Du30, humarap na sa ICC

ni Mylene Alfonso @News | September 17, 2026

Photo: Ang dating Pangulong Rodrigo Duterte - International Criminal Court

Sa kauna-unahang pagkakataon, personal na dumalo si dating Pangulong Rodrigo Duterte sa status conference ng International Criminal Court (ICC) kaugnay ng kasong crimes against humanity na kinakaharap niya.

Nakasuot ng itim na amerikana at puting polo na walang kurbata habang nakaupo ang dating pangulo na nakasandal ang kanyang baba sa magkapatong na mga kamay nang buksan ang pagdinig.

Binanggit ni Judge Joanna Korner na ito ang unang pagkakataon na personal na humarap sa korte ang dating pangulo, at ipinaalala na maaari siyang umalis ng silid ng pagdinig anumang oras nang hindi na kinakailangang humingi ng pahintulot sa hukuman.

Patuloy na iginiit ng kanyang abogado na hindi siya akmang humarap sa paglilitis, dahil sa mga alalahanin sa kanyang kalusugan kaugnay ng kanyang edad, partikular na ang umano'y problema sa kanyang memorya.

Sa naturang status conference, tatalakayin ng Trial Chamber ang mga paghahanda para sa paglilitis, kabilang ang listahan ng mga testigo ng prosekusyon, oras na ilalaan sa pag-uusig, mga ebidensiyang ihaharap, pagbubunyag ng ebidensiya sa depensa, at iba pang mahahalagang usaping may kaugnayan sa kaso.

Pag-uusapan din ng korte ang iskedyul ng mga pagdinig mula Nobyembre 30, 2026 hanggang sa Spring Recess ng 2027, pati ang panukalang magkaroon ng magkakahiwalay na bloke ng mga pagdinig na may mga pagitan ng pahinga batay sa rekomendasyon ng mga eksperto.

Matatandaang nahaharap si Duterte sa kasong crimes against humanity kaugnay ng mga umano’y pagpatay sa panahon ng kanyang panunungkulan bilang alkalde ng Davao City at bilang Pangulo ng Pilipinas.

Noong Marso 2025, inaresto si Duterte sa Ninoy Aquino International Airport (NAIA) Terminal 3 at kasalukuyang nakadetine sa ICC Detention Centre sa Scheveningen, The Hague, Netherlands, habang nagpapatuloy ang proseso ng kanyang paglilitis.

FPRRD, pormal nang kinasuhan ng 3 counts of murder — ICC

by Info @News | September 23, 2025

Photo: International Criminal Court (ICC)

Pormal nang naghain ng three counts of murder ang International Criminal Court (ICC) laban kay dating Pangulong Rodrigo Duterte.

Iniugnay ng ICC si Duterte sa hindi bababa sa 78 biktima na pinatay o na-target noong panahon niya bilang alkalde at bilang presidente.

Sa unang count, nakapaloob ang patayan sa Davao City kung saan 19 ang biktima sa pagka-alkalde ni Duterte.

Kabilang naman sa ikalawang count ang pagpatay sa 14 na itinuturing na “high-value targets” sa kanyang termino bilang Pangulo sa pagitan ng taong 2016 at 2017.

Nasa ikatlong count nakapaloob ang murders at attempted murders sa mga barangay clearance operation kung saan 45 ang biktima mula 2016 hanggang 2018.

Sa “Document Containing the Charges”, sinabi ng ICC na si Duterte ay criminally responsible bilang isang indirect co-perpetrator, o sa pamamagitan ng pag-uutos, pag-uudyok, at pagtulong at pagsang-ayon sa isang "common plan" na isinasagawa ng mga awtoridad ng estado at mga miyembro ng tinatawag na Davao Death Squad.

Nakatakda sanang gawin ngayong Martes, Setyembre 23, ang confirmation of hearing charges laban kay Duterte pero ipinagpaliban ito matapos igiit ng kampo nito na wala siya sa tamang kalagayan para sumailalim sa trial.

Apela ng PH gov't., tablado.. Imbestigasyon sa drug war ni Duterte, tuloy — ICC

ni Madel Moratillo @News | July 19, 2023

Tuloy ang imbestigasyon ng International Criminal Court (ICC) sa war on drugs ng Duterte administration.

Ito ay matapos ibasura ng Appeals Chamber ng ICC ang apela ng gobyerno ng Pilipinas na kumukontra sa nagpapatuloy na imbestigasyon sa drug war ng nakaraang administrasyon.

Mayorya ng mahistrado ang pabor na imbestigahan ang war on drugs, dalawa naman ang tutol, kasama ang presiding judge ng ICC Appeals Chamber na si Marc Perrin De Brimchambaut.

Hindi tinanggap ng chamber ang argumento ng Pilipinas na nagkamali ang ICC dahil wala nang hurisdiksyon dito ang International Court mula nang kumalas ang Pilipinas sa Rome Statute.

Nagkamali rin umano ang Pilipinas nang hindi nito inilatag nang maayos at natalakay nang sapat ang isyu sa Pre-Trial Chamber. Kasama rin sa ibinasura ng chamber ang argumento ng Pilipinas na nagkaroon din ito ng mga imbestigasyon at prosekusyon sa Pilipinas laban sa mga sangkot sa war on drugs.