Parak, drug suspect, patay sa engkuwentro

ni Lolet Abania | December 30, 2020

Patay ang isang police officer at isang drug suspect matapos ang naganap na engkuwentro sa Caloocan City, ayon sa Philippine National Police (PNP) ngayong Miyerkules.

Kinilala ang nasawing pulis na si Police Corporal Dexter Rey Teves, nakatalaga sa Caloocan City Police Station.

Ayon sa PNP, pinara at sinita nina Teves at Police Corporal Rex Abraham Abigan ang dalawang lalaki na magkaangkas sa motorsiklo dahil sa walang suot na helmet sa Barangay 167.

Nang hingin ng mga pulis ang dokumento ng motorsiklo, isa sa dalawang suspek, na kinilalang si Mark Gil “Macoy” Toreda ang bumunot ng baril at ipinutok sa kanila na tumama kay Teves.

Agad namang inagaw ni Abigan ang baril ng suspek subalit tinamaan din siya sa kanang paa.

Nang marinig ang mga putok ng baril, agad na rumesponde ang duty police officer na si Police Staff Sergeant Christopher Anos sa lugar at binalikan ng putok ang dalawang suspek kung saan tinamaan si Toreda na naging dahilan ng pagkamatay nito.

Sinubukang tumakas ng kasama ni Toreda na si Clark Castillo, subalit nahuli siya ng mga bystanders.

Dinala ang dalawang pulis sa Novaliches General Hospital subalit idineklarang dead-on-arrival si Teves ng mga doktor.

Nakumpiska sa mga suspek ang isang caliber 9mm pistol, isang MK2 fragmentation hand grenade, anim na piraso ng heat-sealed plastic na naglalaman ng hinihinalang shabu at P3,500 cash.

Tiniyak naman ni PNP chief Police General Debold Sinas na pagkakalooban ng suportang pinansiyal ang pamilya ng namatay na si Teves, gayundin, ang nasugatang si Abigan.

Call center agent na pumatay sa 2 anak, sumuko na nu’ng Pasko

ni Thea Janica Teh | December 26, 2020

Sumuko nitong Kapaskuhan sa Taguig City Police ang isang lalaking pumatay sa dalawa nitong anak isang araw matapos ang pagkamatay ng kanyang asawa.

Kinilala ang suspek na si Aiko Siancunco, 28-anyos na pumatay sa 3-anyos na anak na babae at 1-anyos na anak na lalaki sa kanilang bahay sa Barangay North Signal. Ayon kay City Police Chief Col. Celso Rodriguez, puno umano ng dugo ang puting t-shirt ng suspek noong ito ay sumuko.

Kuwento pa ni Rodriguez, sumuko umano si Siancunco matapos nitong mapigilan ang pagtangkang pagbibigti. Agad na pinuntahan ng mga pulis ang bahay ng suspek at nakita ang labi ng dalawa nitong anak sa kama.

Sa isang pahayag, napag-alamang nagtrabaho bilang call center agent si Siancunco at ang asawa nito. Matagal na umanong nagtatalo ang dalawa dahil nahihirapang maghanap ng trabaho simula nang ipatupad ang lockdown noong Marso dahil sa COVID-19. Sa ngayon ay nahaharap sa kasong parricide ang suspek.

P2-M shabu nasabat, 1 arestado

ni Lolet Abania | December 24, 2020

Nakasabat ang awtoridad ng P2 million halaga ng hinihinalang shabu sa isinagawang anti-illegal drugs operation sa Zamboanga City kagabi.

Ayon sa Philippine National Police (PNP), naganap ang operasyon sa Barangay Kasanyangan at dito naaresto si Fahad Werble, 20-anyos, na nasa watchlist ng pulisya bilang isang high-value target.

Nakumpiska sa suspek ang isang plastic pack na naglalaman ng hinihinalang shabu, 5 pakete ng plastic sachets na naglalaman din ng hinihinalang shabu sa tinatayang halaga na P2 million na humigit-kumulang na 280 gramo, pera, isang blue pouch, at ilang boodle money.

Nasa kustodiya na ng pulisya ang suspek at nahaharap sa kasong kriminal dahil sa umano’y paglabag nito sa Republic Act 9165 o Comprehensive Dangerous Drugs Act of 2002.