Tropang 5G inagaw ang Game 1 sa Beermen

ni Anthony E. Servinio @Sports | January 22, 2026

Photo: Nagpumiglas na makalusot si June Mar Fajardo ng San Miguel Beermen para sa kanyang pag-iwas na maagaw ang bola sa depensa ng katunggaling si Kelly Williams ng Talk 'N Text Tropang 5G sa unang salpukan nila sa PBA Philippine Cup Championships Game 1 best-of-seven series na ginanap sa Ynares Center, Antipolo City. (Reymundo Nillama)

Laro ngayong Biyernes - Ynares Antipolo

7:30 PM SMB vs. TNT

Nagtrabaho hanggang huling minuto ang TNT Tropang 5G upang makuha ang Game One ng 2025-26 PBA Philippine Cup Finals laban sa defending champion San Miguel Beermen, 96-91, Miyerkules ng gabi sa Ynares Center Antipolo. Ang Game Two ay sa Biyenes sa parehong palaruan.

Naglabas agad ng mahigpit na depensa ang Tropa at kahit minsan ay hindi nakatikim ng lamang ang SMB. Umabot ng 46-27 ang agwat sa pangalawang quarter pero hindi madaling sumuko ang mga kampeon.

Naging isa na lang ang bentahe ng TNT, 78-77, sa dalawang shoot ni June Mar Fajardo. Sinagot ito ng walong sunod nina Calvin Oftana at Jordan Heading para makahinga, 86-77, pero patuloy ang banta.

Bumira ng four-points si Don Trollano at matapos ang dalawang buslo ni Jericho Cruz ay balik sa isa ang agwat, 91-92, at 20 segundo sa orasan. Biglang lumamig ang SMB at sinigurado ni Heading ang resulta sa apat na free throw.

Nanguna si Best Player Kelly Williams na may 15 puntos, siyam na rebound at siya rin ang bumantay kay JMF. Mas mataas ang kanyang numero na 23 at 19 rebound subalit mas mahalaga na napunta sa TNT ang mahalagang pambungad na tagumpay sa seryeng best-of-seven.

Sumuporta sina Oftana at Heading na may tig-13. Nagtala ng 22 si Moala Tautuaa habang 16 si CJay Perez.

Beermen siniguro na ang pagpasok sa finals, Gins binigo

ni Anthony E. Servinio @Sports | January 16, 2026

Photo: Hindi nagpasindak si Ginebra San Miguel point guard Rj Abarrientos bagkus harapan nitong tumirada ng pag basket sa harap ng depensa ni June Mar Fajardo ng San Miguel Beermen para semifinals game 6 best of seven series ng PBA Philippine Cup semifinals sa Araneta Coliseum. (REYMUNDO NILLAMA)

Laro ngayong Miyerkules - Ynares Antipolo

7:30 PM SMB vs. TNT

Nanigurado na ang defending champion San Miguel Beermen at dinurog ang Barangay Ginebra, 101-88, sa Araneta Coliseum kagabi upang makapasok sa 2025-26 PBA Philippine Cup Finals. Tinapos ng SMB ang semifinals seryeng best-of-seven, 4-2, at haharapin na ang TNT Tropang 5G simula Miyerkules sa Ynares Center Antipolo.

Unang quarter pa lang ay bumuhos ng 30 puntos si CJay Perez sa likod ng walang mintis sa kanyang 12 tira kasama ang tatlong tres at isang four-points. Mas marami ito sa buong Ginebra at nagsara ang quarter sa 39-25.

Lalong lumaki ang agwat sa pangalawang quarter, 59-41. Pinilit pa rin humugot mula sa diwa ng "Never Say Die" ang Gin Kings subalit masyadong malaki ang napuhunan ng SMB.

Bumagal ang puntos ni Best Player Perez subalit umakyat siya sa 41 sa 27 minuto lang sa sahig. Sumuporta si Don Trollano na may 23.

Nanguna sa Ginebra si Scottie Thompson na may 24, 12 sa unang quarter. Sumunod sina Norbert Torres na may 13, RJ Abarrientos na may 12 at Japeth Aguilar na may 10.

Samantala, tatanggapin simula ngayong taon ang Ramon Fernandez Trophy ng lahat na mapipiling PBA Finals MVP. Sa kanyang karera mula pagtatag ng liga noong 1975 hanggang 1994, naging bahagi si Fernandez ng hindi pa napapantayan na 19 kampeonato para sa Toyota, Tanduay at San Miguel.

Agad siyang nagbigay ng kanyang pasasalamat at basbas na gamitin ang kanyang pangalan. Walang Finals MVP si Fernandez dahil noong 1996 All-Filipino Conference lang unang iginawad ito kay Jojo Lastimosa ng Alaska.

Kinumpleto na ng Bolts ang semifinals, ready na vs. Tropang 5G

ni Anthony E. Servinio @Sports | December 29, 2025

Photo: Matinding pag-swak sa basket ang ginawa ni Rain or Shine Jhonard Clarito habang todo sa depensa si Cliff Hodge ng Meralco Bolts sa mainit na laro sa PBA 50th season Philippine Cup quarterfinals do or die match kagabi sa Araneta Coliseum. (Reymundo Nillama)

Laro ngayong Enero 4 - Araneta

5:15 PM Meralco vs. TNT

7:30 PM SMB vs. Ginebra

Binuo ng Meralco Bolts ang apat na magtatagisan sa semifinals ng 2025-26 PBA Philippine Cup matapos talunin muli ang paboritong Rain Or Shine Elasto Painters, 98-89, kagabi sa Araneta Coliseum.

Nag-aabang sa Bolts ang maagang nakapasok na TNT Tropang 5G sa seryeng best-of-seven ngayong Enero 4, 2026. Malaking tulong sa Bolts ang pangalawang quarter kung saan linimitahan nila ang ROS sa 11 puntos lang.

Dahil dito, nabura ang 26-20 bentahe ng E-Painters at lumamang ang Bolts sa halftime, 42-37, at matalinong inalagaan ito. Hinatid ni Chris Newsome ang pandiin na shoot, 90-82, papasok sa huling minuto. Humabolng tres si Adrian Nocum, 85-90, subalit iyan na kanilang huling hirit at kalmadong nagpasok ng mga free throw si Newsome upang mapreserba ang tagumpay.

Bumida si Newsome na may 31 puntos. Sumuporta si Chris Banchero na may 21 at CJ Cansino na may 14. Tinambakan ng Bolts ang E-Painters noong Sabado, 96-79, para ipilit ang knockout game. Tinalo ng TNT ang Meralco, 100-98, sa elimination round noong Oktubre 29.

Nabalutan ng emosyon ang laro at pormal na nag-retiro ang beteranong si Gabe Norwood. Nagsilbi ng 18 taon si Norwood sa ROS at Gilas Pilipinas. Nanguna sa ROS sina Nocum na may 29 at Gian Mamuyac na may 20. Nagtala si Norwood ng tatlo sa kanyang pagpapaalam.