UP professor, arestado sa ‘di pag-remit ng SSS contributions — QCPD

ni Lolet Abania | Pebrero 6, 2023

Arestado ang isang University of the Philippines (UP) professor ng Quezon City Police District (QCPD) dahil sa umano non-remittance nito ng Social Security System (SSS) contributions.

Batay sa inisyal na report ng QCPD-Criminal Investigation Detection Unit, si Professor Melania Flores, dating presidente ng All U.P. Academic Employees Union (AUAEU) at residente ng UP Campus, Diliman, Quezon City, ay inaresto bandang alas-11:00 ng umaga ngayong Lunes.

Nabatid na si Flores ay subject sa isang warrant of arrest dahil sa umano paglabag nito sa Section 22 (a) in relation to Section 22 (d) at Section 28 (e) sa ilalim ng Republic Act 8282. Dinala na si Flores sa Camp Karingal para sa imbestigasyon.

Sa isang Facebook post, ayon sa human rights group na Karapatan National Capital Region, dalawang babae at dalawang lalaking police officers na nakasuot ng sibilyan, ang nagpunta sa bahay ni Flores at nagpakilalang mga empleyado ng Department of Social Work and Development (DSWD).

Ipinakita ng mga police officers ang warrant of arrest nang buksan na ni Flores ang gate ng kanyang bahay.

Agad namang nanawagan ang iba’t ibang organisasyon gaya ng Alliance of Concerned Teachers (ACT), AUAEU, UP Diliman University Student Council, at UP Departamento ng Filipino at Panitikan ng Pilipinas para palayain si Flores.

Ayon sa mga nasabing grupo, ang pag-aresto kay Flores ay paglabag sa naging kasunduan ng UP-Department of the Interior and Local Government (UP-DILG) Accord of 1992, kung saan ang pulisya ay pumasok sa nasabing campus na walang anumang koordinasyon sa UP Diliman administration.

FB post ng UP Fight Club, nag-viral... 'Harassment' sa student-athletes, 'di totoo – QCPD

ni Zel Fernandez | May 13, 2022

Kasunod ng kumalat na social media post ng UP Fighting Maroons Club Facebook page nitong Mayo 10 kaugnay ng pangha-harass umano sa mga student-athletes ng kanilang unibersidad, pinabulaanan ng Quezon City Police District ang lumabas na alegasyon at iginiit na wala umanong nangyaring ganoong insidente.

Ayon sa naturang FB post, “It was reported earlier today that several of our student-athletes were stopped by the police on their way back to the campus, simply because of their affiliation with the University of the Philippines as an institution.

The UP Fighting Maroons Club condemns the police’s actions that threatened and traumatized our Iskolar ng Bayan. These are the very people who have sworn to keep the citizenry safe, but have now instilled fear in the hearts of the youth instead.

STOP HARRASSING OUR STUDENT-ATHLETES!

END THE CULTURE OF IMPUNITY!”

Gayunman, batay sa validation report na inilabas ng Anonas Police Station, ani PLTCOL Ritchie Claravall, wala umanong katotohanan ang naturang ulat at itinanggi rin umano ito mismo ng UP Diliman Police Department, taliwas sa kumalat na Facebook post ng UP Fight Club.

Dahil dito, mahigpit na pinaalalahanan ni QCPD Director PBGEN Remus Medina ang publiko na mag-ingat aniya sa mga isini-share at ipino-post na balita sa social media.

Babala nito, may karampatang parusa ang pagpo-post ng mga peke o maling impormasyon sa social media, sang-ayon sa R.A.10175 o Cybercrime Prevention Act.

2 lokal na kandidato sa Quezon City, niregaluhan ng live ammo

ni Jeff Tumbado | May 4, 2022

Iniimbestigahan na ng Criminal Investigation and Detection Unit ng Quezon City Police District (QCPD-CIDU) ang insidente ng pagpapadala umano ng mga buhay na bala sa opisina ng isang kongresista sa lungsod.

Batay sa ulat ng QCPD, dakong ala-1:20 ng hapon nang may isang babae na nagpadala ng selyadong kahon sa tanggapan nina Quezon City 5th District Rep. Alfred Vargas at Council PM Vargas sa Novaliches District Center Building, Jordan Plain Subdivision, Barangay Sta. Monica ng nasabing lungsod.

Tinanong umano ng staff ng mga Vargas ang babaeng naghatid ng kahon kung kanino nanggaling ngunit sinabi lamang na hindi nito alam at nagmamadaling lumabas ng gusali at iniwan ang kahon sa mesa. Nang buksan ng mga guwardiya ang kahon ay nakita ang dalawang bala ng 5.56 mm na baril sa loob.

Mabilis namang humingi ng tulong sa pulisya ang mga guwardiya upang maimbestigahan ang insidente at sa kaukulang disposisyon ng mga nadiskubreng live ammunition. Inaalam na rin sa mga kuha ng CCTV ang insidente.

Kapwa kumakandidato sa May 9 elections ang magkapatid sa pagka-kongresista at konsehal ng ika-5 Distrito ng Quezon City.

Isa sa mga mainit na kalaban ni PM Vargas sa pagka-kongresista ay ang kontrobersiyal na negosyanteng si Rose Nono Lim na iniuugnay sa iskandalo ng Pharmally deal at iniimbestigahan na rin ng QCPD dahil sa pagkakaroon umano ng private army.

“Hindi ako magpapatinag maski ang banta ay kasama na ang pamilya, at lalong hindi ako aatras para sa mga taga-Distrito Singko!” diin ng nakababatang Vargas.

Umapela naman si Rep. Vargas sa mga tagasuporta na manatiling mahinahon at tumulong na maprotekahan ang proseso ng eleksyon.

“Marami na pong nag-alok sa amin upang umatras sa eleksyon na ito pero hindi po namin puwedeng gawin ‘yun,” ayon sa kongresista.

Nagbabala naman si QCPD Chief Police Brigadier General Remus Medina sa mga kandidato na sumunod sa patakaran ng COMELEC upang maging peaceful and orderly ang eleksyon sa nasabing siyudad.