PUV drivers, pasok sa TUPAD — DOLE

ni Madel Moratillo @News | March 30, 2025

Photo LTFRB

Pinag-aaralan na ng Department of Labor and Employment (DOLE) ang tulong na puwedeng ibigay sa mga drayber ng public utility vehicle (PUV) na apektado ng patuloy na pagsirit ng presyo ng mga produktong petrolyo.

Sabi ni DOLE spokesperson Assistant Secretary Lennard Serrano, partikular na tinitingnan nila ang kanilang TUPAD program o Tulong Panghanapbuhay sa Ating Disadvantaged/Displaced Workers.

Isa itong 90 araw na cash-for-work program ng DOLE sa mga nawalan ng trabaho dahil sa kalamidad o nangyayaring energy emergency.

Ang mga PUV driver aniya ang isa sa pinakaapektado ng napakataas na presyo ng produktong petrolyo.

“Mahalaga ang mga driver especially ngayon. Pero nakikita rin natin na sila talaga ang one of the most affected dahil sa pagtaas ng presyo ng langis kaya tinitingnan natin, anong assistance ang maibibigay through the TUPAD program,” pahayag ni Serrano sa panayam sa radyo.

Nakikipagpulong na aniya sila sa mga ahensya ng gobyerno kung ano ang puwedeng itulong ng kanilang TUPAD program.

Aminado ang opisyal na hindi tatagal ang limanv libong pisong fuel subsidy na ibinigay ng gobyerno sa PUV drivers.

“Tinitingnan natin kung sino pa ang puwedeng makasama rito... Tinitingnan din natin--mga tricycle driver. Maaari pa ba silang makapasok, maging beneficiary sa ating programa?” pahayag pa ni Serrano sa panayam sa radyo.

Sapul sa bigtime oil price hike... PUV drivers, bigyan ng P5K ayuda — PBBM

ni Mylene Alfonso @News | March 12, 2026

Photo: Pangulong Bongbong Marcos at PUVs - LTFRB

Ipinag-utos ni Pangulong Ferdinand Marcos, Jr. ang agarang pamamahagi ng P5,000 fuel subsidy para sa mga pampasaherong tsuper na naapektuhan ng pagtaas ng presyo ng gasolina bunsod ng umiiral na tensyon at giyera sa Middle East.

Pinulong ni Executive Secretary Ralph G. Recto ang mga Metro Manila mayors kahapon para plantsahin ang mabilis at maayos na pamamahagi ng tulong.

“Bilang mayors, kayo ang higit na nakakaalam sa tunay na sitwasyon at bilang ng mga tricycle at jeepney drivers sa inyong mga lungsod. Kaya mahalaga ang ating pagtutulungan. Sa mabuting koordinasyon at sabayang pagkilos, mas mabilis nating maipaparating ang tulong sa bawat driver na nangangailangan,” ani Recto.

Magsisimula sa susunod na linggo ang distribusyon ng fuel subsidy sa Metro Manila, na pangungunahan ng Department of Social Welfare and Development (DSWD) at Department of Transportation (DOTr).

Kasunod nito, agad na ipatutupad ang pamimigay sa iba pang rehiyon sa buong bansa.

Ayon kay Department of Social Welfare and Development (DSWD) Secretary Rex Gatchalian, unang ipamamahagi ang cash aid sa mga tricycle driver sa pamamagitan ng kani-kanilang local government units (LGUs).

Kalahati aniya ng P60 bilyong pondo para sa Assistance to Individuals in Crisis in Situations (AICS) ang inilaan para sa naturang programa.

“Ang napagkasunduan namin ng mga alkalde ng Metro Manila at later on sa buong bansa ay by Tuesday next week, sisimulan na natin iyong pagbigay ng tulong-pinansyal,” saad niya.

“The DSWD is ready. The President has instructed us to make use of everything in our arsenal to make sure na hindi maapektuhan ang mga kababayan natin,” diin ng DSWD chief.

Makakatanggap din ng P5,000 cash aid ang mga driver ng jeepney, taxi, bus, at transportation network vehicle services (TNVS) sa mga susunod na linggo, na posibleng ipamahagi sa Abril ayon naman kay Department of Transportation (DOTr) Secretary Giovanni Lopez.

“Definitely lahat po ‘yan mabibigyan but we have to start somewhere,” saad ng Transportation chief

“Ang utos at usapan ngayon ay ‘wag pahirapan ang ating mga kababayan kaya po cash payout.”

“Kung iyong perang iyon ay gagamitin nila sa subsidy fuel subsidy nasa kanila iyon, kung iyon ay gagamitin nila pambili ng gamot, pangkain okay din po iyon sa gobyerno sa amin sa DOTr at sa Pangulo, kasi iyong pera sa kanila po iyon,” hirit ni Lopez. 

Diesel 'pag umabot ng P60/litro... Taas-pasahe sa PUV

by Mai Ancheta @News | March 4, 2026

Photo: Land Transportation Franchising and Regulatory Board - LTFRB

Pinag-aaralan ng Land Transportation Franchising and Regulatory Board (LTFRB) na magbigay ng provisional fare increase sa halos lahat ng uri ng pampublikong transportasyon kung aabot ng hanggang P60 per liter ang presyo ng diesel.

Ayon kay LTFRB Chairperson Vigor Mendoza II, ang plano ay ikinukonsidera sa gitna ng tumataas na pandaigdigang presyo ng langis bunsod na rin ng nagaganap na tensiyon sa Gitnang Silangan.

Sinabi ni Mendoza na naisumite na ang resolution sa petisyon ng mga pampublikong bus at jeep, at pagpapasyahan na ito sa lalong madaling panahon.

Humihirit ang transport groups ng dalawang pisong minimum increase sa jeepney at bus habang P20 naman para sa flagdown rate ng Transport Network Vehicle Services.

Hiniling naman ng provincial bus operators ang dagdag na singkwenta sentimos kada kilometro, habang ang point to point buses (P2P) ay 30% hanggang 40%fare hike.