Sa 2021 ‘misencounter’.. 3 PDEA agents at 4 pulis, tinuluyan ng DOJ

ni Lolet Abania | May 19, 2022

Nakatakdang sampahan ng kaso ng Department of Justice (DOJ) ang tatlong tauhan ng Philippine Drug Enforcement Agency (PDEA) at apat na pulis hinggil sa naganap na “misencounter” sa Commonwealth Avenue, Quezon City noong 2021 na ikinasawi ng apat na indibidwal.

Ayon sa DOJ briefer, homicide charges ang isasampa laban sa mga PDEA agents habang direct assault charges sa mga tauhan ng Philippine National Police (PNP).

Matatandaan noong Pebrero 2021, nang magkasagupa ang mga operatiba ng PNP at PDEA sa harap ng isang fast-food chain sa Commonwealth Avenue, sa Quezon City, kung saan kapwa inihayag ng dalawang grupo na may ikinasa silang lehitimong anti-drug operation sa lugar.

Nagresulta ang “misencounter” sa pagkamatay ng dalawang pulis, isang PDEA agent at isang informant.

Nahaharap sa homicide charges sina PDEA agents Khee Maricar Rodas, Jelou Satiniaman, at Jeffrey Baguidudol dahil ito sa pagkasawi ni Police Corporal Eric Elvin Gerado.

“After evaluation of the evidence, the Panel of Prosecutors found sufficient evidence to charge respondents PDEA agents Rodas, Baguidudol, and Satiniaman for homicide,” batay sa DOJ briefer.

Gayundin, kasong direct assault ang kakaharapin nina Police Corporal Paul Christian Ganzeda, Police Corporal Honey Besas, Police Major Sandie Caparroso at Police Major Melvin Merida.

“With respect to the injuries sustained by PDEA responders, there is sufficient evidence identifying some police officers who actually hit, strike, and maul them,” nakasaad pa sa DOJ briefer. Ang reklamo ay isasampa sa Quezon City Regional Trial Court.

Nagkakahalagang P1.9-M... High-grade marijuana, nasabat ng Customs

ni Zel Fernandez | May 7, 2022

Nasabat ang may tinatayang P1.9 milyong halaga ng "kush" o high-grade marijuana mula sa isang Nigerian national, kasunod ng isinagawang controlled delivery operation ng anti-drug authorities sa Angeles City, Pampanga noong Huwebes nang hapon.

Batay sa report ng Philippine Drug Enforcement Agency-Central Luzon (PDEA-3), kahapon ng Biyernes ay tinukoy ang suspek na si Madu Ogechi Uzoma, residente ng Concubierta Street, Sunset Valley Mansions, Brgy. Cutcut sa Angeles, Pampanga.

Ang package na naglalaman ng iligal na droga ay sinasabing nagmula sa Greenwich, Connecticut, USA, at dumating sa Bureau of Customs-Port of Clark, nitong nakaraang Abril 29.

“The shipment was subjected to the K9 sweeping and physical examination which gave a positive indication of illicit drugs,” ayon sa PDEA.

Nakumpiska mula kay Madu ang tinatayang 1,500 gramo ng kush na mayroong street value na P1.95-M at isang driver's license.

Naging matagumpay ang operasyon sa pagkilos ng PDEA-Central Luzon, katuwang ang Bureau of Customs-Port of Clark at ang lokal na kapulisan.

Sasampahan naman ng kasong paglabag sa Section 4 (importation of dangerous drugs) ng Republic Act 9165 o Comprehensive Dangerous Drugs Act of 2002 ang Nigerian national.

22 operasyon kontra droga, matagumpay… 10 Million pabuya ng PDEA sa 14 informants

ni Zel Fernandez | April 19, 2022

Pinasinayaan ni Deputy Director General for Operations, Asec. Gregorio R. Pimentel ang pagkakaloob ng monetary rewards sa mga confidential informants sa ilalim ng programa ng PDEA Operation: “Private Eye” na pinamumunuan ni Director General Wilkins M. Villanueva, kaninang alas-10 ng umaga sa PDEA National Headquarters sa Quezon City.

“Today, over 10 million pesos in monetary rewards will be awarded. This, in recognition to the courage of ordinary citizens who have given crucial information leading to the arrest of illegal drug traffickers and the seizure of large volume of illegal drugs,” ani Asec. Pimentel.

Labing-apat na sibilyan ang pinagkalooban ng kabuuang ₱10,262,337.03 cash rewards matapos ang 22 matagumpay na operasyon ng PDEA kontra-droga sa nagdaang taong 2021.

Kabilang sa mga confidential informants na tumanggap ng pabuya ay kinilala sa mga alyas na ‘Myay’, ‘Salonga’, ‘Bonky’, ‘Dream’ at ‘Palanyag’ na pawang mga tumanggap ng monetary rewards na may katumbas o higit pa sa 500 milyong piso bawat isa.

Samantala, ang iba pang mga PDEA confidential informants na tumanggap ng pabuya na mababa sa halagang 500 milyong piso ay itinurn-over ang paggagawad sa kanilang mga PDEA Regional Offices upang mapanatili ang pagsunod sa mga health protocols at maiwasan ang physical crowding sa ginanap na seremonya.

Sa ilalim ng programang Operation: “Private Eye”, binibigyan ng pagkakataon ng Philippine Drug Enforcement Agency ang mga ordinaryong mamamayan na makibahagi sa pakikipaglaban ng kawani sa iligal na droga sa pamamagitan ng pakikipagtulungan sa mga law enforcement units na masawata ang mga illegal drug traffickers sa bansa.

Panghihikayat ni Asec. Pimentel, kahit sino ay maaaring makibahagi sa kanilang programa sa pamamagitan ng pakikipag-ugnayan sa ‘Isumbong Mo Kay Wilkins’ platform, pagtawag sa PDEA hotlines at pagpapadala ng email o liham sa kanyang opisina.

Gayundin, para umano sa mas ligtas na paraan ng pakikibahagi sa kanilang operasyon kontra-droga, maaari rin umanong mag-walk-in sa mga PDEA regional offices at mag-report sa mga intelligence officer. Tiniyak naman ng kalihim ang seguridad sa pagkakakilanlan at kaligtasan ng kanilang mga confidential informants.