Pasaway sa ECQ, aarestuhin

ni Ronalyn Seminiano Reonico | August 3, 2021

Papairalin ang mas mahigpit na enhanced community quarantine (ECQ) sa Metro Manila simula sa Agosto 6 kumpara sa dating ipinatupad na ECQ restriction, ayon kay Interior and Local Government Secretary Eduardo Año.

Aniya sa isang panayam, huhulihin na rin ang sinumang lalabag sa ipinatutupad na minimum public health standards at magpapakalat din ng mga pulis sa mga mataong lugar. Aniya, “Mas mahigpit tayo ngayong ECQ na 'to.

Ang tawag nga natin hard lockdown… Kung may makikita riyan [na violator], talagang aarestuhin ng ating mga pulis.”

Nilinaw naman ni Año na babalaan muna ang mga violators ngunit kapag hindi pa rin sila sumunod sa awtoridad ay saka sila aarestuhin. Depende rin umano ang magiging penalty base sa ipinatutupad na ordinansa ng nakasasakop na local government unit sa mga violators.

Samantala, inatasan na rin ni Philippine National Police Chief General Guillermo Eleazar ang National Capital Region Police Office (NCRPO) na maging istrikto sa pagpapatupad ng mas mahabang curfew hours sa rehiyon na magsisimula nang alas-8:00 ng gabi hanggang alas-4:00 ng umaga.

Aniya pa, “The strict border control and the longer curfew hours are but some of the necessary interventions to prevent the spread of the Delta variant of COVID-19.”

P1.482 B halaga ng shabu, nakumpiska; 1 patay, 4 Chinese arestado

ni Lolet Abania | August 2, 2021

Umabot sa kabuuang P1.482 bilyon halaga ng hinihinalang shabu ang nakumpiska ng mga awtoridad sa tatlong magkakahiwalay na operasyon sa Quezon City, Valenzuela City, at Balagtas, Bulacan nitong Linggo.

Sa isang statement ngayong Lunes, ayon sa Philippine National Police (PNP), isang suspek ang namatay, habang apat na Chinese ang naaresto sa isinagawang anti-drug operations ng Philippine Drug Enforcement Agency (PDEA).

Sa Quezon City, isang buy-bust operation ang ikinasa sa Magsaysay St., Bgy. San Bartolome sa Novaliches, kung saan 127 kilograms ng shabu na nagkakahalaga ng P863.6 milyon ang nakumpiska ng mga pulis.

Kinilala ang mga nadakip na suspek na sina Willie Lu Tan o Chen Bien, Anton Wong o Wang Zhong Chun, at Wang Min. Sa Valenzuela City, nasamsam ng mga awtoridad ang humigit-kumulang sa 16 kilograms ng shabu na nagkakahalaga ng P108.8 milyon sa isang operasyon sa harapan ng isang sangay ng China Bank Savings sa kahabaan ng General Luis St., sa Paso de Blas. Inaresto ang suspek na si Joseph Dy.

Sa Balagtas, Bulacan, kinilala ng PNP ang namatay na suspek na si Wu Zishen matapos ang naganap na shootout sa naganap na operasyon sa Barangay Santol. Narekober mula sa suspek ang tinatayang 75 kilograms ng shabu na P510 milyon ang halaga at isang Colt .45 pistol.

Ayon kay PNP chief Police General Guillermo Eleazar, patuloy ang kanilang isasagawang operasyon habang nangangalap ng intelligence report upang mahuli ang mga lider ng drug syndicates at madakip ang iba pang salarin.

106 bagong kaso ng COVID sa mga pulis

ni Ronalyn Seminiano Reonico | July 31, 2021

Nakapagtala ang Philippine National Police (PNP) ng 106 bagong kaso ng COVID-19 ngayong Sabado.

Sa kabuuang bilang ay umabot na sa 30,434 ang kaso ng COVID-19 sa hanay ng mga pulis kung saan 1,144 ang active cases.

Umabot naman sa 29,206 ang bilang ng mga gumaling na matapos maitala ang karagdagang 49 recoveries ngayong araw.

Samantala, may dalawang nadagdag sa bilang ng mga nasawi at sa kabuuan ay pumalo na sa 84 ang death toll.

Saad naman ni PNP Chief Gen. Guillermo Eleazar, "Lubos po akong nakikiramay sa pamilya ng ating mga namatay na pulis at anuman pong tulong na aming makakaya ay amin pong ipaaabot sa inyo."