Hindi lang taun-taon ang umento.. Sahod ng titser, tataas pa — VP Sara

ni Madel Moratillo @News | August 15, 2023

Tiniyak ni Vice President at Education Secretary Sara Duterte na naghahanap na ng long-term solution ang gobyerno sa panawagang dagdag- sahod sa mga guro.

Ayon kay VP Sara, mula noong 2020 ay nakakatanggap na ng dagdag-sahod ang mga guro sa ilalim ng Salary Standardization Law of 2019, pero mismong si Pangulong Ferdinand Marcos, Jr. aniya ang nag-atas sa kanya na pag-aralan kung paano magagawang hindi lang yearly ang dagdag-sahod kundi maging long-term at kung paano maitataas ang sahod maging ng mga non-teaching personnel ng Department of Education. Hinihintay aniya nila ang resulta ng nasabing pag-aaral.

Ang Alliance of Concerned Teachers, nanawagan ng P50,000 entry level na suweldo para sa mga guro at P33,000 naman para sa Salary Grade 1 employee. Dismayado rin ang ACT sa zero allocation sa 2024 budget para sa salary increases para sa mga empleyado ng gobyerno.

Aprub kay P-BBM.. Taas-sahod sa gobyerno

ni Mylene Alfonso @News | August 15, 2023

Pinag-aaralan na umano ng pamahalaan ang muling pagtataas ng suweldo ng mga kawani ng gobyerno.

Ayon kay Budget Secretary Amenah Pangandaman, naglaan na sila ng P48 milyong budget ng governance commission for GOCCs.

Layunin umano nito na kumuha ng serbisyo ng mga eksperto o espesyalista na magsasagawa ng komprehensibong pag-aaral sa compensation at position classification system para sa sektor ng gobyerno.

Paliwanag pa ng kalihim, binigyan sila ng go signal ni Pangulong Bongbong Marcos para pag-aralan na ang lahat ng kompensasyon sa mga sibilyan na empleyado ng gobyerno na mas higit pa kumpara sa nagtatrabaho sa pribadong sektor.

Ito ay para mahikayat ang publiko na pumasok sa gobyerno at inaasahan na magsisilbi rin itong motivation sa mga kasalukuyang kawani ng pamahalaan na manatili sa bansa at maging masipag at maayos sa kanilang trabaho.

Mayroon din umanong katulad na pag-aaral silang isinagawa sa iba't ibang ranggo ng civil service servants para malaman kung kailangan na mai-adjust ang kanilang suweldo.

Malaki umano ang maitutulong ng anumang pagtaas sa suweldo ng mga kawani ng gobyerno para makatulong sa pang araw araw nilang pamumuhay.

Naunang naipatupad nitong Enero ang huling yugto ng umento sa suweldo ng mga kawani ng gobyerno sa ilalim ng salary standardization law of 2019.

P40, insulto sa manggagawa.. Taas-sahod, dapat P100

ni Madel Moratillo | July 1, 2023

Isang kilo ng regular-milled na bigas lang umano ang kayang bilhin ng 40 pesos na dagdag-sahod na inaprubahan ng Regional Tripartite Wages and Productivity Board sa National Capital Region.

Sa isang pahayag, sinabi ng Federation of Free Workers na ang 40 pesos na dagdag-sahod sa mga minimum wage workers sa NCR ay hindi sapat sa gitna ng mataas na cost of living sa rehiyon.

Bagama't isa anila itong maliit na panalo sa hanay ng mga manggagawa, dismayado pa rin ang maraming manggagawa sa karampot na dagdag-sahod.

Ang inaasahan sana umano nila ay 100 pesos man lang para makaagapay sa pang-araw-araw.

Dismayado ang grupo dahil mga negosyante umano ang mas kinilingan ng wage board at hindi mga manggagawa.

"Ang tingin ho namin dito ay mumo insulto sa hanay ng mga manggagawa kasi ang usapin ay overdue na ito. Alam naman natin ang pinagdaanan ng kalagayan ng ating mga manggagawa, dumaan tayo sa pandemya. Dumaan 'yung napakataas na inflation rate hanggang ngayon," pahayag naman ni Jerome Adonis, secretary-general ng Kilusang Mayo Uno, sa isang panayam.