Tine-testing pa lang kasi… COVID-19 vaccines, 'di for sale — Roque

ni Lolet Abania | May 18, 2021

Hindi ipinagbibili ang mga COVID-19 vaccines sa Pilipinas, ayon kay Presidential Spokesperson Harry Roque.

Ito ang nilinaw ni Roque matapos na ianunsiyo ni Philippine Red Cross (PRC) chairperson Senator Richard Gordon na ang PRC ay maniningil ng P3,500 para sa dalawang doses ng Moderna vaccine.

Gayunman, ipinaliwanag ng PRC na hindi ito para magbenta ng bakuna sa kanilang mga miyembro at donors kundi bayad ang P3,500 sa mga syringes, personal protective equipment, mga pagkain, at iba pang gastusin na may kaugnayan sa vaccination.

"Ang pangako po ni Presidente, ibibigay ang bakuna nang libre. Babayaran po ito ng ating gobyerno," ani Roque sa isang Palace briefing ngayong Martes.

Ayon sa kalihim, ang mga COVID-19 vaccines na kinuha ng private sector sa ilalim ng isang tripartite agreement kasama ang gobyerno ay gagamitin ng mga pribadong kumpanya para sa kanilang mga empleyado. "Wala pong dapat magbenta [ng bakuna] kasi wala pa pong general use authority ang kahit anong brand ng bakuna," sabi ni Roque.

Ang mayroon pa lamang ay emergency use authority (EUA) na isang garantiya kung saan ang bakuna ay ligtas at ang efficacy nito ay mula sa Food and Drug Administration (FDA).

Gayundin, ang EUA ay hindi nagbibigay ng awtorisasyon para sa commercial sale dahil lahat ng COVID-19 vaccines ay patuloy pa ring sumasailalim sa human trials.

Ang FDA ay nagbigay na ng emergency use authority sa mga vaccine brands tulad ng Pfizer-BioNTech, AstraZeneca, Sinovac, Sputnik V, Janssen, Covaxin, at Moderna.

Sa mga ito, ang Janssen, Covaxin at Moderna ang hindi pa nai-deliver sa bansa.

Sa ngayon, mayroon na ang bansa ng pitong milyong doses ng COVID-19 vaccine supply. Sa bilang na ito, apat na milyong doses ang nailabas na habang nakapag-administer naman ng 3 milyong doses ng COVID-19 vaccines.

Nadala sa Dengvaxia… Red Cross, game sa Ivermectin trial 'pag aprub na ng FDA

ni Ronalyn Seminiano Reonico | May 7, 2021

Handang magsagawa ng clinical trials ng Ivermectin sa mga isolation facilities ang Philippine Red Cross (PRC) kung pangangasiwaan ito ng pamahalaan, ayon kay Senator Richard Gordon.

Pahayag ni Gordon sa teleradyo interview, “Hindi naman nakamamatay ang Ivermectin, wala pa akong nalaman na namatay.

“Ang naririnig ko, hati-hati ang mga doctor. Ako, ang pakay ko bilang Red Cross, hindi ako gagalaw na walang testing.”

Aniya pa, “Ngayon kung mag-a-Ivermectin tayo, ang gobyerno ang magsasabi kung puwede o hindi dahil sila ang talagang dapat dahil kung magbigay tayo niyan, masisisi.”

Nabanggit din ni Gordon ang nangyari sa kontrobersiyal na Dengvaxia kung saan marami ang namatay sa mga naturukan.

Saad pa ni Gordon, “‘Yung Dengvaxia, minadali ng gobyerno. Marami ang nagalit dahil minadaling pilit.

“Ang nangyari, may namatay kaagad. Meron palang sakit na iba, namatay. At marami nang namatay ulit, eh, di nasisi ‘yung… Ako, hindi ko sinisi ang Dengvaxia, ang sinisi ko, ‘yung nagmamadali tayo at dahil kung hindi mo ite-testing, buhay ng tao ang nakataya riyan. Kaya hihintayin ko ang result.”

Kamakailan ay sinabi ni Department of Science and Technology-Philippine Council for Health Research and Development (DOST-PCHRD) Executive Director Dr. Jaime C. Montoya na pinag-aaralan na ng pamahalaan na gamitin ang mga PRC facilities sa pagsasagawa ng clinical trials.

Saad ni Gordon, “Ngayon ino-offer-an kami ng DOST. Gobyerno na ‘yan. Na kung puwede, 'yung mga nasa isolation namin, subukan ang trials ng Ivermectin.

“Papayag lamang ako niyan ‘pag sinabi ng gobyerno na ‘Ah, sige, pumayag ka.’ At papayag lang ako niyan kung papayag ang tao… dapat informed. So far, hindi pa ako pumapayag. Sa tingin ko, eh, kani-kanyang biyahe ‘yan. Kung gusto mong maniwala ru’n sa gamot… nasa iyo ‘yun, pero dapat, maganda ring matulungan ang gobyerno dahil masyadong malakas ang debate.”

Aniya pa, “Sabi ko, I will consider it first. Papayag lang ako 'pag sinabi ng FDA, ng let’s say mga informed scientists, ‘Sige i-test mo, walang makakasama diyan’ at kung papayag ang tao.

"I will wait for advise… 'Pag science ang kailangan, I always marry the science with the prospective cure. I cannot decide because ang scientist ang nakakaalam. Maraming laboratoryong kailangan, maraming karunungan ang kailangan d'yan na hindi malalaman ng isang abogadong katulad ko.”

Saliva test sa COVID-19, epektibo na, mura pa — PRC

ni Thea Janica Teh | January 4, 2021

Nakapagtala ng 99% detection rate ang saliva test sa halos 1 milyong nagpa-test sa COVID-19 sa United States, ayon sa Philippine Red Cross (PRC) nitong Linggo.

Ayon kay PRC Biomolecular Laboratories Chief Paulyn Ubial, nagpasa na rin umano ang PRC ng sarili nitong saliva test at naghihintay na lamang ng approval mula sa health technology panel ng Department of Health (DOH).

Aniya, “Saliva tests are cheaper and can be done much easier. In the University of Illinois, they have done one million saliva tests and 99 percent detection or concordance rate was recorded.”

Dagdag pa nito, patuloy pa ring magsasagawa ng COVID-19 testing service ang PRC kahit na magsimula na ang national immunization program sa bansa. “When vaccines come, not all would be vaccinated immediately. In fact, they’re saying that only 20 percent of the world’s population can be vaccinated within 2021.

So, they’re looking at up to three years of vaccination for us to achieve herd immunity. That means tests would continue,” ani Ubial.

Una nang ibinahagi ng PRC na naging matagumpay ang saliva test trial nito at naipasa na nila sa DOH kaya naman nag-aabang na lamang sila ng approval mula rito.