ni Lolet Abania | September 19, 2021
Umabot na sa 38,219 ang kabuuang COVID-19 cases sa Philippine National Police matapos na makapagtala ng 162 bagong kaso ng infection sa kanilang hanay ngayong Linggo.
Gayunman, may kabuuang 35,495 na PNP naman ang gumaling makaraang 170 ang nadagdag sa kapulisan na nakarekober sa virus.
Nananatili pa ring nasa 113 ang nasawi dahil sa coronavirus sa kanilang organisasyon.
Sa ngayon, mayroon pang 2,611 active COVID-19 cases sa pulisya.
ni Jasmin Joy Evangelista | September 19, 2021
Halos 37,000 ang nahuling violators ng minimum public health standards sa Metro Manila sa unang tatlong araw ng pagpapatupad ng alert levels at granular lockdowns, ayon sa Philippine National Police.
Sa 36, 854 na nahuli, kalahati sa mga ito ang binigyan lamang ng warning, habang 44% ang pinagmulta at ang iba ay dinala sa presinto para sa mga kasong kinahaharap.
"Ang bilin natin sa ating mga pulis, instead na magsagawa ng checkpoint operations doon sa mga boundary, mas i-focus natin ang deployment kung saan nagtitipon-tipon ang ating mga kababayan," ayon kay PNP chief Gen. Guillermo Eleazar.
93 areas sa 38 barangays sa 6 na siyudad ang isinailalim sa granular lockdown, dagdag niya.
Matatandaang sinimulan ng gobyerno noong Setyembre 16 ang pilot implementation ng bagong 5-level alert mechanism kasabay ng granular lock downs upang maiwasan ang patuloy na pataas ng kaso ng COVID-19.
As of Saturday, nakapagtala ang Pilipinas ng total na 2,347,550 confirmed COVID-19 cases, kung saan 184,088 ang nananatiling aktibo.
ni Lolet Abania | September 18, 2021
Nasagip ang nasa 11 kakaibahan mula sa dalawang spa na nag-aalok umano ng “extra service” sa Antipolo City.
Ayon sa lokal na pamahalaan ng Antipolo City, magkasabay ang Philippine National Police (PNP) Women and Children Protection Center (WCPC) at ng city social workers na ni-raid ang Nitzi Touch Massage Spa at Miyuto Spa sa Barangay Mayamot.
Agad na ikinasa ng mga awtoridad ang operasyon matapos na mabatid na nag-aalok umano ang dalawang spa ng “extra service” sa halagang P2,000 sa mga kustomer bukod pa sa pagmamasahe.
Anim sa mga na-rescue na babaeng massage therapist ay residente ng Quezon City habang ang lima ay pawang taga-Antipolo.
Dinala na sa Camp Crame sa Quezon City ang mga babae at patuloy na iniimbestigahan.
Isinailalim naman ang mga ito sa assessment ng social worker para matukoy kung kinakailangan silang ipasok sa isang shelter o ibabalik na lamang sa kani-kanilang pamilya habang bibigyan din ng tulong pangkabuhayan.
