Namayan at Sir William, mag-uunahan sa Turf

ni Green Lantern @Renda at Latigo | February 10, 2023

Nakatakdang magtagisan ng bilis sina Namayan at Sir William sa magaganap na Condition Race na ilalarga sa Metro Turf, Malvar - Tanauan City sa Batangas, ngayong araw.

Paborito ng karera tipsters, inaasahang sina Namayan at Sir William ang magdodomina sa bentahan sa paglarga ng nasabing event na pakakawalan sa unang karera.

Gagabayan ni dating Philippine Sportswriters Association, (PSA) Jockey of the Year awardee Patty Ramos Dilema si Namayan habang si Conrad Henson ang rerenda kay Sir William.

Ang ibang kalahok sa distansiyang 1200m race ay sina Tool Of Choice, Eazacky, Sudden Impact at Goldsmith, suportado ang nasabing event ng Philippine Racing Commission, (PHILRACOM) sa pamumuno ni chairman Reli De Leon.

Nakalaan ang P10,000 karagdagang premyo para sa winning horse owner kaya paniguradong maghahanda ng todo ang trainers at hinete.

Maliban sa nabanggit na karera, tiyak na aabangan din ng mga karerista ang bakbakan ng 14 na kabayo sa ikakasang PHILRACOM Rating Based Handicapping System sa Race 3.

Magbabakbakan sina Maaasahan, Queen Louise, ColdPlay, Malibu Bell, Moves Like Jagger, Don Albertini, Advance Party, Flying Eagle, Copy Cat, Cool Cat, Arrogante, Rockaway at Hunky Dory.

May P25,000 guaranteed prize ang ikakalat sa unang apat na kabayong tatawid sa meta habang P10,000 ang added prize na masisikwat ng horse owner ng mananalo.

Samantala, siyam na races ang pakakawalan ng Metro Manila Turf Club Inc. (MMTCI) ngayong Biyernes.

Mga Pili ni Green Lantern

Race 1 - Namayan (6), Sir William (4)

Race 2 - The Accountant (5), Asiong (6)

Race 3 - Queen Louise (2), Copy Cat/Cool Cat (9/9A), Flying Eagle (8)

Race 4 - The Price Is Rigt (2), Eyeshot (8), Ace Up (9)

Race 5 - Golden Eight (5), Keep Sailing (6), Bonifacio (4)

Race 6 - Speeding Hero (1), Shelltex Magic (4)

Race 7 - King Hanz (4), Big Bertha (14), Lucky Noh Noh (5)

Race 8 - Lake Balinsasayao (1), My Jopay (4)

Race 9 - Med - Bays (6), Atomic Bomb (14), Quick Buck (13)

May tsansa ang mga sasali sa PHILRACOM 3-YO

ni Green Lantern @Renda at Latigo | February 9, 2023

Kahit sino sa mga kasali sa 2023 PHILRACOM 3-Year-Old Maiden Stakes Race sa darating na Linggo ay malaki ang tsansang manalo ayon sa mga komento ng mga karerista sa social media.

Bagama't si Tell Bell ang nagwagi sa trial race nakaraan ay naniniwala ang ibang racing aficionados na mapapalaban ng todo ang nabanggit na kabayo sa aktuwal na laban na gaganapin sa Metro Turf, Malvar sa Tanauan City, Batangas.

Kaya naman atat na rin ang mga karerista na mapanood ang tikas ng mga batang kabayo sa event na suportado ng Philippine Racing Commission, (PHILRACOM) sa pamumuno ni chairman Reli De Leon.

Posibleng maging liyamado si Tell Bell na makikipagkampihan kay Chrome Bell sa distansiyang 1,400 meter race. Rerendahan ni former Philippine Sportswriters Association, (PSA) Jockey-of-the-Year awardee Jonathan Hernandez, makakalaban ni Tell Bell ang ibang kalahok na sina Prime Billing, Glamour Girle, Grand Moments, Cash On Hand, Melania, Runway Ten at Song Bird.

Tiyak na paghahandaan ng todo ng mga trainers at hinete ang nasabing karera dahil nakataya ang garantisadong P1.2-M premyo na ikakalat sa unang anim na kabayong tatawid sa meta.

Sina Chrome Bell na sasakyan ni Pabs Cabalejo at Tell Bell ay mula sa Bell Racing Stable, puntirya nila na masilo ang P720,000 premyo.

Hahamigin ng second placer ang P240,00, iuuwi ng third ang P120,000 habang tig-P60,000, P36,000 at P24,000 ang fourth, fifth at sixth ayon sa pagkakahilera.

Samantala, maliban sa nasabing stakes race, paniguradong magandang laban din ang masisilayan ng mga racing aficionados sa mga regular races na pakakawalan ng Metro Manila Turf Club Inc. (MMTCI) sa Linggo.

Jockey JT Pabilic malupit sa 3 inilargang astig

ni Green Lantern @Renda at Latigo | February 8, 2023

Tatlong kabayo ang naipanalo ni jockey JT Pabilic noong Linggo sa Metro Turf, Malvar sa Tanauan City, Batangas.

Kaya naman boundary si Pabilic at kanyang mga tagahanga na tiyak na nagpanalo sa nasabing araw ng karera. Unang pinanalo ni Pabilic si Hang Loose sa PHILRACOM Rating Based Handicapping System na pinakawalan sa pangalawang karera.

Inirehistro ni Hang Loose ang tiyempong 1:27.6 sa 1,400 meter race upang ungusan sina Rancheros na dumating na segundo at naterserong Happy Kid sa event na suportado ng Philippine Racing Commission, (PHILRACOM) sa pamumuno ni chairman Reli De Leon.

Hinamig ng winning horse owner na si MA Tansengco ang added prize na P10,000, pumang-apat sa laban si Mount Pulag.

Sunod na ginabayan sa panalo ni Pabilic si Den Deren Denden sa isa pang PRBHS na ikinasa sa pang-anim na karera. Sumikwat din ng karagdagang P10,000 premyo si Den Deren Denden na inirehistro ang 1:27.2 sa 1,400 meter race.

At ang pangatlo ay si Treasure Hunting na sa PRBHS din nagwagi, pinasibat ito sa Race 9.

Mas mabilis ang tiyempong inilista ni Treasure Hunting na 1:24.2 sa 1,400 meter, P10,000 din ang kanyang naiuwi.