Jaguar, nakoronahan sa 3RD Leg Triple Series

ni Green Lantern @Renda at Latigo | July 18, 2023

Napasaya ng top favorite na si Jaguar ang mga liyamadista matapos sikwatin ang korona sa 2023 PHILRACOM 3rd Leg Triple Crown Series na inilarga sa Metro Turf, Malvar sa Tanauan City sa Batangas, Linggo ng hapon.

Naka-dalawang legs ang pinagwagian ni Jaguar, nasungkit din nito ang panalo sa second leg kung saan parehong si star jockey Jeffril Zarate ang naging hinete.

Lumabas na pang-apat si Jaguar para manood ng bakbakan sa unahan hanggang sa kalagitnaan ng karera habang nasa pang-anim ang mahigpit na karibal na si first leg winner La Trouppei.

Patuloy ang tagisan ng bilis sa unahan nina Secretary at Boat Buying habang nag-aabang sa tersero si Istulen Ola subalit papasok ng far turn ay kumakapit na sina La Trouppei at Jaguar sa unahan.

Bumulaga si La Trouppei at inungusan niya sa pagremate si Jaguar pero hindi ito pinalayo ng winning horse.

Papalapit ng home turn ay inagaw na ni Jaguar ang unahan at umabot sa anim na kabayo ang lamang nito sa rektahan sa nauupos na si La Trouppei.

Walang kahirap-hirap na tinawid ni Jaguar ang meta ng may walong kabayong agwat sa pumangalawang si Earli Boating.

Inilista ng Jaguar ang 2:05 minuto sa 2,000 meter race sapat upang hamigin ng winning horse owner na si Cong. Juan Miguel "Mikey" Macapagal Arroyo ang P2.1M premyo.

Ibinulsa ni Earli Boating ang P787,500, tumersero si Istulen Ola na kumubra ng P437,500 habang napunta ang P175,000 sa fourth placer na si La Trouppei.

Naiuwi naman ng winning breeder na si Joseph Dyhengco ang P175,000 na premyo habang tig-P105,000 at P70,000 ang second at third.

Samantala, nasa siyam na karera ang pinakawalan ng Metro Manila Turf Club Inc. (MMTCI) noong Linggo kaya mahaba-haba ang paglilibang ng mga karerista.

Sky Story, sinilo ang korona sa 3-YO

ni Green Lantern @Renda at Latigo | July 17, 2023

Nagpasiklab si Sky Story sa mga tumaya sa kanya at mga tagahanga matapos nitong siluhin ang korona sa 2023 PHILRACOM 3-Year-Old Locally Bred Stakes Race na nilarga sa Metro Turf, Malvar sa Tanauan Ciy, Batangas noong Sabado ng hapon.

Nilundag agad ni Light Bearer ang unahan pagkalabas nito sa aparato subalit hindi siya pinalayo ni Sky Story na tinutukan siya hanggang sa half mile ng karera.

Subalit habang lumalapit sa far turn ay kumukuha na ng unahan si Sky Story na sinakyan ni star jockey Jeffril Tagulao Zarate at pagdating ng huling kurbada ay lumamang pa ng dalawang kabayo ang winning horse.

Umalagwa pa ang lamang ni Sky Story sa tatlong kabayo sa rektahan kaya naman malayo ang lamang nito sa sumegundong Light bearer pagtawid ng finish line.

Nirehistro ni Sky Story ang impresibong tiyempong 2:06.4 sa 2,000 meter race sapat upang hamigin ng winning horse owner na si JO Gianan ang P600,000 premyo, nakopo ng Light Bearer ang P225,000.

"Grabe ang husay ni Sky Story, walang kahirap-hirap na nanalo, kahit mahaba pa ang karera hindi maaabutan," saad ni Fernando Ventura, veteran karerista.

Dumating na tersero si Open Billing at pang-apat si Orange Bell, nai-uwi nila ang tig P125,000 at P50,000 ayon sa pagkakasunod.

Humamig din ang winning breeder na si Joseph Dyhengco ng P50,000 habang tig-P30,000 at P20,000 ang second at third sa event na suportado ng Philippine Racing Commission, (PHILRACOM).

Samantala, may siyam na karera ang pinakawalan ng Metro Manila Turf Club Inc. (MMTCI) kahapon ng Linggo kaya naman naging masaya ang mga karerista sa kanilang paglilibang.

Prime Billing, kakasa sa Hopeful Stakes Race

ni Green Lantern @Renda at Latigo | July 16, 2023

Kakasahan ni Prime Billing ang tikas nina Chrome Bell at Cluster ngayong araw sa magaganap na 2023 PHILRACOM Hopeful Stakes Race na ilalarga sa Metro Turf, Malvar sa Tanauan City, Batangas.

Maliban kina Chrome Bell at Cluster, kikilatisin din ng Prime Billing ang ibang kalahok na sina Badboy MJ, Glamour Girle, Grand Monarch at Winner Parade.

Babaybayin ng mga kalahok ang distansiyang 2,000 meter race kaya inaasahang marami ang puwedeng mangyari sa karerang nakalaan ang P1.5M garantisadong premyo na ikakalat sa unang anim na kabayong tatawid sa meta.

Gagabayan ni dating Philippine Sportswriters Association - Jockey of the Year awardee Patty Ramos Dilema si Prime Billing, puntirya nilang masilo ang first place prize na P900,000 sa event na suportado ng Philippine Racing Commission, (PHILRACOM) sa pamumuno ni chairman Reli De Leon.

Komento ng mga karerista, tiyak na magandang laban ang kanilang masisilayan at paniguradong mahirap pumili ng tatayaan dahil lahat ng kasali ang magagaling na kabayo.

Kukubrahin ng second at third placers ang P300,000 at P150,000 ayon sa pagkakasunod habang tig-P75,000, P45,000 at P30,000 ang 4th, 5th at 6th.

Mag-uuwi rin ng P75,000 ang breeder ng winning horse, tig-P45,000 at P30,000 ang second at third.

Samantala, pakakawalan din ngayong araw ng Biyernes ang 3-Year-Old Locally Bred Stakes Race, pitong kabayo ang magtatagisan ng bilis.