Mga mangingisda, magra-rally sa SONA.. Grado ni P-BBM, bagsak

ni Madel Moratillo @News | July 24, 2023

Bagsak na grado ang ibinigay ng grupo ng mga magsasaka kay Pangulong Ferdinand Marcos, Jr., kasabay ng kanyang ikalawang State of the Nation Address (SONA).

Sa isang street conference ng grupong Pamalakaya o Pambansang Lakas ng Kilusang Mamamalakaya ng Pilipinas, binanggit nila ang kabiguan ng Marcos administration na tugunan ang problema ng mga nasa sektor ng pangingisda maging ang reclamation ng mga dagat. Katunayan anila, nasa 21 reclamation projects na ang naaprubahan at nabigyan ng environmental compliance certificate sa Manila Bay.

Nanawagan naman sila sa gobyerno ng 15 libong pisong subsidy para sa gasolina ng kanilang mga bangkang pangisda. Sasali rin umano sila sa gagawing kilos-protesta sa SONA ng Pangulo ngayong araw.

Samantala, ang mga vendor naman na nagtitinda sa Commonwealth market sa Quezon City, nanawagan sa Pangulo na pababain ang presyo ng bigas.

Gustuhin man umano nilang mapababa ang presyong ipinapasa sa mga customer, wala rin silang magawa dahil mahal ang kuha nila sa supplier.

Panawagan din ng mga vendor kay P-BBM na tutukan ang inflation. Marami na umano ang umaaray dahil sa sobrang taas ng mga bilihin.

Pramis na P20 na bigas, wala pa.. Ginagawa namin ang lahat — Marcos

ni Mylene Alfonso @News | July 18, 2023

Iginiit ni Pangulong Ferdinand Marcos, Jr. na ginagawa na ng kanyang administrasyon ang lahat upang matupad ang kanyang pangako sa kampanya na ibaba ang presyo ng bigas sa P20 kada kilo.

"Iyong ating hangarin na 20 pesos na bigas [kada kilo] eh wala pa tayo roon, pero ginagawa natin ang lahat," wika ni Marcos sa kanyang talumpati sa nationwide launching kahapon ng Kadiwa ng Pangulo program sa San Fernando City, Pampanga.

"Ang programa ng Kadiwa ay napakasimple lamang... [Ang] ginagawa natin ay pinapalapit natin sa magsasaka ang palengke. Kaya iyang mga middleman at added cost ay binabawasan natin nang husto iyan," ayon pa sa Pangulo.

Nabatid din na layunin ng proyekto na mabigyan ng direktang mapagbebentahan ng kani-kanilang produkto ang mga magsasaka, mangingisda at maging ang mga micro, small, and medium enterprises (MSMEs).

‘Di lang sa OOTD.. P-BBM, problemado sa speech sa SONA

ni Mylene Alfonso @News | July 18, 2023

Halos isang linggo na lamang bago ang kanyang ikalawang State of the Nation Address (SONA), inamin ni Pangulong Ferdinand Marcos, Jr., na “nag-aalala” siya sa pagbuo ng kanyang talumpati sa darating na Lunes, Hulyo 24.

Kaugnay nito, nabanggit din ni Marcos na wala pa rin siyang naiisip kung ano ang kanyang susuotin sa ikalawang SONA na gaganapin sa House of Representatives.

“SONA preparations, hindi ko pa naisip kung ano ang susuotin ko. We’ve been worried about writing the speech,” ani Marcos sa ambush interview sa San Fernando City, Pampanga nang tanungin kung ano na ang kanyang preparasyon sa nalalapit na SONA.

Gayunman, sinabi ng Pangulo na inaasahang ihahayag niya ang mga nagawa ng kanyang administrasyon sa loob ng isang taon.

“It’s really very simple. It’s just a performance report for Filipinos to see sa dami ng mga pronouncements, sa dami ng mga salita, kung ito ba ay talagang may kabuluhan, salita lamang,” ayon pa sa Pangulo.

“We’ll see. That’s what I want to explain to people, that we have made significant progress. We can see the difference now, not only in terms of how the systems work, how the government works, it is also how we are seen or judged in the international community. That’s equally important,” pagtatapos ng Punong Ehekutibo.