Night shift differential pay para sa mga empleyado ng gobyerno — P-Du30

ni Lolet Abania | May 16, 2022

Nilagdaan na ni Pangulong Rodrigo Duterte ang Republic Act 11701, ang pagkakaloob ng night shift differential pay para sa mga empleyado ng gobyerno kabilang na rito ang mga government-owned or -controlled corporations (GOCCs), ayon sa inilabas na kopya ng Malacañang ngayong Lunes.

Sa ilalim ng Republic Act 11701, ang pagbibigay ng night shift differential ay hindi lalampas sa 20 percent ng tinatawag na hourly basic rate ng isang empleyado para sa bawat oras ng ginagawang trabaho nito sa pagitan ng alas-6:00 ng gabi at alas-6:00 ng umaga.

Nakasaad sa naturang batas na kabilang sa mga babayaran ang mga, “government employees occupying position items from Division Chief and below, or their equivalent, including those in government-owned or -controlled corporations, whether the nature of their employment is permanent, contractual, temporary, or casual.”

“The night shift differential pay provided under this Act shall be in addition to and shall not in any way diminish whatever benefits and allowances are presently enjoyed by government employees,” pahayag nito.

Una nang sinabi ni Senator Ramon “Bong” Revilla, Jr. na ang lehislasyon ay epektibong inamyendahan ang Magna Carta ng Public Health Workers, na nagbibigay sa mga public health workers para sa 10 percent lamang ng kanilang regular wage bilang night shift differential pay.

“Umaasa po kami na sa pamamagitan ng batas na ito ay mabibigyan natin ng karampatang benepisyo ang ating mga lingkod bayan, kasama na ang mga public health care workers,” ani Revilla noong Pebrero.

Hindi naman sakop ng RA 11701 ang mga sumusunod:

* Mga government employees na ang iskedyul ng office hours ay pumatak sa pagitan ng alas-6:00 ng umaga at alas-6:00 ng gabi. Ang mga serbisyo na lumampas sa regular 8-hour work schedules ay babayaran ng overtime pay.

* Mga government employees na ang mga serbisyo ay required, o mga on call, 24 oras sa isang araw, gaya ng uniformed personnel na mga military, police, jail bureau, ang Bureau of Fire Protections, at iba pa na maaaring idetermina ng Civil Service Commission (CSC) at ng Department of Budget and Management (DBM). Inatasan naman ang CSC at DBM na bumuo ng nararapat na patakaran at panuntunan hinggil dito.

BBM, nangunguna sa eleksiyon... Mahahalal na bagong pangulo, uupo sa Hunyo 30 – PRRD

ni Zel Fernandez | May 10, 2022

Tiniyak ni Pangulong Rodrigo Duterte ang opisyal at pormal na pag-upo sa pamahalaan ng idedeklarang bagong pangulo ng Republika ng Pilipinas sa darating na Hunyo 30, 2022.

Giit ni Pangulong Duterte, bahagi ng kahingiang Konstitusyonal na marapat nang makapanumpa ngayong taon ang susunod na halal na pinuno ng bansa, batay sa magiging resulta ng isinagawang presidential elections, sang-ayon sa pagluklok ng taumbayan.

Ani Digong, malugod umano niyang ipapasa ang liderato ng bansa sa sinumang magiging successor nito bilang pangulo, kaakibat ang paninindigang dapat masunod kung ano ang itinatakda ng batas sa bansa.

Samantala, kasalukuyan pa ring nangunguna sa mga ulat ng resulta ng eleksiyon ng pagka-pangulo si dating Senador Ferdinand “BongBong” Marcos, Jr. na umabot na sa mahigit 16 na milyon ang lamang sa pumangalawang si Bise-Presidente Leni Robredo.

Batay ito sa partial and unofficial total election results na ngayon ay nasa 97.20% na nitong alas-11:32 ng umaga, ayon sa Comelec Transparency Media server.

Pamamahagi ng lupa sa mga magsasaka at IP, tuloy kay P-Du30 — Palasyo

ni Lolet Abania | April 21, 2022

Nananatiling tapat si Pangulong Rodrigo Duterte sa pangako, sa kabila na dalawang buwan na lamang ang natitira sa kanyang termino, nang pagkakaroon ng “genuine” land reform o tunay na reporma sa lupa sa bansa.

Ito ang naging tugon ng Malacañang, matapos na himukin ni presidential candidate at labor leader Leody De Guzman ang mga awtoridad na gawing mapatigil ang laganap na land-grabbing sa bansa, lalo na sa apektadong mga komunidad ng indigenous people (IP).

Ayon kay acting Presidential Spokesperson Martin Andanar, ang gobyerno ay nakapagpamahagi na ng mahigit sa 229,000 ektarya ng agricultural land mula Hulyo 2018 hanggang Mayo ng nakaraang taon, kung saan nabenepisyuhan ang mahigit sa 166,000 katao.

May kabuuang 57 ancestral domain titles naman ang naisyu sa 257,000 indigenous people mula 2016 hanggang Hunyo ng nakaraang taon.

“We therefore assure our people, including Ka Leody de Guzman, that our efforts to provide lands to landless farmers will continue until the end of the President’s term,” sabi ni Andanar sa isang statement ngayong Huwebes.

Matatandaan nitong Martes, si De Guzman at kanyang grupo ay nasangkot sa isang shooting incident sa Bukidnon, habang tinatalakay ng mga ito ang tungkol sa mga isyu ng land-grabbing kasama ang mga local tribe.

“Kasama sa laban para sa mas makataong lipunan ang pagsusulong ng panlipunang kaunlaran na kung saan walang napag-iiwanan,” saad ni De Guzman sa hiwalay na statement.