3.5 M AstraZeneca vaccine, sasalubungin ni P-Duterte

ni Lolet Abania | March 2, 2021

Personal na tatanggapin ni Pangulong Rodrigo Duterte ang pagdating ng inaasahang 3.5 milyong doses ng AstraZeneca COVID-19 vaccine.

Ito ang inanunsiyo ni Presidential Spokesperson Harry Roque dalawang araw matapos na simulan ng gobyerno ang vaccination program gamit ang Sinovac vaccine ng China.

“He’s on standby, to being in the airport to receive the delivery of the COVAX vaccine, AstraZeneca, kung kailan po ito mangyayari, ‘no? Kahapon po, nagbigay siya ng order, sabihin lang sa kanya kung kailan darating at sasalubong din po siya,” ani Roque.

“Uuwi siya ng Maynila kung siya’y nasa Davao at sasalubong din siya sa AstraZeneca. Dahil kung dumating, kinakailangang pasalamatan din natin ang WHO (World Health Organization) at ang gobyerno po ng Inglatera dahil talagang itong papasok po at darating na COVAX facility allocation ng AstraZeneca ay dahil po sa intercession ni Ambassador (Daniel) Pruce ng United Kingdom,” dagdag ni Roque.

Gayunman, ayon kay Vaccine Czar Carlito Galvez, Jr., ang pagdating ng AstraZeneca vaccines ng COVAX facility sa bansa ay wala pang siguradong petsa dahil sa kakulangan ng supply nito.

Pagdating ng Sinovac ng China, sasalubungin mismo ni P-Duterte

ni Lolet Abania | February 27, 2021

Personal na sasalubungin ni Pangulong Rodrigo Duterte ang 600,000 doses ng Sinovac COVID-19 vaccine ng China na nakatakdang dumating sa Linggo, February 28. Ayon kay Sen. Christopher “Bong” Go, sasamahan niya ang Pangulo sa pagtanggap ng nasabing bakuna.

“Darating na sa February 28. I think 5:00 p.m. po ay tatanggapin ni Pangulong Duterte,” ani Go. Sinabi ni Go na ang 600,000 doses ng Sinovac vaccine ay donasyon ng Chinese government sa Pilipinas.

Sa kabuuang bilang nito, 100,000 doses ang nakalaan para sa mga militar. Una nang binanggit ni Presidential Spokesperson Harry Roque na nais ng Pangulo na siya mismo ang tumanggap ng mga vaccine bilang pasasalamat sa China sa naturang donasyon.

“Gusto po nating tumanaw ng utang na loob, kaya nais sumalubong ni Presidente. Magkakaroon po ng ceremony kapag dumating na ang donated vaccines ng People’s Republic of China,” ani Roque sa Palace briefing.

Ayon pa kay Go, na siyang chair ng Senate Committee on Health, isang "simple turnover" ceremony ang magaganap sa Linggo. “Matagal na natin itong inaantay. Ako, as a legislator, talagang kinukulit ko po.

Naaawa na ako kina Vaccine Czar Secretary (Carlito) Galvez, Jr. at (Department of Health) Secretary (Francisco) Duque. Halos araw-araw ko silang nire-remind,” sabi ni Go.

P500-M pondo para sa makararanas ng side effects ng COVID vaccine, oks na

ni Lolet Abania | February 27, 2021

Ganap nang batas ang COVID-19 Vaccination Program Act of 2021 matapos na pirmahan ni Pangulong Rodrigo Duterte upang maipatupad ang vaccination rollout laban sa COVID-19, ayon kay Senator Bong Go.

Nakapaloob sa batas ang P500-million indemnity fund na ilalaan para sa mga indibidwal na makararanas ng masamang epekto matapos na mabakunahan ng COVID-19 vaccine.

Ayon kay Presidential Spokesperson Harry Roque, agad nang maisasagawa ang pagbabakuna kontra-coronavirus dahil dito.

"We are confident that the signing of this landmark piece of legislation would expedite the procurement and administration of vaccines for the protection against COVID-19," ani Roque.

"Indeed, we remain committed in our fight against the coronavirus pandemic and we are using necessary means, such as the enactment of this Republic Act, certified urgent by the President, as a way to start our vaccine rollout," dagdag ng kalihim.

Sa ilalim ng batas, ang Department of Health (DOH) at ang National Task Force Against COVID-19 (NTF) ang otorisado na magsagawa ng negosasyon sa pagkuha ng COVID-19 vaccines kabilang na ang mga ancillary supplies at services para sa storage, transport at distribusyon ng bakuna.

Ang indemnity fund ay gagamitin para sa kompensasyon ng mga indibidwal na makararanas ng adverse effects matapos maturukan ng COVID-19 vaccine.