Palpak sa mga operasyon.. Lahat ng pulis, balik-training

ni Mai Ancheta @News | August 15, 2023

Dapat isailalim sa retraining ang buong puwersa ng Philippine National Police (PNP).

Ito ang iginiit ng Commission on Human Rights (CHR) matapos ang palpak na operasyon ng Navotas City Police na nagresulta sa pagkamatay ng 17-anyos na si Jemboy Baltazar dahil sa mistaken identity.

Ayon kay CHR Chairperson Richard Palpal-latoc, hindi sapat na isailalim lamang sa refresher course ang buong puwersa ng Navotas Police kundi dapat buong puwersa ng PNP upang hindi na maulit ang ganitong kapalpakan na ang nabibiktima ay mga inosenteng mamamayan.

Mayroon aniyang ibinibigay na training sa PNP patungkol sa human rights at kung susundin ito nang tama ay maiiwasan ang mga ganitong pangyayari.

Matatandaang binaril at napatay ang biktimang si Baltazar matapos mapagkamalan umanong suspek sa target na operasyon ng Navotas Police.

Iginiit din ni Palpal-latoc ang paggamit ng body camera ng mga pulis upang madokumento ang kanilang mga ginagawa sa operasyon na hindi ginawa umano ng Navotas Police sa naganap na insidente.

Mga pulis sa airport, dagdagan vs. human trafficking

ni Madel Moratillo @News | July 22, 2023

Kinalampag ni Immigration Commissioner Norman Tansingco ang mga pulis na nakatalaga sa mga paliparan sa bansa na maging mapagmatyag laban sa human trafficking.

Ayon kay Tansingco, batay na rin sa panayam nila sa mga biktima ng human trafficking, nakukuha nila ang kanilang dokumento sa loob mismo ng bisinidad ng airport.

“Hindi na dapat sila umaabot dito. Bago makarating ng airport ang biktima, ang dami nang pinagdadaanan. Recruited via social media, magbabayaran via wire transfer, tapos mag-aabutan ng pekeng dokumento sa labas ng airport,” pahayag ni Tansingco.

Kailangan aniyang buksan ng mga awtoridad ang mata para hindi malusutan.

“We all have to open our eyes because it’s happening right under our noses,” dagdag pa ni Tansingco.

Mungkahi niya, palakasin ang presensya ng pulisya sa mga paliparan. Isa lang naman aniya ang modus ng mga ito kaya malamang ay sa iisang lugar lang nagkikita.

Ang paglaban aniya sa human trafficking ay nangangailangan ng whole-of-government approach kaya dapat na magtulungan ang lahat.

Naaadik sa socmed.. Pulis, bawal mag-cellphone

ni Mai Ancheta | May 27, 2023

Bawal na ang panonood ng telebisyon at pagte- text habang naka-duty ang mga pulis sa loob ng police stations sa Metro Manila.

Ito ang inihayag ni Police Major General Edgar Alab Okubo, hepe ng Philippine National Police-National Capital Region Police Office (PNP-NCRPO) upang mas maging epektibo ang paggampan sa tungkulin ng mga pulis sa loob ng presinto, lalo na ang mga desk officers.

Sinabi ni Okubo na nagpalabas sila ng mga tao mula sa Regional Intelligence Division para magpanggap na hihingi ng tulong at natuklasang hindi gaanong naasikaso ang mga ito dahil nakatingin sa telebisyon ang desk officer at madalas nakatingin sa kanilang mobile phone.

Dahil dito, ipinatanggal ng opisyal ang mga television set sa lobby ng police stations, at sa halip ipinalipat ito sa pantry o kusina

Sinabi ni Okubo na karamihan sa mga pulis na nasa loob ng police stations sa NCR ay nakatungo dahil abala sa pagbabasa at pagsagot ng text messages o kaya ay nakatingin sa kanilang social media pages na hindi dapat ginagawa habang naka-duty ang mga ito.

"Minsan napansin n’yo, sa isang grupo ng kapulisan halos nakatungo lahat, 360 degrees, ‘di sila aware sa nangyayari. Delikado ‘yun sa naka-deploy," dagdag ng opisyal.

Dahil dito, sinabi ni Gen. Okubo na papalitan ng mga babaeng police ang lahat ng lalaking desk officers sa Metro Manila dahil mas mahaba ang pasensiya at kakayahang makinig ang mga ito sa mga mamamayang hihingi ng tulong o pag-alalay sa mga otoridad.