Oplan Baklas sa ilegal na campaign materials, inilunsad – PNP

ni Lolet Abania | February 8, 2022

Ipinahayag ng Philippine National Police (PNP) na kanilang babaklasin ang mga campaign materials na nakapaskil sa mga ipinagbabawal na lugar at huhulihin ang sinumang makitang naglalagay ng mga ito.

Sa isang interview ngayong Martes kay PNP spokesperson Police Colonel Jean Fajardo, sinabi nitong magpapatrulya ang kanilang mga police officers sa iba’t ibang lugar para rito.

“Kapag may natyempuhan po tayo ay kailangan po natin silang i-accost at hulihin po dahil ito po ay considered as elections offense,” sabi ni Fajardo.

“Katulad ng ginawa natin noong mga nakaraan election ay mag-o-Oplan Baklas na lang po tayo katuwang po ‘yung ating election officials pati na rin po other authorized agencies,” dagdag niya.

Matatandaang ipinagbawal ng Commission on Elections (Comelec) ang pagpapaskil ng mga election campaign o propaganda material sa labas ng awtorisadong karaniwang poster areas, sa mga pampublikong lugar, o sa mga private properties na walang pahintulot ng may-ari.

Tinukoy naman ng Comelec ang mga public places na pag-aari ng publiko, gaya ng mga electronic announcement boards, motor vehicles, mass public transport na pag-aari ng gobyerno, waiting sheds, sidewalks, mga paaralan, at sa paligid ng mga public transport terminals, kung saan bawal maglagay ng mga campaign materials.

Ang campaign period para sa mga kandidato na tatakbo sa national positions ay nagsimula ngayong Martes, Pebrero 8, habang para sa mga local candidates, ito ay magsisimula sa Marso 25.

Nakatakda ang 2022 national at local elections sa Mayo 9.

605 lugar sa bansa, naka-granular lockdown — PNP

ni Jasmin Joy Evangelista | February 7, 2022

Sa kabila ng pagbaba ng bilang ng kaso ng COVID-19 sa bansa, nadagdagan pa ang mga lugar na isinailalim sa granular lockdown batay sa datos ng Philippine National Police nitong Lunes.

Mula 489 noong Sabado, umangat ito sa 590 nitong Linggo at ngayong Lunes ay 605 na ang naitalang bilang ng mga lugar na naka-granular lockdown.

Ang granular lockdown ay ang localized community lockdowns sa mga lugar kung saan hindi papayagang lumabas o pumasok ang mga residente sa loob ng 14 araw o higit pa.

Base sa tala nitong Linggo, 384 dito ay mula sa Cordillera, 130 sa Ilocos, 77 sa Cagayan, 8 sa Mimaropa, at 6 sa National Capital Region, ayon sa PNP.

Samantala nitong Linggo, kabilang din sa naka-granular lockdown ang 105 lugar na ini-report ng Ilocos Region Police Regional Office (PRO), 81 lugar batay sa report ng Ilocos Region Police Regional Office (PRO), 7 mula sa report ng PRO Mimaropa, at isa mula sa report ng PRO Zamboanga Peninsula.

Ayon pa sa PNP, may kabuuang 1,233 indibidwal ang apekto ng mga naturang lockdown.

Batay sa tala nitong Linggo, Feb. 6, ang bansa ay mayroong 126,227 active COVID-19 cases.

Gun ban violators, umabot na sa 567

ni Jasmin Joy Evangelista | February 2, 2022

Umabot na sa 567 ang naaresto dahil sa paglabag sa gun ban matapos makapagtala ng 21 violators kahapon, February 1, ayon sa Philippine National Police (PNP).

Ayon sa PNP, nakumpiska mula sa mga ito ang 21 firearms, 71 ammunition, at 9 deadly weapons.

Ang mga bagong violators ay naaresto sa Quezon City, Manila, Davao City, Bataan, Cagayan, Muntinlupa City, Navotas City, Las Piñas City, Pasig City, Masbate, Laguna, Cebu, San Juan City, Caloocan City, Valenzuela City, at Pasay City.

Nasa kabuuang 3,825 checkpoints ang naka-set up nitong Martes.

Sa ilalim ng Resolution No. 10728, ipinagbabawal ng Commission on Elections (Comelec) ang pagdadala o pagbiyahe ng mga firearms at deadly weapons sa labas ng bakuran at sa lahat ng pampublikong lugar mula January 9 hanggang June 8.

Exempted dito ang mga awtoridad basta sila ay mayroong authorization mula sa Comelec at suot ang agency-prescribed uniform habang nasa duty sa kasagsagan ng election period.