumpirmahin ng National Wages and Productivity Commission (NWPC) ang wage orders ng kani-kanilang regional wage boards, ayon sa Department of Labor and Employment (DOLE) ngayong Sabado.

Sa isang statement, sinabi ng DOLE, sa ginanap na meeting nitong Biyernes, kinumpirma ng NWPC ang wage orders na inisyu ng Regional Tripartite Wages and Productivity Board (RTWPBs) sa Mimaropa at SOCCSKSARGEN.

Para sa mga manggagawa sa pribadong establisimyento, nag-isyu ang RTWPB-IVB ng Wage Order No. RB-MIMAROPA-10, ang pagbibigay ng dagdag sa sahod na P35, na nasa kabuuang bagong minimum wage rate na P329 para sa mga establisimyento na mayroong mas mababa sa 10 workers habang P355 para sa establisimyentong may 10 o higit pang workers.

“Also, the Board issued Wage Order No. RB-MIMAROPA-DW-03 granting a monthly increase of P1,000, bringing the new monthly wage rate for domestic workers in the region to P4,500,” pahayag ng DOLE.

Para sa Region XII, kinumpirma rin ng NWPC ang RTWPB XII’s Wage Order No. RBXII-22, na nagga-grant ng P32 dagdag sa sahod na ibibigay ng dalawang tranches -- P16 base sa effectivity ng Wage Order at isa pang P16 sa Setyembre 1, 2022 – na nasa kabuuang bagong minimum wage rate sa Region XII na P368 para sa non-agriculture sector at P347 para sa agriculture/service/retail establishments.

Gayundin, kinumpirma ng NWPC ang order na inisyu ng RTWPB II para sa sahod ng mga domestic workers. Batay sa naturang wage order, nai-grant ang P1,000 monthly wage increase para sa mga domestic workers sa Region XII, kung saan may kabuuang monthly minimum wage rate na P5,000 mula sa P4,000 sa ilalim ng dating wage order. Ang mga nasabing wage orders ay magiging epektibo 15 araw matapos mailathala sa pahayagan.

Kumpanyang nagpasuweldo ng tigsi-singkong barya, kakastiguhin

ni Lolet Abania | June 29, 2021

Isang manggagawa mula sa pabrika sa Valenzuela City ang humingi ng tulong sa mayor ng siyudad matapos na matanggap ang kanyang suweldo na puro mga baryang sentimos ang ibinigay.

Sa nai-post sa Facebook kahapon, ayon sa lokal na pamahalaan ng Valenzuela City, nakuha ng empleyado, na hindi na idinetalye pa ang pagkakilanlan, ang kanyang dalawang araw na suweldo na nagkakahalaga ng P1,056 na puro 5 at 10 centavo coins.

Agad namang nakipagpulong si Gatchalian sa nasabing worker at representative ng kumpanya na tinukoy ng pamahalaang lungsod bilang Next Green Factory.

Gayunman, ang may-ari ng kumpanya ay kasalukuyang out-of-town kaya itinakda na lamang sa ibang araw ang meeting dito.

“Mayor Rex reiterates that industry workers should be treated accordingly and not be demoralized,” pahayag ng pamahalaang lungsod.

Sa hiwalay na statement, ayon kay Gatchalian, nakatakda silang magharap ng may-ari ng kumpanya ngayong Miyerkules na aniya sa company representative, “Won’t cut it for me. I’ll see to it that we get to the bottom of this ‘cruel and unusual’ labor practice and deal with it accordingly,” post ni Gatchalian sa Facebook.

Samantala, ayon sa isang circular na inisyu ng Bangko Sentral ng Pilipinas noong 2006, ang mga barya na may denominasyon na P1 hanggang P5 ay maaaring tanggapin bilang bayad sa halagang hindi hihigit sa P1,000.

Nakasaad din sa circular na ang mga 1 centavo, 5 centavos, 10 centavos at 25 centavos ay maaaring gamitin bilang bayad sa halagang hindi hihigit sa P100.

Feb. 12 at 25, dagdag 30% sa sahod

ni Lolet Abania | February 11, 2021

Ipinaalala ng Department of Labor and Employment (DOLE) sa lahat ng employers ng pribadong sektor ang pagbibigay ng tamang pasahod sa kanilang mga empleyado na papasok sa idineklarang holidays ng Pebrero.

Sa Labor Advisory No. 2, series of 2021 ng DOLE, nakasaad dito ang pagbabayad nang maayos na suweldo para sa idineklarang Special (Non-Working) Days sa Pebrero 12 bilang pagdiriwang ng Chinese New Year habang sa Pebrero 25 naman ang anibersaryo ng EDSA People Power Revolution.

Una nang nag-isyu si Pangulong Rodrigo Duterte ng Proclamation No. 986 noong July 30, 2020, kung saan nakatakda ang Pebrero 12 at 25, 2021 bilang special non-working holidays.

Ayon kay DOLE Secretary Silvestre Bello III, ang lahat ng empleyado na papasok sa kani-kanilang trabaho sa nasabing holidays ay dapat mabayaran ng dagdag na 30% sa kanilang basic wage sa unang walong oras.

Ang kanilang basic wage ay tataas ng 130% habang may dagdag na COLA o cost of living allowance. Gayunman, kung ang empleyado ay hindi nagtrabaho sa nasabing holidays, ang tinatawag na “no work, no pay” ay ipapatupad sa kanila, subalit sakaling may ibang polisiya ang kumpanya, practice o isang collective bargaining agreement (CBA), nararapat ding bayaran ang special days.

Dagdag pa rito, kung ang manggagawa ay nag-duty na lumagpas sa walong oras, sila ay dapat na bayaran ng dagdag pang 30% hourly rate sa kanilang trabaho.

Sakali naman na ang trabaho ay natapat sa special day kasabay ng rest day, sila ay dapat bayaran ng dagdag na 50% sa kanilang basic wage sa unang walong oras ng duty, at kung lumagpas sa walong oras o overtime work, nararapat na sila ay bigyan pa ng dagdag na 30% hourly rate ng trabaho.

“Thus, the computation will be ‘hourly rate of the basic wage x 150% x 130% x number of hours worked,” ayon sa statement ng DOLE.