Gordon, nakarekober na sa COVID-19

ni Lolet Abania | August 12, 2021

Magaling na si Senador Richard Gordon mula sa sakit na COVID-19.

“Yes. Nag-ingat lang tayo, wala akong naramdaman. I was completely asymptomatic but because my wife, may autoimmune problem s’ya, siyempre, iniingatan ko ang asawa ko, ang mga katulong namin sa bahay, mga kasama sa Red Cross, mga staff ko sa Senado, ayaw kong mahawa sila sa akin,” sabi ni Gordon sa Laging Handa briefing nang tanungin kung talagang nakarekober na ito sa respiratory disease.

Matatandaan noong Hulyo 28, inianunsiyo ng senador na tinamaan siya ng sakit na COVID-19.

Gayundin, isang araw matapos nito ay na-admit siya sa Makati Medical Center sanhi ng COVID-related pneumonia.

Sinabi pa ng senador na fully vaccinated na siya kontra-COVID-19 gamit ang AstraZeneca vaccine.

Si Gordon ang ika-anim na senador na nagka-COVID, kung saan ang iba pang senador na nagpositibo sa virus ay sina Majority Leader Juan Miguel Zubiri, Sonny Angara, Aquilino Pimentel III, Ronald dela Rosa, at Ramon “Bong” Revilla, Jr..

Gordon, isinugod sa ospital dahil sa COVID

ni Lolet Abania | July 29, 2021

Isinugod sa Makati Medical Center si Senador Richard Gordon nitong Miyerkules nang gabi dahil sa COVID-19. “Upon the advice of his physician, Senator Dick Gordon was admitted last night to the Makati Medical Center for observation and further testing related to COVID-19,” batay sa isang statement na inilabas ng kanyang opisina ngayong Huwebes nang hapon.

Sa inisyal na COVID-19 panel test results at CT-scan findings, lumabas na ang 75-anyos na senador ay nakararanas ng COVID-related pneumonia.

“Senator Gordon is being treated accordingly and will remain at MMC until further notice,” dagdag pang statement.

Una nang sinabi ni Gordon nu'ng Miyerkules nang umaga na tinamaan siya ng naturang respiratory disease, kung saan siya ay asymptomatic, subalit may mga kakaiba siyang nararamdaman patungkol sa kanyang kalusugan dahil nahihirapan siyang makatulog.

Binanggit pa ng senador na siya ay fully vaccinated laban sa COVID-19 gamit ang AstraZeneca vaccine.

Naka-2 bakuna na ng AstraZeneca… Sen. Gordon, positibo sa COVID-19

ni Lolet Abania | July 28, 2021

Nagpositibo sa test sa COVID-19 si Senador Richard Gordon. Ito ang inamin ni Gordon sa isang radio interview ngayong Miyerkules nang umaga kung saan tinamaan siya ng respiratory disease at kasalukuyang naka-quarantine.

"Ako mismo, right now. Natamaan ako. So I’m staying home,” ani Gordon habang tinatalakay ang COVID-19 response ng Philippine Red Cross.

Gayunman, si Gordon ay asymptomatic subalit kung pag-uusapan ang kanyang kalusugan, aniya, nakararamdam siya ng pagbabago dahil nahihirapan siyang makatulog. “Wala [symptoms] pero nagpapa-test ako. Mukhang asymptomatic ako, nasa bahay lang ako ngayon,” sabi ni Gordon.

Ayon sa senador, fully vaccinated na siya kontra-COVID-19, kung saan AstraZeneca vaccine ang itinurok sa kanya. Ang kanyang asawa at staff members naman ay nagnegatibo sa test sa COVID-19 subalit sasailalim pa ang mga ito sa isa pang test matapos ang tatlong araw.

“Nakapagbakuna na kami. Magte-test siya [wife] about three days,” sabi ng senador. Gayundin, sinabi ni Gordon na dahil sa mas nakahahawang Delta variant, pinayuhan siya ng kanyang doktor na humingi ng medikal na atensiyon, kung saan dapat na ipa-check nito ang kanyang lungs at dugo. Posible ring sumailalim siya sa CT scan ngayong araw.

Sa hiwalay na statement, ipinaalala naman ni Gordon sa publiko na ang mga indibidwal na nabakunahan na ay maaari pa ring ma-infect ng COVID-19. “I have been fully vaccinated and am grateful for the protection the vaccine affords me today. While infections in vaccinated people are relatively uncommon, they can and do happen. What vaccines offer, as has been documented in countries with high rate of vaccination, is protection against serious illness, hospitalization, and death. Vaccines work and they save lives,” saad ni Gordon.

Si Gordon ang ikaanim na senador na nakumpirmang tinamaan ng COVID-19. Ang iba pang senators na nagpositibo sa Coronavirus ay sina Majority Leader Juan Miguel Zubiri, Senators Sonny Angara, Aquilino Pimentel III, Ronald dela Rosa, at Ramon "Bong" Revilla, Jr..