Sputnik V at Pfizer vaccines, darating next week

ni Lolet Abania | April 22, 2021

Darating sa bansa ang COVID-19 vaccines na gawa ng Gamaleya Research Institute ng Russia at Pfizer simula sa susunod na linggo, ayon sa deputy chief implementer against COVID-19 na si Secretary Carlito Galvez, Jr..

Sa isang news conference sa Palasyo ngayong Huwebes, sinabi ni Galvez na inisyal na 15,000 Sputnik V doses ang inaasahang darating sa April 25, habang ang susunod na batch na 480,000 doses ay ipadadala sa bansa sa April 29, kasabay din ng 500,000 Sinovac doses.

Ayon pa kay Galvez, ang 195,000 doses ng Pfizer vaccine mula sa COVAX Facility ay darating sa katapusan ng buwan.

Nakatakda namang magbakuna sa mga mamamayan nang 1 hanggang 2 milyong Sputnik V shot sa Mayo at 2 milyon naman sa Hunyo.

Sinabi rin ni Galvez na inaasahang dumating ang inisyal na 194,000 doses ng Moderna vaccine sa Mayo.

Samantala, aabot na sa 1.4 milyong Pinoy ang nabakunahan kontra COVID-19 nang simulan ang mass immunization campaign noong Marso 1, ayon sa datos ng gobyerno.

Naturukan ng Covid vaccine na namuo ang dugo, mahigit 300 na

ni Mary Gutierrez Almirañez | April 21, 2021

Makikipagtulungan ang Johnson & Johnson sa German scientist na si Andreas Greinacher upang mapag-aralan ang pagkakapareho ng nangyaring blood clot matapos maturukan ng first dose ng Janssen at AstraZeneca COVID-19 vaccines ang ilang indibidwal.

Ayon kay Greinacher sa ginanap na news conference nitong Martes, "We agreed today with J&J that we will work together… My biggest need, which I've expressed to the company, is I would like to get access to the vaccine, because the J&J vaccine is not available in Germany."

Dagdag pa niya, "Individuals are different, and only if by coincidence, nine or 10 weaknesses are coming together, then we have a problem. Otherwise, our in-built security systems block it, and keep us safe."

Iginiit naman ng Johnson & Johnson na puwede nang iturok ang Janssen COVID-19 vaccines sa Europe, matapos lumabas sa unang pag-aaral ng European Medicines Agency (EMA) na ‘very rare’ lamang ang naranasang pamumuo ng dugo ng ilang naturukan. Gayunman, pinayagan silang mag-aloka na may kasamang ‘safety warning’.

Samantala, iaanunsiyo sa Biyernes ng United States ang kanilang magiging desisyon hinggil sa Johnson & Johnson.

Sa ngayon ay mahigit 300 cases na ang iniulat na nakaranas ng blood clot mula sa iba’t ibang bansa matapos maturukan ng COVID-19 vaccines.

Ayon pa kay Data Analytics Head Peter Arlett ng EMA, tinatayang 287 indibidwal na ang nagka-blood clot sa AstraZeneca, 25 sa Pfizer, 5 sa Moderna at 8 sa Johnson & Johnson.

3 nabakunahan ng AstraZeneca sa Cotabato, patay

ni Mary Gutierrez Almirañez | April 15, 2021

Tatlong nabakunahan ng AstraZeneca kontra COVID-19 ang namatay umano sa Matalam, Cotabato ilang araw matapos silang maturukan ng unang dose nito. Gayunman, wala pang kumpirmasyon kung may koneksiyon ang bakuna sa pagkamatay nila, ayon kay Provincial Board Member Philbert Malaluan.

Paliwanag pa ng Integrated Provincial Health Office (IPHO) head na si Dr. Eva Rabaya, isa sa mga nasawi ay may hypertension at ang dalawa nama’y nagkaroon ng COVID-19. Posible rin aniya na walang kaugnayan ang bakuna sa pagkamatay ng mga ito.

“Only the DOH could conduct the causal analysis of their deaths, so, let’s just wait for the results,” giit pa ni Dr. Rabaya.

Kinilala ang mga namatay na sina Emily Salimbag, isang 51-anyos na healthcare worker at si Councilor Berlin Laroza, 58-anyos, kabilang ang isang kamag-anak nito.

Sa ngayon ay iniimbestigahan na ng Department of Health (DOH) Soccsksargen region ang pagkamatay ng tatlo.

Matatandaang 29 ang iniulat na nasawi sa Norway nang dahil sa blood clot matapos mabakunahan ng AstraZeneca.

Batay din sa inilabas na tala ng Centers for Disease Control and Prevention (CDC) sa Vaccine Adverse Event Reporting System (VAERS), tinatayang 472 ang namatay sa Moderna at ang 489 nama’y dahil sa Pfizer ilang araw matapos silang mabakunahan kontra COVID-19.