Pa-bigas sa Maynila, umarangkada

ni Mylene Alfonso @News | September 28, 2023

Magkatuwang na nagpamahagi ng bigas sina Pangulong Ferdinand Marcos, Jr. at Manila Mayor Honey Lacuna para sa 'Pantawid Pamilya Households'.

Ginawa nina Marcos at Lacuna ang pamamahagi ng tig-25 kilong bigas mula sa may 1,000 benepisyaryo sa San Andres Sports Complex sa Maynila.

Ang naturang subsidiya ay bilang ayuda sa pamilyang nakapaloob sa nasabing programa.

Dinaluhan din ang naturang pagtitipon nina 5th District Rep. Irwin Tieng, mga opisyal at miyembro ng Department of Social Welfare and Development's Central at NCR Offices pati na ang mga kawani Manila Department of Social Welfare sa ilalim ni Re Fugoso.

Bawas-taripa sa imported rice, tablado kay P-BBM

ni Mylene Alfonso @News | September 28, 2023

Ibinasura ni Pangulong Ferdinand Marcos, Jr., ang panukala ng ilang gabinete na bawasan ang taripa o buwis sa imported na bigas.

Sa sectoral meeting sa Malacañang, inihayag ni Marcos na hindi ito ang tamang panahon para ibaba ang tariff rates sa mga imported na bigas.

Kadalasan umanong binabawasan ang taripa kapag mataas ang presyo at hindi ngayong inaasahang bababa ang pandaigdigang presyo ng bigas.

Una nang ipinanukala nina Finance Sec. Benjamin Diokno at National Economic and Development Authority Sec. Arsenio Balisacan na babaan ang taripa para umano pababain ang presyo ng bigas sa merkado.

Nauna nang nagpahayag ng pagtutol ang ilang grupo ng magsasaka sa pagbaba ng taripa dahil mga importer lamang umano ang makikinabang nito.

Sakaling ipinatupad, mas lalong bababa umano ang presyo ng palay at mawawalan ng gana ang mga magsasaka na paramihin pa ang produksyon.

Bawas-tax sa imported rice, pinalagan.. Imee, join sa rally ng mga magsasaka

ni Mylene Alfonso @News | September 27, 2023

Sumama kahapon si Senadora Imee Marcos sa mga nagprotesta sa harap ng Department of Finance (DOF) building na nananawagan sa pagbibitiw nina Finance Secretary Benjamin Diokno at NEDA Secretary Arsenio Balisacan sa gitna ng mga planong bawasan o tanggalin ang taripa sa inaangkat na bigas.

Sa isang panayam, sinabi ng kapatid ni Pangulong Ferdinand "Bongbong" Marcos Jr. na nagpakita lamang siya ng suporta na nagmula sa iba't ibang probinsya.

"Lahat ng barkada ko 'andito eh. Lahat ng kaibigan natin na mambubukid, mangingisda - lahat ng nanggaling sa Northern Luzon hanggang sa Central Luzon pati barkada galing Southern Luzon 'andito po. Nakikisuporta lang ako," sabi ni Marcos.

Nagbitbit ng mga poster nang sumugod ang mga ralista sa harap ng gusali ng DOF sa Maynila laban sa pagbabawas ng taripa sa inaangkat na bigas.

Nakasaad sa isa sa mga poster ang: “Mula kanayunan, nagpunta sa kamaynilaan! PBBM, amin pong panawagan Diokno at Baliscan, alisin d'yan! Support local production. Hindi Tariff Reduction”.

"Palibhasa wala ng bigas. 'Ayan, para lang makatulong sa kanila tutal hindi papayag si Bongbong (Marcos) dito. Sigurado ako d'yan dahil lagot tayo sa tatay ko," dagdag pa ni Imee.

Inalala ni Marcos ang posisyon ng kanyang ama — ang yumaong dating Pangulong Ferdinand Marcos, Sr. na sinabi niyang ibinasura ang opinyon ng mga economic managers pagdating sa bigas — isang staple crop sa Pilipinas.

"Sa aking ama, halos sinasabi niya na huwag na raw makinig sa "mumbo jumbo" ng mga ekonomista 'pagkat ang totoo, iba ang bigas," punto ng senadora.

Kumpiyansa si Imee na hindi papayag ang kanyang nakababatang kapatid na si Pangulong Marcos sa anumang ideya na bawasan ang taripa sa bigas.

"Sigurado ako na hindi 'yun papayag… Nagdala lang ng support dito dahil alam ko at panatag ang aking kalooban, kumpiyansa ako na hindi papayag si Presidente," diin ni Imee.

Nagbabala siya sa posibleng pagtulak na bawasan o tanggalin ang mga taripa sa inangkat na bigas sa loob ng isang buwang pahinga ng Kongreso.

"Ang nakakatakot lamang, alam natin na ang katapusan ng Kongreso ay bukas. Kapag natapos ang Kongreso at nagsara 'yung Senado, ang nakakatakot d'yan ay palulusutin 'yung reduction o 'di kaya zero tariff na importasyon sa kasagsagan ng anihan," hinaing ng senadora.

"Sobra naman sila. Nag-aani na ang lahat. Magsisimula na ang halos lahat ng bukid at ang kasagsagan n'yan ay sa katapusan, ngayon itong linggo na ito hanggang buong Oktubre. Bakit naman sila mag-i-import ngayon? Pambihira naman," dagdag pa niya.

Nakatakdang mag-adjourn ng sesyon ang dalawang kapulungan ng Kongreso sa September 30 at magbabalik sa November 5, 2023.