Krugerrand, sumikwat ng panalo sa Metro Turf

ni Green Lantern @Renda at Latigo | July 4, 2023

Umarangkada sa rektahan si Krugerrand matapos nitong sikwatin ang panalo sa PHILRACOM Rating Based Handicapping System na nilarga sa Metro Turf, Malvar sa Tanauan City, Batangas noong Linggo ng hapon.

Hindi nakasabay sa matutulin sa largahan ang Krugerrand kaya nasa pang 12 puwesto ito sa 14 na kabayong lumabas sa aparato.

Kalmado naman si dating Philippine Sportswriters Association, (PSA) - Jockey of the Year awardee Patty Ramos Dilema, hindi nito inapura si Krugerrand at nanatili ito sa likuran upang mag-aabang sa tamang pagremate.

Nagtagisan ng bilis sa unahan sina Yana's Silver, Biglang Buhos at Luke Skywalker na umabot hanggang far turn ang bakbakan habang nasa bandang likuran pa rin si Krugerrand.

Pero papalapit ng home turn ay nagsimula ng mag-init si Krugerrand at humaharurot na ito sa tabing balya.

Pagsungaw ng rekta ay nagkapanabayan na sa unahan sina Krugerrand, Don Lucas at Reliable Den.

Shoot sa balya sa ikutan si Krugerrand at sa huling 150 metro ng karera ay nasiguro na ng winning horse ang panalo sa event na suportado ng Philippine Racing Commission, (PHILRACOM) sa pamumuno ni chairman Reli De Leon.

Inirehistro ni Krugerrand ang 1:40 minuto sa 1,600 meter race sapat upang hamigin ang P150,000 premyo ng winning horse owner na si Melaine Habla.

Dumating na segundo si Don Lucas na kumubra ng P56,250, tersero si Reliable den na nag-uwi ng P31,250 consolation prize habang nakuha ng pang-apat na si Euroclydon na nagbulsa ng P12,500.

Sunny Side, sumiklab sa paglarga sa Turf

ni Green Lantern @Renda at Latigo | July 3, 2023

Nagpasiklab sa karerahan ang dehadong si Sunny Side matapos talunin ang mga liyamadong katunggali at sikwatin ang panalo sa PHILRACOM Rating Based Handicapping System na nilarga sa Metro Turf, Malvar sa Tanauan City, Batangas noong Sabado ng hapon.

Nilista ni Sunny Side ang impresibong 1:26.8 minuto sa 1,400 meter race sapat upang talunin ang tigasing sina Noh Sen Young Yana at Jannanigans at sikwatin ang P10,000 added prize para sa winning horse owner na si JG Tan.

Ayon sa komento ng mga karerista sa social media, maganda ang pagkakadala ni former Philippine Sportswriters Association, (PSA) - Jockey of the Year awardee Patricio Ramos Dilema kay Sunny Side.

"Pang star jockey talaga kung magdala ng kabayo si Patty (Dilema), tinutukan lang nito si Jannanigans, tapos sa rektahan na tomodo," saad ni Gilbert Tolentino, veteran karerista.

Humarurot sa largahan ang Jannanigans at mabilis naman itong sinundan ng Sunny Side para tutukan.

Bakbakan ang Jannanigans at Sunny Side sa far turn at pagsungaw ng rekta ay kumukuha na ng unahan ang winning horse.

Dalawang kabayo ang agwat ni Sunny Side sa pumangalawang si Katherine ng tawirin nito ang meta.

Dumating na tersero si You Never Know habang pumang-apat si Waray Na Wayda Pa sa event na suportado ng Philippine Racing Commission, (PHILRACOM) na pinamumunuan ni chairman Reli De Leon.

Lagertha at Jewel Of The Nile sasalang sa 3-Yr Old

ni Green Lantern @Renda at Latigo | July 2, 2023

Magpapasiklab ngayong araw ng Linggo ang mga dehadong sina Lagertha at Jewel Of The Nile pagsalang nila sa 3-Year-Old & Above Maiden Race na ilalarga sa Metro Turf, Malvar - Tanauan City, Batangas.

Inaasahang makakakuha ng suporta sina Lagertha at Jewel Of The Nile sa mga dehadista dahil sa kanilang husay sa karerahan. Pero tiyak na mapapalaban sina Lagertha at Jewel Of The Nile laban sa pito pang tigasing kabayong kasali sa distansiyang 1,400 meter race.

Nakalaan ang added prize na P20,000 para sa mananalong kabayo ang ibang kalahok ay sina Oras na, Oradas Gray, Maayo Kaayo, Golden Jaraywa, Impressive Victory, Freydis Cutie at Humble Strike. Si Oradas Gray ang puwedeng magdomina ng takilya sapagkat markado siya ng mga liyamadista.

Rerendahan ni former Philippine Sportswriters Association, (PSA) - Jockey of the Year awardee Patricio Ramos Dilema si Jewel Of The Nile habang si Rico Suson ang sasakay kay Lagertha.

Ang nasabing event ay suportado ng Philippine Racing Commission, (PHILRACOM) sa pamumuno ni chairman Reli De Leon at may walong karera ang inihain ng Metro Manila Turf Club Inc. (MMTCI).

Samantala, isa pang aabangan ng mga karerista ay ang bakbakan ng 14 na mahuhusay na kabayo sa PHILRACOM Rating Based Handicapping System na pakakawalan sa pangalawang karera.

Mga Pili ni Green Lantern:

Race 1 - Lagertha (9), Oradas Gray (2), Jewel Of The Nile (4)

Race 2 - Don Lucas (1), Reliable Den (14), Krugerrand (8)

Race 3 - Jambo (2), Diez Catorse (1), Red Hawk (6)

Race 4 - Dambana (13), Flattering You (7), American Dream (7)

Race 5 - Sky Plus (1), Just For Fierce (7), Tontoneeto (6)

Race 6 - Iikot Lang/Etnad (1/1A), Super Cong (3), Chloespirit (11)

Race 7 - Namaskar (8), Eyevan (10), Avalone Bandit (5)

Race 8 - Hakeem (14), Phenom (1), Rockaway (3), Sultanov (11)