2023 Traslacion, suspendido uli — Fr. Valdez

ni Lolet Abania | November 10, 2022

Muling isususpinde ang tradisyunal na Traslacion sa Enero 2023, kung saan ikatlong magkakasunod na taon ng taunang pagdiriwang ng Pista ng Poong Itim na Nazareno na kinansela dahil sa COVID-19 pandemic.

Sa isang interview, sinabi ng Quiapo Church Attached Priest na si Fr. Earl Allyson Valdez na ang lahat ng aktibidad kaugnay sa Pista ay magpapatuloy.

Kabilang dito ang paghawak sa imahe ng Black Nazarene kapalit ito ng “Pahalik,” na gaganapin sa Quirino Grandstand.

“Bagama’t walang tradisyunal na prusisyon, ay ang lahat ng ating nakagawiang aktibidades na may kinalaman sa Kapistahan ng Itim na Nazareno ay matutuloy po,” pahayag ni Fr. Valdez.

Isasagawa rin ang hourly masses sa Quiapo Church simula alas-12:00 ng hatinggabi ng Enero 9, na pangungunahan ni Manila Archbishop Jose Cardinal Advincula.

Magkakaroon naman ng mga misa sa iba pang mga simbahan sa Metro Manila at mga lalawigan sa Luzon para sa mga hindi makakapunta sa selebrasyon sa Quiapo Church.

“Ang aming layunin ay kung hindi makapupunta para sa Traslacion, ay ang Nazareno na mismo ang tutungo sa kani-kanilang lugar at simbahan,” saad ni Fr. Valdez.

Paliwanag ng pari, nagdesisyon ang Quiapo Church na isuspinde uli ang Traslacion upang maiwasan ang pagdagsa ng mga tao mula sa iba’t ibang bahagi ng bansa sa Quiapo Church habang nananatili pa rin ang COVID-19.

Aniya pa, kinokonsidera rin nila ang kalusugan at kaligtasan ng mga matatanda at mga indibidwal na may comorbidities na silang mga vulnerable sa COVID-19 na posibleng dumalo sa pagdiriwang.

Ang Traslacion ay prusisyon na dala ang imahe ng Poong Itim na Nazareno mula Quirino Grandstand pabalik sa Quiapo Church at taunang isinasagawa ito ng Enero 9.

At bilang pagsunod sa health protocols sa Quiapo Church, ayon kay Fr. Valdez ang mga deboto ay pinapayuhan pa ring magsuot ng kanilang face masks sa loob ng simbahan, habang mayroon ding hiwalay na entry at exit points para mapanatili ang physical distancing.

Black Nazarene, ipuprusisyon sa Biyernes Santo — Quiapo Church

ni Lolet Abania | April 10, 2022

Isasagawa ang prusisyon ng Itim na Nazareno sa Biyernes Santo, Abril 15, sa pamamagitan ng isang motorcade na susundan ng parehong mga ruta sa Traslacion, ayon sa opisyal ng Quiapo Church ngayong Linggo.

“Lalabas ang Nazareno sa Biyernes Santo pero motorcade ang Nazareno. Hindi po ito hihilahin o maglulubid. Hindi ito sasampahan ng mga hijos o ng mga deboto. Sana maintindihan ng mga deboto na pupunta sa Biyernes,” sabi ni Quiapo Church parochial vicar Fr. Douglas Badong sa isang interview.

Binanggit ni Fr. Badong na ang magiging mga ruta ng Black Nazarene motorcade ay katulad sa normal na ruta na ginagawa sa panahon ng Traslacion.

Ang Traslacion ay isang taunang religious event ng mga debotong Katoliko kaugnay sa tradisyunal na prusisyon ng Itim na Nazareno mula sa Quirino Grandstand pabalik ng Quiapo Church.

“12 midnight ang alis sa Quiapo Church. Lahat ay dapat naka-face mask na sasama sa motorcade at dini-discourage natin ‘yung naka-paa,” paalala ni Fr. Badong.

Matatandaang ang tradisyunal na Traslacion ay muling nakansela, kung saan ikalawang magkasunod na taon ito na hindi isinagawa dahil sa pandemya ng COVID-19.

Sinabi naman ni Fr. Badong na ipinagpatuloy na ng Simbahan ng Quiapo ang karamihan sa kanilang mga aktibidad, partikular na ang Semana Santa. Ang aktibidad na ito ay natigil ng mahigit sa dalawang taon dahil sa panganib ng COVID-19.

“Magkakaro’n ng Senakulo ang mga kabataan. Sa muling pagkakataon, makakapagpalabas na sila ulit under the new normal kasi nga tinitiyak natin ‘yung kaligtasan nila,” saad ni Fr. Badong.

Gayunman, sa kabilang na ang National Capital Region (NCR) ay isinailalim na sa Alert Level 1, aniya, hindi pa rin ipinatutupad ng Quiapo Church sa Manila ang 100% capacity sa loob ng simbahan.

Siksikan at mahaba ang pila… Mga magsisimba sa Quiapo dagsa ngayong first Friday ng Marso

ni Jasmin Joy Evangelista | March 4, 2022

Dumagsa ang mga nagsimba sa Quiapo Church ngayong unang Biyernes ng Marso.

Siksikan at mahaba ang pila sa bahagi ng Villalobos Street ng mga nais makadalo ng misa sa loob ng Quiapo Church.

Ayon sa Plaza Miranda Police Community Precint (PCP) ng Manila Police District (MPD), tinatayang nasa dalawang libo ang bilang ng mga tao kaninang 7:00 a.m. sa loob at paligid ng simbahan.

Matatandaan na una nang ipinatupad ngayong linggo ang Alert Level 1 sa Metro Manila.