Isumbong sa BSP.. P500K multa sa bangko na 'di tumatanggap ng National ID

ni Mylene Alfonso | May 28, 2023

Umapela si Sen. Win Gatchalian sa Bangko Sentral ng Pilipinas (BSP) na paalalahanan ang mga bangko na ang Republic Act 11055 o ang Philippine Identification System Act ay nag-uutos sa kanila na tanggapin o kilalanin ang national ID bilang sapat na patunay ng pagkakakilanlan ng taong gumagawa ng transaksyon.

Sinumang tumanggi, aniya, ay pagmumultahin ng P500,000.

Ginawa ni Gatchalian ang panawagan sa gitna ng patuloy na mga reklamo na ang ilang bangko ay tumatangging kilalanin ang national ID bilang patunay ng pagkakakilanlan dahil ang card mismo ay walang pirma ng may-ari nito.

Ayon sa senador, malinaw sa Memorandum No. M-2021-057 na ang hindi pagsama ng isang sulat-kamay na lagda bilang bahagi ng Philippine identification (PhilID) ay sinadya at kahalintulad ng national ID system sa ibang bansa tulad ng India, Singapore, Malaysia, Thailand, Vietnam, at iba pa. Layon nitong isulong ang mas higit na seguridad sa mga transaksyon sa pamamagitan ng mas malakas na paraan ng pag-verify at mas mababang panganib ng pamemeke.

Ang pagpapatunay ng pagkakakilanlan ay ginagawa sa pamamagitan ng PhilID physical security features, QR code digital verification, biometric verification, at SMS one-time password (OTP).

"Hindi na kailangan ng ibang valid ID kung ang national ID lang ang dala-dala," sabi ni Gatchalian, na binibigyang-diin na ang national ID ay isang opisyal at sapat na patunay ng pagkakakilanlan.

Hinikayat din ni Gatchalian ang publiko na isumbong sa BSP ang mga bangkong hindi tumanggap ng national ID para sa kanilang bank transactions.

PSA: 10M Pinoy, nakatanggap na ng PhilID cards

ni Lolet Abania | May 19, 2022

Umabot sa mahigit 10 milyon na Philippine Identification (PhilID) cards ang nai-deliver na sa buong bansa, ayon sa Philippine Statistics Authority (PSA).

Sinabi ni PSA Undersecretary Dennis Mapa, National Statistician and Civil Registrar General, nasa 10,548,906 cards o 33.7 percent ng target ngayong taon ay nai-distribute na hanggang Abril 30. “PSA recognizes this milestone as an outcome of our collective efforts with partner agencies and the field offices involved in producing and delivering PhilID cards to our registrants nationwide,” pahayag ni Mapa sa isang statement.

“We are determined to continue to put forth initiatives that will accelerate PhilSys operations across all sectors,” he added. Ayon sa PSA, ang ikatlong step ng PhilSys registration ay ang delivery ng PhilID cards sa mga registrants sa pakikipagtulungan ng Philippine Postal Corporation (Post Office).

Sinabi naman ng ahensiya na katuwang din ang mga field offices para mag-assist sa pagde-deliver ng PhilIDs sa mga registrants na matatagpuan sa mga remote areas sa buong bansa. Kaugnay nito, ang authenticity ng isang PhilID card at ang impormasyon na nilalaman ng QR code ay maaari na ngayong beripikahin sa pamamagitan ng bagong inilunsad na PhilSys Check.

“It is also working on the PhilSys mobile application, which is the digital version of the PhilID that can be used in public and private transactions ahead of the physical ID card,” pahayag pa ng PSA.

“We anticipate for more Filipinos to receive their PhilIDs. Simultaneously, PSA will continue to bring forward PhilSys services to make government and private services easily and conveniently accessible to the public,” sabi pa ni Assistant Secretary Rosalinda Bautista, Deputy National Statistician ng PhilSys Registry Office.

3.13 M tambay na Pinoy noong Pebrero – PSA

ni Lolet Abania | April 7, 2022

Tumaas pa ang bilang ng mga Pilipinong walang trabaho o unemployed nitong Pebrero, sa kabila ng pagluluwag ng mga restriksyon ng panahong iyon, kung saan marami ang naghahanap ng mapapasukan subalit bigong silang makapagtrabaho dahil sa limitado ang bilang naman ng mga negosyong nag-o-operate, batay sa report ng Philippine Statistics Authority (PSA) ngayong Huwebes.

Sa isang virtual conference, ayon kay PSA chief at National Statistician Claire Dennis Mapa, ang bilang ng mga unemployed adults o may mga edad 15 at pataas, nitong Pebrero ay umabot sa 3.13 milyon, na nagre-reflect o katumbas ng unemployment rate na 6.4%.

Mas mataas ito kumpara sa 2.93 milyong walang trabaho na mga indibidwal na nai-record noong Enero, na nagre-reflect naman sa parehong unemployment rate na 6.4% -- ang pinakamababa mula nang peak ng mga pandemic lockdowns noong Abril 2020, na nakapag-record ng all-time high unemployment rate ng 17.6% o 7.3 milyong walang trabaho.

Ang bilang nitong Pebrero ng mga jobless na Pinoy ay mas mababa naman kumpara sa 4.19 milyong unemployed na nai-record noong Pebrero 2021.

Ayon kay Mapa, ang pagluluwag ng mga restriksyon sa Alert Level 2 sa buong Pebrero ay nag-udyok sa marami para maghanap ng kanilang mapapasukan habang ang labor force participation rate – ang percentage ng mga indibidwal na aktibong naghahanap ng trabaho mula sa adult population – ay tumaas ng 63.8% mula sa 60.5% noong Enero.

“We can surmise that the opening of the economy, the easing of restrictions encouraged ang ating mga kababayan na maghanap ng trabaho,” sabi ni Mapa.

Gayunman, sinabi ni Mapa na hindi lahat ng naghanap ng mapapasukan ay nagkaroon ng trabaho.

“Marami ang naghahanap ng trabaho pero hindi sila nakakuha ng trabaho na gusto nila,” saad ni Mapa, kung saan aniya, ang mga naghahanap ng mapapasukan subalit unemployed ay tumaas mula 1.16 milyon noong Enero na naging 1.94 milyon nitong Pebrero.

“Possible reasons are not enough jobs or some are waiting for other opportunities,” dagdag ng opisyal.

Gayunman, ayon sa PSA chief, kabilang sa mga unemployed, na nagsasabing sila ay walang trabaho dahil sa tinatawag na mobility restrictions ay bumaba sa 385,000 nitong Pebrero kumpara sa 813,000 noong Enero.

Sa kabila naman ng pagtaas ng bilang ng mga unemployed Pinoy, ang bilang naman ng mga employed nitong Pebrero ay tumaas ng 45.48 milyon mula sa 43.02 milyon noong Enero, ayon pa kay Mapa.