Granadang walang pin, iniwan sa harap ng broadsheet newspaper company

ni Lolet Abania | July 18, 2021

Isang granada na wala nang pin ang natagpuan ng mga awtoridad mula sa isang kahoy na kariton sa Port Area, Manila ngayong Linggo nang umaga.

Sa report, pasado alas-9:00 ng umaga nakita ang granada sa loob ng kariton na nakaparada sa harapan mismo ng opisina ng pahayagang “The Philippine Star.”

Agad na nilagyan ng pulisya ng kordon at na-secure ang area sa 13th Street at Railroad Street sa Port Area. Ayon kay Police Colonel Robert Domingo, hepe ng Port Area Station ng Manila Police District (MPD), nakita na lang ng may-ari ng cart at isang pedicab driver ang granada na wala na itong pin.

Mabilis namang rumesponde ang mga operatiba ng Explosives and Ordnance Division ng MPD at ang Philippine Coast Guard sa lugar dahil sa insidente. Inialis nila ang kariton sa lugar habang dinala ito sa kalayuan saka nila nai-detonate ang hand grenade.

Inaalam na ng pulisya kung may kaugnayan ito sa naganap na pag-aresto sa isang indibidwal isang oras bago nadiskubre ang granada. Isang lalaki ang nadakip malapit sa lugar matapos na ang kanyang live-in partner ay magsumbong sa mga pulis na siya ay pisikal na sinasaktan at ang kanyang cellphone ay ninakaw. Nakuha sa lalaki ang sinasabing cellphone at isang granada.

P20.37 M ipinuslit na yosi, nasabat ng BOC

ni Ronalyn Seminiano Reonico | May 9, 2021

Nasabat ng Bureau of Customs (BOC) Port of Manila (POM) noong May 7 ang 40-footer container ng misdeclared cigarettes na tinatayang aabot sa halagang P20.37 million.

Ayon sa BOC noong Sabado, idineklarang paper products ang laman ng naturang container na dumating sa Port of Manila noong May 2 na nagmula sa China, “consigned to Micastar Consumer Goods Trading.” Saad ng BOC, “The Office of the District Collector placed the shipment on hold and for examination on suspicion that the subject shipment contained misdeclared and/or prohibited items.”

“Customs Intelligence and Investigation Service further substantiated the information, thus resulting in the issuance of an Alert Order on May 4, 2021, and the conduct of a 100% physical examination on May 6, 2021.” Sa examination, natagpuan ng BOC ang P20.37 million halaga ng misdeclared Fortune brand cigarettes, taliwas sa idineklarang laman ng naturang shipment.

Naglabas naman ng Warrant of Seizure and Detention si District Collector Michael Angelo Vargas laban sa shipment dahil sa paglabag sa Section 1400 “‘Misdeclaration, Misclassification, and Undervaluation in Goods Declaration’ in relation to Section 1113 ‘Property Subject Seizure and Forfeiture’ of the Customs Modernization and Tariff Act (CMTA).”