Longpost yakap ang biktima ‘di pinansin... Drayber na nanghataw ng baseball bat sa senior, kinasuhan

ni Zel Fernandez | April 27, 2022

Sinampahan na ng kaso ng Las Piñas PNP, ang suspek na nanghataw ng baseball bat sa isang senior citizen matapos ang alitan sa kalsada, noong Linggo.

Batay sa report, Abril 24 nang mangyari ang insidente sa pagitan ng biktimang si Julian Adlao, Jr. at suspek na si Gerson Gonzales, nang businahan ng senior citizen ang minamanehong sasakyan ng huli sa kahabaan ng Marcos Alvarez Avenue na nauwi sa road rage.

Ayon kay Col. Jaime Santos, chief of police ng Las Piñas Police Station, “Hindi excuse ‘yung nakita natin sa Facebook o sa social media na inakap si Mr. Julian Adlao ni Mr. Gerson Gonzales. Sa katunayan nga nagkaproblema dahil ‘yung ibinigay niyang address sa Vehicular Traffic Investigation Unit ay hindi niya totoong address. Kaya nilalaliman po namin ang aming imbestigasyon at nalaman namin ‘yung tunay na address niya dahil na rin sa tulong ng mga mamamayan.”

Dagdag ni Santos, “at sinabi ko sa mga imbestigador po natin, kailangan ngayon matapos ‘yung statement taking... ‘wag na kayong pumunta sa substation n’yo, dito n’yo na kunan si Mr. Adlao ng statement. Dahil ang utos ng ating district director Police Brigadier General Jimili Macaraeg ay i-file natin ‘yung kaso the soonest possible time.”

Aniya, sa isinampang kaso sa Las Piñas City Prosecutor’s Office, mananagot si Gonzales sa salang physical injury na pinaniniwalaang malakas ang laban dahil mayroong tumayong testigo upang patotohanan ang reklamo ng biktima.

Bukod aniya sa pahayag na nakuha sa testigo, sapat nang ebidensiya ang video ng insidente na suportado naman ng medico legal report na pirmado ng attending physician ng Las Piñas General Hospital.

Giit ng kolonel, kung hindi sisipot sa hearing ang suspek ay maglalabas na ng warrant of arrest, kasunod ang subpoena. Pagtitiyak pa ng opisyal, sakali umanong tumakas si Gonzales ay magkakaroon na ng karapatan ang mga kapulisan na dakpin ang suspek saanman ito mahuli ng mga awtoridad.

Pulis, arestado sa pagbangga sa mga sasakyan at 2 siklista

ni Ronalyn Seminiano Reonico | December 13, 2020

Arestado ang isang pulis matapos mabangga ng minamaneho niyang pickup ang 2 siklista at ilan pang sasakyan sa intersection sa Angono, Rizal ngayong Sabado. Sa kuha ng CCTV, makikitang bumangga ang truck na minamaneho ni Corporal Neil Leke sa SUV sa intersection sa Baytown Road.

Makikita rin ang pagbaba ng driver ng truck upang tignan ang SUV ngunit bumalik ito sa kanyang sasakyan at nagmadaling ibinuwelta kaya nabangga ang isa pang pickup truck at 2 siklista. Nang umabante ulit ito, nabangga muli ang SUV.

Pahayag ng traffic enforcer na si Danilo Delos Reyes, “Pagpunta ko sa kanya, sana lalapitan ko dahil kakatukin ko dahil ayaw kong ipaalis ‘yung sasakyan para sa imbestigasyon. Paglapit ko naman sa kanya, bigla niyang inatras, mabilis. Tumakbo ‘ko sa may gilid sa pader.

“Pagtakbo ko roon sa may gilid ng pader, pagbangga niyang gano’n, gumanoon pa siya roon sa akin sa gilid ng pader, mabuti tumalon na rin ako.” Saad naman ni Police Major Richard Corpuz, Angono Municipal Police chief, “Ang sabi niya sa akin, medyo nalito siya nu’ng unang pagkabangga niya, natakot siya, and then nawalan siya ng kontrol.”

Nagtamo naman ng injury ang dalawang siklista ngunit hindi nagpaospital. Samantala, hindi umano kakasuhan ang suspek matapos makipag-ayos sa 3 complainants ngunit nais ni Corpuz na i-turn over ito sa chief of police ng Carmona, Cavite.

Aniya, “Ite-turn over namin siya sa kanyang chief of police sa Carmona nang sa gano’n ay masampahan o maimbestigahan pa para sa mga administratibong puwedeng ikaso sa kanya.”