Prime Billing, nanilat sa 3-YO Maiden Race

ni Green Lantern @Renda at Latigo | March 4, 2023

Sinilat ni Prime Billing ang liyamadong si Enigma Uno matapos manalo sa 3-Year-Old & Above Maiden Race na inilarga sa Metro Turf, Malvar sa Tanauan City, Batangas.

Hindi inapura ni former Philippine Sportswriters Association, (PSA) Jockey of the Year awardee Patty Dilema si Prime Billing, ipinuwesto nito sa tersero kung saan may walong kabayo ang agwat sa kanya ng nangungunang si Tenacity.

Nasa pangalawang puwesto naman si Enigma Uno.

Sa far turn ay naagaw ni Enigma Uno ang unahan abante siya ng limang kabayo sa humahabol na si Prime Billing.

Pagsungaw ng rektahan ay natapyasan sa isang kabayo ang bentahe ni Enigma Uno kaya naman ay nakaunat ng bahagya si Prime Billing sa huling 100 metro ng laban para masilo ang korona.

Nasungkit ni Prime Billing ang added prize na P20,000 para sa winning horse owner sa event na suportado ng Philippine Racing Commission, (PHILRACOM) sa pamumuno ni chairman Reli De Leon.

Samantala, bukas na (Linggo) ilalarga ang 2023 PHILRACOM "Road To Henry Cojuangco Cup" na pakakawalan sa parehong lugar.

Magbabakbakan ang Enigmatic Linden, Sudden Impact, Bombay Nights, Runway Dreamer, Shastaloo, Speed Fantasy, Time For Glory at Treasure Hunting sa distansiyang 1,600 meter race.

Nakalaan ang P500,000 garantisadong premyo na ikakalat sa unang apat na kabayong tatawid sa meta kung saaan hahamigin ng horse owner ng mananalong kabayo ang P300,000.

Mapupunta sa second placer ang P112,500 habang tig P62,500 at P25,000 ang third at fourth ayon sa pagkakasunod.

Enigmatic Linden at Sudden Impact sa Turf

ni Green Lantern @Renda at Latigo | March 2, 2023

Magtatambalan sina Enigmatic Linden at Sudden Impact para lahukan ang 2023 PHILRACOM Road To Henry Cojuangco Cup na ilalarga sa Metro Turf, Malvar sa Tanauan City, Batangas sa darating na Linggo, (Marso 5).

Sina Enigmatic Linden at Sudden Impact na rerendahan nina Kelvin Abobo at RG Raquel ayon sa pagkakasunod ay kasama sa mga nominadong kabayo sa nasabing event, makakaharap nila ang anim na nagsaad din ng pagsali sa stakes race.

Ang ibang nagdeklara ng pagsali ay sina Bombay Nights, Runway Dreamer, Shastaloo, Speed Fantasy, Time For Glory at Treasure Hunting sa distansyang 1,600 meter race.

Nakalaan ang P500,000 na garantisadong premyo na ikakalat sa unang apat na kabayong tatawid sa meta sa event na suportado ng Philippine Racing Commission, (PHILRACOM) sa pamumuno ni chairman Reli De Leon.

Kukubrahin ng horse owner ng mananalong kabayo ang P300,000, mapupunta sa second placer ang P112,500 habang tig-P62,500 at P25,000 ang third at fourth ayon sa pagkakasunod.

Ayon sa komento ng mga karerista sa social media, posibleng magpakitang-gilas sa karera ang kalahok na Time For Glory at Shastaloo.

"Mahuhusay na kabayo rin sina Shastaloo at Time For Glory kaya magandang laban ang masisilayan natin diyan," saad ni Carlito Gonzales, veteran karerista. "Abangan na lang natin sa Linggo, pagalingan na lang din sa pagsilip."

Samantala, walong races ang pinakawalan ng Metro Manila Turf Club Inc. (MMTCI) kahapon ng Miyerkules kaya naging masaya ang mga karerista sa kanilang paglilibang.

Big Lagoon, nag-flex ng kampeonato sa Turf

ni Green Lantern @Renda at Latigo | February 28, 2023

Ipinakita ni Big Lagoon ang pagiging kampeon nang manalo ito sa 2023 PHILRACOM "Commissioner's Cup" na nilarga sa Metro Turf, Malvar - Tanauan City sa Batangas, Linggo ng hapon.

Pagharurot sa largahan ay nakipagtagisan na ng bilis si reigning Presidential Gold Champion Big Lagoon kay Boss Emong sa unahan. Papuntang far turn ay nagkakapanabayan na sa unahan sina Big Lagoon, Boss Emong at Gomezian.

Naagaw ni Boss Emong ang unahan papasok ng home stretch nasa labas si Gomezian habang nasa tabing balya si Big Lagoon.

Umawat ng renda si jockey John Alvin Guce upang ilabas ang anak nina Havana at Blue Catch na si Big Lagoon at makaremate ng maayos sa rektahan.

Nasunod ang gusto ni Guce, napunta si Big Lagoon sa tersero puwesto, nasa unahan si Boss Emong na may apat na kabayo ang agwat sa kanya habang nasa pangalawa si Gomezian.

Sa huling 150 metro ng laban nasilayan ng mga karerista ang husay ni Big Lagoon, inungusan nito sina Boss Emong at Gomezian upang tawirin ang meta ng may apat na kabayo ang distansya.

Inirehistro ni Big Lagoon ang tiyempong 1:39.2 minuto sa 1,600 meter race sapat upang hamigin ng winning horse owner na si Melaine Habla ang P1.5M premyo.

Segundo si Boss Emong na nag-uwi ng P562,500 habang tig-P312,500 at P125,000 ang third at fourth pacers na sina Gomezian at Super Swerte ayon sa pagkakasunod.

Samantala, ang nasabing stakes race ay suportado ng Philippine Racing Commission, (PHILRACOM) sa pamumuno ni chairman Reli De Leon.