Sisingasing ang mga ilong nina Big Lagoon at Boss Emong

ni Green Lantern @Renda at Latigo | March 11, 2023

Magkikita muli sa pista ang dalawang maiinit na kabayong pang-karera na sina Big Lagoon at Boss Emong sa magaganap na 2023 PHILRACOM "Classic Cup" na ilalarga sa Metro Turf, Malvar sa Tanauan City, Batangas sa Marso 26.

Nitong nakaraan lamang ay pinarangalan si Boss Emong bilang Philippine Sportswriters Association, (PSA), Horse-of-the-Year habang si Big Lagoon ang Reigning Presidential Gold Cup champion.

Sasakyan ni star jockey Jeffril Tagulao Zarate si Boss Emong habang si John Alvin Guce ang rerenda kay Big Lagoon. Makakatagiisan ng bilis nina Boss Emong at Big Lagoon ay sina Don Julio, Gomezian, Robin Hood at Sky Shot.

May distansiyang 1,800 meter race, nakalaan ang guaranteed prize na P2.5-M na ikakalat sa unang apat na kabayong tatawid sa meta. Ibubulsa ng winning horse owner ang P1.5-M, mapupunta sa second placer ang P562,500 habang tig-P312,500 at P125,000 sa third at fourth ayon sa pagkakasunod.

Tatanggap din ng P125,000 ang breeder ng winning horse habang tig-P75,000 at P50,000 ang second at third sa event na suportado ng Philippine Racing Commission, (PHILRACOM) sa pamumuno ni chairman Reli De Leon.

Samantala, inaabangan din mga karerista ang ibang stakes races na pakakawalan ng PHILRACOM ngayong buwan ng Marso. Sa Marso 25 ilalarga ang Classic Cup Divisions II at III na ikakasa sa parehong lugar.

Luke Skywalker, sosolo sa Handicapping System

ni Green Lantern @Renda at Latigo | March 10, 2023

Sisikapin ng Luke Skywalker na masolo ang panalo sa pagsalang nito sa PHILRACOM Rating Based Handicapping System na ilalarga sa Metro Turf, Malvar sa Tanauan City sa Batangas ngayong araw.

Inaasahang liyamado sa laban ang Luke Skywalker na sasakyan ni jockey Isaac Ace Aguila kung saan ay makakalaban niya sina Doktora, Paapa Ohh Mamaw, Calamian Island, Hook On D Run, Isla Puting Bato at American Dream.

May distansiyang 1,200 meter race, nakalaan ang garantisadong premyo na P25,000 na ikakalat sa unang apat na kabayong tatawid sa meta at P10,000 karagdagang premyo na kukubrahin ng winning horse owner.

Maganda ang ipinakitang takbo ni Luke Skywalker sa nakaraang takbo nito kaya malaki ang tsansa na manalo ito sa event na suportado ng Philippine Racing Commission, (PHILRACOM) sa pamumuno ni chairman Reli De Leon.

Walong races naman ang inihanda ng Metro Manila Turf Club Inc. (MMTCI) ngayong araw ng Biyernes kaya paniguradong masaya ang mga karerista sa kanilang pananaya.

Samantala, sa Linggo na pakakawalan ang 2023 PHILRACOM 3-Year-Old Maiden Stakes Race na sasabakan nina Chrome Bell at Petron.

Paniguradong magandang laban ang masisilayan ng mga karerista dahil may 14 na kabayo ang posibleng magtagisan ng billis sa distansiyang 1,400 meter race.

Sasakyan ni dating Philippine Sportswriters Association, (PSA), Jockey-of-the-Year awardee Jonathan Basco Hernandez ang Chrome Bell habang si class A rider Jeffrill Tagulao Zarate ang gagabay sa Petron.

Nasa P1.2-M ang guaranteed prize, ang ibang kasali ay sina Barrowed Heaven, Destin Guest, Easy Way, I Under Oath, Kanyon For Freedom, Pay D Lady, Runway Ten, Save My Savings, The Alpha Male, Uncle Vhines, Whamos at Wolf Gang.

Patong Patong, panalo, hinangaan sa Race Merged

ni Green Lantern @Renda at Latigo | March 9, 2023

Isa sa mga kabayong hinangaan ng mga karerista nito nakaraan ay si Patong Patong nang manalo sa Condition Race Merged na nilarga sa Metro Turf, Malvar sa Tanauan City, Batangas.

Ginabayan ni jockey Jomer Estorque, nirehistro ni Patong Patong ang impresibong tiyempong 1:40.4 sa 1,600 meter race sapat upang hamigin ng winning horse owner na si FF Datu ang P10,000 added prize.

Kahit napahirapan sa unahan ay hindi nagpatinag si Patong Patong nanatili ang kanyang tikas hanggang sa rektahan.

May dalawang kabayo ang panalo ni Patong Patong kay Runawayfromrosenot nang tawirin nito ang meta, tumersero si Charm Campaign.

Ang nasabing karera ay suportado ng Philippine Racing Commission, (PHILRACOM) sa pamumuno ni chairman Reli De Leon.

Nagpasiklab din si Fire Council matapos manalong dehado sa PHILRACOM Rating Based Handicapping System na pinakawalan sa pangalawang karera.

Sinilat ni Fire Council ang mga liyamadong sina Main Event at Sophisticated na ginabayan ni star jockey Jeffril Tagulao Zarate.

Inilista ni Fire Council ang 1:25.8 minuto sa 1,400 meter race upang ibulsa ang karagdagang P10,000 na premyo.

Samantala, hinahanda si Patong Patong para sa sasalihang mas malaking karera kaya tiyak na aabangan ito ng kanyang mga tagahanga.

Maging ang mga karera sa Linggo ay hinihintay na rin ng mga karerista ang line up.