COVID-19, tumaas ang kaso dahil kumakalat sa trabaho — Belmonte

ni Ronalyn Seminiano Reonico | March 15, 2021

Tumaas ang kaso ng COVID-19 sa Quezon City dahil sa pagkakahawahan sa mga lugar na pinagtatrabahuhan o workplaces, ayon sa lokal na pamahalaan ngayong Lunes.

Sa datos ng City Epidemiology and Disease Surveillance Unit (CESU), sa 722 positive cases mula noong February 28 hanggang March 13, 104 cases ang kumalat sa mga workplaces na maraming empleyado.

Pahayag ni QC Mayor Joy Belmonte, “Reports showed that household transmission stems from one member of the household acquiring the virus from his workplace.

"We have instructed our departments to closely look into workplaces and check if they still adhere to our health protocols. Employers must do all they could to minimize risks among their employees, especially essential workers, so they won’t bring the virus home to their families.”

Simula ngayong araw, March 15, nagpatupad ng liquor ban ang lokal na pamahalaan sa QC at pansamantala ring ipinasara ang ilang establisimyento dahil sa paglobo ng kaso ng COVID-19 sa Metro Manila.

Noong March 14, 2,991 ang aktibong kaso sa QC at 32,024 ang mga gumaling na at 863 naman ang mga pumanaw dahil sa COVID-19.

Gyms, spas, internet cafes, ipinasara; liquor ban ipatutupad sa QC

ni Lolet Abania | March 14, 2021

Magpapatupad ang lokal na pamahalaan ng Quezon City ng city-wide liquor ban at pansamantalang ipasasara ang ilang establisimyento sa lungsod simula bukas, March 15 hanggang March 31 dahil sa biglaang pagtaas ng COVID-19 cases sa National Capital Region (NCR).

“The drastic increase of cases is very alarming. We want to stop the transmission as early as now so that we no longer have to implement another nationwide lockdown,” ani Mayor Joy Belmonte sa isang pahayag ngayong Linggo.

Ayon kay Belmonte, ang lahat ng mga retail stores at nagbebenta ng mga alcoholic beverages ay suspendido nang dalawang linggo. Gayundin, ipinasara ng city government ang lahat ng gyms, spas, at internet cafes matapos aniyang magkaroon ng “serious outbreak in one gym.”

Nagbigay din ng direktiba si Belmonte sa mga barangay na muling mag-isyu ng quarantine passes upang malimitahan ang galaw ng mga residente.

“However, a barangay may not close down any establishment without the approval of the city government,” sabi ni Belmonte.

Sinabi rin ng alkalde na ang mga returning overseas Filipinos na nananatili sa mga hotels at iba pang accommodations sa lungsod na inorganisa ng pamahalaan o private entities ay kinakailangang mag-report sa itinakdang opisina ng Quezon City para sa kaukulang protocols.

“They must report to the Office of the City Administrator for documentation and monitoring, and for guidance on health, security, and logistics protocols,” ayon sa inilabas na statement ng alkalde. “All OFWs are required to complete the mandatory quarantine period of at least 14 days regardless of the RT-PCR test result,” diin pa ni Belmonte.

“All member offices of the city’s law and order cluster, regulatory departments, the barangays, and the QCPD and its police stations shall continue enforcing the protocols contained in these guidelines,” dagdag niya.

300 walang face mask, hinuli sa QC

ni Mary Gutierrez Almirañez | March 12, 2021

Hinuli ang mga hindi sumusunod sa ipinatupad na health protocols kontra COVID-19 partikular na ang mga walang suot na face mask sa Quezon Ave. Memorial Circle, Quezon City ngayong umaga, Marso 12.

Batay sa ulat, patuloy na nagsasagawa ng operasyon sa lungsod ang Department of Public Order and Safety (DPOS), Quezon City Police District (QCPD) at Task-force Disiplina, gayunpaman, ngayong araw ang itinuturing nilang “one time, big time operation” mula noong ika-1 ng Marso kung saan umabot na sa mahigit 4,000 ang mga pasaway na nahuli.

Ayon pa kay DPOS Head Elmo San Diego, “Sobrang higpit natin kaya lang, ayaw makinig ‘yung mga mamamayan natin. Parang dinededma nila. Hindi sila seryoso at hindi nila alam na talagang delikado ang sitwasyon natin ngayon… Kaya ako nalulungkot, hindi nababawasan ‘yung huli. In fact, dumadami pa rin. Dapat ‘pag dumadami itong infection rate sa Quezon City, pababa nang pababa ‘yung mga violators natin.”

Tinatayang P300 ang multa sa mga nahuli sa first offense, habang P500 para sa second offense at P1,000 sa third offense. Aniya, hindi na nila titiketan ang mga aabot sa ika-apat na paglabag, bagkus ay ikukulong na nila ito sa presinto kung saan kailangan nang magpiyansa.

Dagdag pa niya, “After 7 days, idinedemanda na natin sila sa Fiscal’s office. Kaya kailangan ‘yan immediately, mabayaran nila. At eto, magkaka-warrant sila kapag hindi sila tinubos… Kapag may violation ka at hindi mo tinubos, hindi ka na makakakuha ng mga permit dito sa Quezon City. Walang maibibigay na services sa ‘yo dito sa Quezon City, unless mabayaran mo muna.”

Ngayong araw ay umabot na sa 300 katao ang mga nahuling lumabag sa lungsod. Karamihan sa kanila ay lumabas lamang sa bahay para bumili ng kape, shampoo at iba pa sa katabing tindahan nang hindi nakasuot ng face mask.