Sa overpriced pandemic supplies... Gobyerno, nakipag-deal sa mga wanted sa Taiwan — Hontiveros

ni Jasmin Joy Evangelista | September 2, 2021

Ibinunyag ni Sen. Risa Hontiveros na wanted umano sa Taiwan ang mga tao sa likod ng kumpanyang Pharmally na ginawaran ng pamahalaan ng bilyun-bilyong halaga ng kontrata para sa samu't saring pandemic supplies noong 2020, na sinasabi namang overpriced.

"Why is this government transacting with fugitives? Bakit tayo nakikipagnegosyo sa mga taong may warrant of arrest pa nga sa ibang bansa?" tanong ni Sen. Risa Hontiveros.

Kung nag-research lang daw sana tungkol sa Pharmally si dating Budget undersecretary Lloyd Christopher Lao, makikita sa mismong website ng Ministry of Justice-Investigation Bureau ng Taiwan na wanted doon si Huang Wen Lie o Tony Huang, chairman ng Pharmally International Holdings, dahil umano sa pandaraya, pagmamanipula ng stocks, at pandarambong.

Dagdag pa ng senadora, ang anak ni Lie na si Huang Tzu Yen na incorporator o stockholder naman ng Pharmally Pharmaceutical Corp. at Pharmally Biological Inc. ay wanted din daw dahil sa stock manipulation.

Lumabas din ang mga pangalang Rose Lin at Gerald Cruz bilang incorporators ng Pharmally Group of Companies at Full Win. Si Michael Yang na kaibigan ni Pangulong Rodrigo Duterte ay nakaupo sa Full Win Philippines, at dating presidential adviser on economic affairs.

"Bakit hindi ito naamoy man lang ng ating mga awtoridad? Publicly available ang mga impormasyong ito," ani Hontiveros.

Mabilis namang itinanggi ng Malacañang ang mga pahayag ni Hontiveros.

"Ultimately, it's the price and the specification that matters. Sa presyo po ang labanan, kahit sino ka man... Wala pong kinalaman ang mga personalidad, ang tiningnan, presyo at saka 'yung kalidad," ani Presidential spokesman Harry Roque.

MECQ, extended hanggang Setyembre 7 — Roque

ni Ronalyn Seminiano Reonico | August 28, 2021

Mananatili sa ilalim ng modified enhanced community quarantine (MECQ) ang National Capital Region (NCR) hanggang sa Setyembre 7, ayon kay Presidential Spokesperson Harry Roque ngayong Sabado.

Saad pa ni Roque, “The Inter-Agency Task Force (IATF) retained the MECQ status of the NCR.”

Bukod sa NCR, mananatili rin sa MECQ ang mga sumusunod na lugar sa Luzon: Apayao, Ilocos Norte, Bulacan, Bataan, Cavite, Lucena City, Rizal at Laguna.

Sa Visayas naman, MECQ din ang paiiralin sa mga sumusunod na lugar: Aklan, Iloilo Province, Iloilo City, Lapu-Lapu City, Cebu City, at Mandaue City.

Ang Cagayan de Oro City naman sa Mindanao ay isasailalim din sa MECQ, ayon kay Roque.

Saad pa ni Roque, “This latest community quarantine classification shall take effect beginning September 1 until September 7, 2021, pending a change in community quarantine guidelines.”

P-Duterte, tatakbong VP sa 2022 — PDP-Laban

ni Lolet Abania | August 24, 2021

Tinanggap na ni Pangulong Rodrigo Duterte ang isinusulong ng PDP-Laban na tumakbo siya bilang vice-president para sa 2022 elections, ayon mismo sa partido ngayong Martes.

“President Duterte agreed to make the sacrifice, heed the clamor of the people, and accepted the endorsement of PDP-Laban party for him to run as Vice-President in the 2022 national elections,” ayon sa pahayag ng PDP-Laban.

Ang statement ay pinirmahan ni Cabinet Secretary Karlo Nograles na executive vice-president ng PDP-Laban.

Wala pang kumpirmasyon ang Malacañang hinggil dito, subalit sa isang press briefing, sinabi ni Presidential Spokesperson Harry Roque na mag-aanunsiyo si Pangulong Duterte sa kanyang Address to the Nation ngayong Martes nang gabi.

Ayon kay Roque, ang Punong Ehekutibo ay nakipagpulong kay PDP-Laban President at Department of Energy Secretary Alfonso Cusi nitong Lunes nang gabi.