Phaseout sa jeep kahit iniurong.. 1 linggong tigil-pasada, tuloy

ni Jeff Tumbado | March 3, 2023

Tuloy pa rin ang malawakang tigil-pasada ng ilang transport group sa darating na Lunes, Marso 6, kahit pa hindi na matutuloy ang pag-phaseout sa traditional jeepney sa buong bansa sa Hunyo 30.

Ito ang tiniyak ni Mar Valbuena, pangulo ng Manibela, na magsasagawa sila ng isang linggong tigil-pasada bilang protesta sa jeepney modernization program ng Land Transportation Franchising and Regulatory Board (LTFRB).

Ayon kay Valbuena, kahit pa iniurong ng LTFRB ng hanggang Disyembre 31, 2023 ang deadline sa pagkuha ng konsolidasyon ay hindi sila matitinag sa kanilang ipinaglalaban.

Dagdag pa ni Valbuena, hindi pa niya nakikita ang kopya ng dokumento pero may nakapagsabi umano sa kanya na hindi kasama sa mga tinalakay ang solusyon sa kanilang mga karaingan.

“2021 pinutol ang consolidation. May mga iba-ibang transport cooperative tapos nu’ng pinutol ‘yun, ‘di kami natapos, basura na. Back to zero. Ngayon, kung gusto namin sumali, poproseso ulit kami pero doon na sa naunang kooperatiba na nag-comply,” ani Valbuena.

“Ano implications nito? Hindi na kami magiging kooperatiba. ‘Yung mga miyembro po namin na kasama sa kooperatiba sasali sa existing kooperatiba na naunang nakapag-comply o napayagan. Ano mangyayari du’n? Magmimiyembro na naman kami… May membership fee na naman. Panibagong gastos ulit,” paliwanag nito.

Nasa 100,000 public utility vehicles (PUV) ang umano’y lalahok sa welga na maaaring magparalisa sa transportasyon.

Sa ilalim ng programang modernisasyon ng PUV, inoobliga ang mga operator at driver ng mga tradisyunal na jeepney na magbuo o sumali sa kooperatiba para makakuha ng prangkisa, at ng mas mahal, moderno at environment-friendly na jeepney.

Nitong Miyerkules nang ihayag ni LTFRB Chairman Atty. Teofilo Guadiz sa ipinatawag na pulong balitaan na maglalabas sila ng bagong memorandum circular na nagsasaad ng pagpapalawig ng deadline ng prangkisa para sa mga tradisyunal na jeepney hanggang December 31, 2023.

Nakatakda sanang mapaso ang naturang mga prangkisa sa darating Hunyo 30.

“To be honest there is no pressure for us for this strike because more than 90% of the transport groups have signified their support to the program of the LTFRB,” pahayag ni Guadiz.

“In deference to the Senate resolution of Senator Grace Poe and to the request of the secretary of the Department of Transportation, we will be extending the deadline to allow the transport sector more time to consolidate,” dagdag pa ng opisyal.

Lumang jeep, tuloy — LTFRB

ni Jeff Tumbado | February 7, 2023

Palalawigin pa ng Land Transportation and Franchising Regulatory Board (LTFRB) ang bisa ng mga prangkisa ng mga tradisyunal na jeep sa layong matiyak na walang tsuper ang mapag-iiwanan ng Public Utility Vehicle Modernization Program (PUVMP) ng pamahalaan.

Kasunod ng huling deliberasyon para sa PUVMP, kinumpirma ni LTFRB Chairman Atty. Teofilo Guadiz III na napagpasyahan ng mga miyembro ng Board na palawigin ang mga prangkisa ng tradisyunal na jeep, sa ikaapat na pagkakataon.

Gayunman, nilinaw ni Guadiz na kailangan munang isapinal ang mga detalye hinggil sa mga alituntunin kaugnay ng pagpapalawig ng bisa ng mga prangkisa ng tradisyunal na jeep.

Tinukoy ni Guadiz na mula sa target na bilang ng mga yunit na ilalahok sa modernisasyon, nasa 60% ng mga jeep ang sumailalim na sa PUVMP, habang 40% ang hinihintay na makalahok sa nasabing programa.

“Hindi namin gustong mayroong maiiwan kaya nais namin na kahit 95% lang ng mga dyip ang maging handa na kapag itinuloy namin ang PUV modernization program,” pagdidiin ni Guadiz.

“However, sa meeting, pag-uusapan din namin kung may mga area na talagang fully-modernized na, baka doon ilatag na namin nang tuluyan ‘yung full modernization (program). But on areas na kulangkulang pa o wala pang modernized jeepney, we will still stick to the traditional jeepney,” dagdag pa ni Guadiz.

Bukod sa hindi pa handa ang lahat ng mga jeep na maging modernisado, sinabi rin ni

Guadiz na isinaalang-alang nila ang iba pang mga problema sa sektor ng transportasyon.

Kabilang na aniya rito ang kakulangan sa mga pampublikong sasakyan na matutugunan sakaling palawigin pa ang bisa ng mga prangkisa ng mga tradisyunal na jeep.

Ayon pa kay Guadiz, naiintindihan ng ahensya na maaaring hindi magkaisa ang mga operator at tsuper para sumali sa iisang kooperatiba kaya’t pinag-aaralan na nila ang posibilidad na magtalaga ng dalawa o tatlong kooperatiba sa bawat isang ruta, na maaaring salihan ng mga operator at tsuper.

Bukod dito, nais din ng ahensya na maging balanse at matiyak na walang operator o tsuper na maiiwan kaya palalawigin din nito ang palugit para sa pagtalima sa mga regulasyon sa ilalim ng PUVMP.

Dahil wala nang physical distancing... Protocols sa PUVs, mahigpit na ipatupad – DOH

ni Lolet Abania | March 4, 2022

Mariing ipinaalala ni Department of Health (DOH) Undersecretary Maria Rosario Vergeire sa publiko na dapat pa ring sumunod sa mga health protocols kaugnay sa COVID-19 sa kabila na niluwagan na ang alert level restrictions sa maraming lugar sa bansa.

Sa isang interview nitong Huwebes, sinabi ni Vergeire na batid ng Inter-Agency Task Force on Emerging Infectious Diseases (IATF) na wala nang physical distancing sa mga public transportation na pinayagang mag-operate ng 100% capacity.

“Ang isa pang napag-usapan hindi talaga maipapatupad ang physical distancing sa ating mga public transport because kailangan po ng tao eh, para makarating sila sa kanilang mga essential na gagawin,” sabi ni Vergeire.

“Kelangan lang po talaga meron po tayong adequate enforcement. Enforcement to monitor, eto pong mga pagpapatupad ng safety protocols,” dagdag niya.

Iginiit din ni Vergeire na hindi maaaring kumain o uminom at mag-usap-usap sa loob ng public utility vehicles (PUVs) at hindi rin puwedeng tanggalin ang face mask kapag nasa loob ng public transport, kung saan kailangang mahigpit na ipatupad, habang pakiusap niya sa mga operators at drivers ng public transport na hindi dapat lumagpas sa 100% seating capacity lamang ang mga pasaherong kanilang isinasakay.

“Ang naobserbahan po natin for these past days na nag-Alert Level 1 tayo, beyond 100% capacity po ang naipapatupad, wala pong nag-e-enforce, walang nagmo-monitor, katulad sa mga bus, lahat dapat nakaupo, wala na pong nakatayo para hindi masyadong siksikan,” diin ni Vergeire.