1,899 police offc’ls, magsisilbing bantay sa media sa 2022 elections

ni Lolet Abania | January 21, 2022

Aabot sa 1,899 mga opisyal ng pulisya ang nakatakdang magsilbi bilang “media security vanguards” na tututok sa tinatawag na threats at security problems ng mga mamamahayag sa 2022 election period, ayon sa Philippine National Police (PNP).

Sinabi ni PNP spokesperson at public information office (PIO) chief Police Brigadier General Roderick Alba na siya ang tatayong focal person sa national level.

“We are total strong of 1,899,” ani Alba sa ginanap na launching ng “Media Security Vanguards” program ng Presidential Task Force of Media Security (PTFoMS) ngayong Biyernes.

Ayon kay Alba, ang mga regional PIO chiefs ang magsisilbing focal persons sa regional level.

Sa kasalukuyan aniya, ang PNP ay mayroong 133 public information offices sa police regional, regional, at city offices sa buong bansa.

Binanggit din ni Alba na may kabuuang 1,766 hepe ng pulisya sa bansa, na siyang magiging operating arms naman ng “Media Security Vanguards” sa darating na eleksyon.

Paliwanag ni Alba, ang mga focal persons ang magpa-facilitate, magmo-monitor, at magtatrabaho kasama ang PTFoMS, habang ang mga hepe ng pulisya ang magpapatupad ng direktiba ng mga focal persons na manggagaling kay PNP chief Police General Dionardo Carlos.

“Our job is to facilitate appropriate police actions on issues including media security in the 2022 elections,” sabi ni Alba.

Ani Alba, sakaling ang mga media workers ay may mga concerns gaya ng mga pagbabanta laban sa kanila, maaari silang makipag-ugnayan sa mga focal persons mula sa PNP para agad na maresolbahan ang tungkol dito.

Sa tanong kung ang nasabing programa ay makapagbibigay ng security details sa media workers na nasa ilalim ng pagbabanta, ayon kay PTFoMS executive director Joel Sy Egco, maaaring mag-request ang task force para rito.

“Kapag may ganyang report, ibato niyo agad sa amin. Kami na po magre-request if we need to provide protection, security details until mag-dissipate ‘yung threat.

We do that,” sabi ni Egco na naroon din sa launching ng “Media Security Vanguards.”

64, arestado sa paglabag sa 2022 elections gun ban ng PNP

ni Lolet Abania | January 13, 2022

Nasa kabuuang 64 indibidwal na ang naaresto ng Philippine National Police (PNP) dahil sa paglabag ng mga ito sa ipinatutupad na 2022 elections gun ban sa bansa.

Base sa latest data hanggang nitong Huwebes, arestado ng PNP ang 24 mga bagong violators, kung saan lahat sila ay civilians.

Nakakumpiska naman ang pulisya ng walong firearms, 43 ammunition, anim na deadly weapons, at dalawang iba pang items sa 2,584 checkpoints sa buong bansa.

Ayon sa PNP, ang mga bagong violators ay mula sa Quezon City, Antipolo, Pasay, Pasig, Dasmariñas, Tarlac, Saranggani, Masbate, Lipa, Cebu, Olongapo, Negros Occidental, Bulacan, Zamboanga, at Abra.

Matatandaang nag-isyu ang Commission on Election (Comelec) ng Resolution No. 10728 kung saan nakasaad, “prohibits the bearing, carrying, or transporting of firearms or deadly weapons outside residence and in all public places”, mula ito Enero 9 hanggang Hunyo 8.

Ang mga law enforcers lamang ang exempted sa gun ban hangga’t mayroon silang authorization mula sa Comelec at nakasuot ng kanilang agency-prescribed uniform habang isinasagawa ang kanilang official duty sa panahon ng election period.

Una nang umapela ang PNP sa publiko na kanilang sundin ang resolusyon ng Comelec hinggil sa mga baril at deadly weapons sa panahon ng halalan.

Ayon pa sa PNP, ang mga violators ay posibleng maharap sa pagkakakulong ng hindi bababa sa isang taon subalit hindi hihigit sa anim na taon at hindi rin subject sa probation.

Gayundin, ang guilty party ay maaari ring maharap sa disqualification na humawak ng anumang public office, deprivation ng right of suffrage at kanselasyon o perpetual disqualification para makakuha ng gun license.

PNP spox Alba, may COVID-19

ni Lolet Abania | January 11, 2022

Nagpositibo si Philippine National Police (PNP) spokesperson Police Colonel Roderick Alba sa test sa COVID-19.

Ayon kay Alba ang resulta ng kanyang COVID-19 test ay lumabas lamang nitong Lunes ng gabi.

Aniya, “I tested positive for COVID-19, report from the Health Service just came out now.”

Sinabi ng opisyal na nakararamdam siya ng flu symptoms, dry cough, runny nose na mayroong plema at pananakit ng katawan.

Binanggit din ni Alba na sasailalim siya sa quarantine sa Kiangan Emergency and Treatment Facility sa Camp Crame.

“I am now focusing on my immediate recovery,” saad ni Alba. Matatandaang noong nakaraang linggo, kinumpirma ni PNP chief Police General Dionardo Carlos na siya rin ay nagpositibo sa COVID-19.

Si Carlos at kanyang close-in security, at staff ay sumailalim sa RT-PCR tests ng Linggo matapos na ang tauhan niya ay magkaroon ng lagnat at makaramdam ng panginginig.

Bukod pa sa kanya, ang duty driver niya at aide ay nagpositibo na rin sa test sa COVID-19. Sa ngayon, nakapagtala na ng kabuuang 43,992, kung saan 537 ang bagong kaso ng impeksyon sa hanay ng kapulisan.