4 arestado sa nasabat na P1.2-B halaga ng taklobo

ni Ronalyn Seminiano Reonico | April 18, 2021

Arestado ang apat na kalalakihan matapos masabat ng awtoridad ang tinatayang aabot sa 200 toneladang fossilized giant clam shells o “taklobo” sa Roxas, Palawan noong Biyernes.

Tinatayang aabot sa halagang P1.2 billion ang mga naturang taklobo na nakumpiska sa isinagawang joint law enforcement operations ng Coast Guard Intelligence Group Palawan, Coast Guard District Palawan, PCSD, PNP – Maritime Group Palawan, AFP Intelligence Operatives, at Bantay Dagat Roxas.

Ayon sa PCG, ang apat na suspek na inaresto sa Sitio Green Island, Barangay Tumarbong, Roxas, Palawan na kinilalang sina Rey Cuyos, 54; Rodolfo Rabesa, 48; Julius Molejoa, 47; at Erwin Miagao, 40, ay haharap sa kasong paglabag sa Republic Act No. 9147 o ang Wildlife Resources Conservation and Protection Act, at Republic Act No. 8850 o ang Philippine Fisheries Code.

Saad pa ng PCG, “They were brought to the Palawan Council for Sustainable Development (PCSD) for inquest proceedings and filing of appropriate cases.”

Biyahe pa-Visayas at Mindanao, suspendido dahil kay 'Bising'

ni Ronalyn Seminiano Reonico | April 16, 2021

Sinuspinde ng Department of Transportation (DOTr) ang biyahe papuntang Visayas at Mindanao ngayong Biyernes dahil sa banta ng Bagyong Bising.

Pahayag ng DOTr, “Due to the imminent threat of Severe Tropical Storm (STS) ‘Surigae’ (Bising), the DOTr suspends all land and sea travel, including those of fishing vessels, bound for Visayas and Mindanao via Matnog Port and all other ports in Region V starting 12 noon today, 16 April 2021.

“The DOTr advises trucking/logistics companies and buses not to proceed or postpone their planned trips in order to avoid long queues at Matnog, Sorsogon, to Daraga, Albay.”

Ayon din sa DOTr, ang naturang suspensiyon ay inihain ng Office of Civil Defense (OCD) Region V at inaprubahan ng National Disaster Risk Reduction and Management Council-Emergency Operations Center (NDRRMC-EOC).

Saad pa ng ahensiya, “Moreover, the DOTr orders its attached agencies in the Maritime and Road Sectors, namely the Philippine Coast Guard (PCG), the Land Transportation Office, (LTO), and the Land Transportation Franchising and Regulatory Board (LTFRB) to immediately enforce the said travel suspension.”

Kasunod nito ay naglabas din ang PCG ng maritime safety advisory kung saan pansamantala ring sinuspinde ang mga shipping operations sa Matnog Port sa Sorsogon papuntang Visayas at Mindanao simula ngayong araw, April 16 hanggang sa April 20 dahil sa Bagyong Bising.

Dagdag ng ahensiya, “According to Philippine Coast Guard (PCG) Spokesperson, Commodore Armando Balilo, all TRUCKING/LOGISTICS COMPANIES and BUSES are advised to POSTPONE THEIR TRIPS to avoid long queues at said port as a precautionary measure to control the spread of COVID-19 in the province.”

Samantala, sa weather bulletin ng PAGASA bandang alas-3 nang hapon, ang Bagyong Bising ay nasa 895 km Silangan ng Surigao City, Surigao del Norte.

Mayroon itong maximum sustained winds na 130 km/h malapit sa sentro ng bagyo at may bugso ng hangin na 160 km/h. Kumikilos ito pakanluran.

Makararanas ng maulap na panahon at kalat na pag-ulan at thunderstorm ang Eastern Visayas dahil sa Bagyong Bising.

Maulap na panahon din ang mararanasan sa iba pang bahagi ng Visayas, Palawan, at Occidental Mindoro.

P160 M giant clam shells, nakumpiska sa Palawan

ni Ronalyn Seminiano Reonico | March 5, 2021

Nakumpiska ng Philippine Coast Guard (PCG) ang 324 endangered giant clam shells na may bigat na 80 tons at tinatayang aabot sa halagang P160 million sa Roxas, Palawan.

Ayon sa PCG, isinagawa ang operasyon sa Barangay VI, Johnson Island noong March 3 sa tulong ng Palawan Council for Sustainable Development Staff (PCSDS), Marine Battalion Landing Team 3 (MBLT-3), at Bantay Dagat Roxas.

Nagpaalala rin ang ahensiya na ang pagkuha ng mga endangered giant clams o mas kilala sa tawag na "taklobo" ay ipinagbabawal sa ilalim ng Republic Act No. 10654 o The Philippine Fisheries Code of 1998.

Ang sinumang lumabag sa naturang batas ay maaaring humarap sa kasong administratibo at pagmultahin ng aabot sa halagang P3 million at pagkakakulong nang 8 taon, ayon sa PCG.

Bukod sa mga giant clam shells ay kinumpiska rin ng awtoridad ang nadiskubreng 124 piraso ng illegally cut mangrove trees sa naturang lugar.