P4.2 M COVID-19 rapid test kits, ilegal na ibinebenta online, nasamsam

ni Lolet Abania | August 18, 2021

Nakasamsam ang mga awtoridad ng P4.2 milyong halaga ng mga COVID-19 rapid test kits sa isang operasyon sa Pasig City kahapon, ayon sa Philippine Air Force (PAF).

Sa isang statement na inisyu ng PAF ngayong Miyerkules, nasabat ng kanilang mga ahente at mga operatiba ng Quezon City District Field Unit-Criminal Investigation and Detection Group (QCDFU-CIDG) ang 21,000 Konsung brand na COVID-19 Rapid Test Kits sa isinagawang operasyon nitong Martes.

Ayon pa sa PAF, apat na lalaki ang inaresto sa umano’y ilegal na pagbebenta ng mga test kits online. Dinala ang mga suspek sa QCDFU-CIDG habang nahaharap sa kasong paglabag sa FDA Act of 2009 in relation to FDA Advisory No. 2020-016 o ang Prohibition of Online Selling of FDA Certified COVID-19 Antibody Test Kits.

“Rest assured, the PAF will continue to work hand-in-hand with different government units to apprehend individuals who are illegally selling COVID-19 Rapid Test Kits,” pahayag ng PAF.

Imbestigasyon sa black box ng bumagsak na C-130 airplane, aabutin ng 1 buwan

ni Ronalyn Seminiano Reonico | July 10, 2021

Aabutin ng isang buwan ang pag-aanalisa sa black box o flight data recorder ng bumagsak na C-130 aircraft ng Philippine Air Force (PAF), ayon sa opisyal ng ahensiya.

Umabot sa 52 ang nasawi kabilang ang 49 sundalo at tatlong sibilyan sa pagbagsak ng C-130 plane sa Sulu noong Linggo.

Saad ni PAF Spokesperson Col. Meynard Mariano sa isinagawang press briefing, "About isang buwan ang hihintayin natin for the black box to be analyzed.

"Ia-analyze at maghihintay ng kaunting panahon. It is too early to say kung ano ang nangyari sa incident, pero we are doing everything to fast track the investigation.”

Aniya pa, "Lahat ng anggulo, tinitingnan ng imbestigador. Masasabi ko na ang ating recovery ay 100 percent na. Ang gagawin natin is isasakay sa Navy vessel ang parte ng eroplano sa Mactan at ire-repair, i-reconstruct at titingnan natin ang events sa eroplano.”

Black box ng bumagsak na eroplano, paiimbestigahan sa US

ni Lolet Abania | July 7, 2021

Nakatakdang ipadala ng Armed Forces of the Philippines sa United States ang black box o flight data recorder ng Philippine Air Force (PAF) C-130 plane na bumagsak sa Sulu nitong Linggo upang makatulong sa imbestigasyon sa insidente.

“Hawak na nila (mga imbestigador ang black box) subalit wala tayong kakayahan locally na buksan at tingnan kung ano ‘yung nilalaman. Ipapadala natin ito sa Amerika,” ani AFP Chief General Cirilito Sobejana sa isang interview ngayong Miyerkules.

“Nakausap na rin natin ‘yung counterpart. Sila naman ay nag-commit na kung matatanggap na nila ay bubuksan nila kaagad upang basahin kung ano ang nilalaman nito at ipasa kaagad sa atin para makatulong nang malaki sa pag-imbestiga kung ano ang sanhi ng pagbagsak ng C-130,” dagdag ni Sobejana.

Ang C-130 plane na nanggaling sa Cagayan de Oro City at magdadala sa mga tropa ng militar sa Sulu ay bumagsak bago magtanghali nitong Linggo matapos na mawala sa runway ang eroplano sa Barangay Bangkal, Patikul, Sulu.

Limampung mga sundalo at 3 sibilyan ang namatay habang 46 servicemen at 4 na sibilyan naman ang nasugatan. Kaugnay nito, sinabi ni Sobejana na 16 sa 50 sundalo na namatay sa pagbagsak ng eroplano ay nakilala na. Gayundin, ang black box ay narekober na sa naturang lugar.

Una nang sinabi ni Sobejana na ang mga pag-uusap at naging sitwasyon bago ang pagbagsak ay mare-retrieve mula sa black box na makakatulong upang malaman ang naging sanhi ng insidente. “Malalaman natin kung ano ‘yung magiging conversation doon sa cockpit,” saad ni Sobejana.

Nilinaw ng AFP nitong Lunes na wala namang naganap na foul play sa insidente. Kahapon, itinanggi naman ng PAF ang espekulasyong nagkaroon ng overloading sa mga pasahero ng naturang eroplano.

Ayon pa kay Sobejana, nais ni Pangulong Rodrigo Duterte na ang nasabing insidente ang huling magaganap na pagbagsak na kasasangkutan ng military aircraft. “Very clear po ang instruction ng ating Presidente na, our air assets and other military equipment should be in good shape all the time, and you cannot afford to have similar incident in the future. That (C-130 crash) should be the last,” sabi ng opisyal.