Para maiwasan ang PAO vs. PAO.. Mga abogado, tutulong sa pagbuo ng IRR ng Free Legal Assistance Law

ni Madel Moratillo | May 12, 2023

Para maiwasan ang PAO vs. PAO scenario sa hinaharap dahil sa Proposed Code of Professional Responsibility and Accountability, dapat umanong umaksyon na ang Korte Suprema.

Ito ang panawagan ng Public Attorney's Office sa pangunguna ng kanilang hepe na si Atty. Persida Rueda-Acosta sa gitna ng nakatakdang implementasyon ng nasabing code, kung saan kinukwestyon nila ang isang probisyon nito.

Sa isang pulong balitaan, sinabi ni Acosta na kung tutuusin, wala na sanang problema dahil matagal na itong nasolusyunan ng Kongreso.

Ayon kay Acosta, noong 2007 ay ipinasa ng Kongreso at inaprubahan ni noon ay Pangulong Gloria Macapagal-Arroyo ang Free Legal Assistance Act.

Ito aniya ang sasagot sa mga conflict cases at maiiwasan ang PAO vs. PAO scenario sa mga korte.

Nitong nakaraang taon, 2022, naglabas aniya ng Implementing Rules and Regulations ang Bureau of Internal Revenue at Department of Finance para bigyan ng 10 percent rebate deduction ang mga pribadong abogado na hahawak ng kaso na may conflict interest at hindi mahawakan ng PAO.

Apela naman ni Dr. Erwin Erfe ng PAO, dapat maglabas din ng IRR ang Korte Suprema kaugnay ng Free Legal Assistance Law.

Pangako naman ni Acosta, buong pwersa ng PAO ay handang tumulong para sa pagbuo ng IRR at masolusyunan ang isyu sa conflict of interest cases.

Sa pamamagitan naman nito ay maiiwasan din aniya na manganib naman ang buhay ng public attorneys dahil sa paghawak maging ng katunggaling kaso sa halip na ipagtanggol ang naunang kliyente.

Hirit sa Korte Suprema — Atty. Acosta.. PAO vs. PAO, ibasura

ni Madel Moratillo | May 10, 2023

Hiniling ng Public Attorney's Office sa Korte Suprema na maglabas ng Implementing Rules and Regulations kaugnay ng Republic Act 9999 o ang Free Legal Assistance Act.

Sa isang liham na pirmado sa pangunguna ni PAO Chief Persida Rueda-Acosta at iba pang abogado ng PAO at naka-address kay Chief Justice Alexander Gesmundo, nakasaad na hiniling nila na maalis ang Section 22 ng Proposed Code of Professional Responsibility and Accountability, kung saan nakapaloob ang probisyon na maaaring magresulta ng banggaan ng mga abogado ng PAO. “be DELETED/REMOVED, so that public attorneys will be governed by the remaining provisions on conflict of interest applicable to all members of the legal profession, without discrimination and qualification;” bahagi ng liham ng PAO.

Hiniling din nila na masuspinde ang bagong implementasyon ng Section 22 “indefinitely” habang pinag-aaralan ito ng Supreme Court en banc.

Dahil sa kawalan ng IRR, naniniwala rin ang PAO na hindi pa pwedeng ipatupad ang RA 9999.

Una rito, naglabas ng manifesto ang PAO lawyers laban sa nasabing bahagi ng Proposed Code of Professional Responsibility and Accountability.

Giit nila, kontra ito sa nakasaad sa ilalim ng Republic Act 9406 o PAO Law.

Ang paglalagay umano ng 2 Public Attorneys sa isang sala ay taliwas sa diwa ng batas na nais maiwasan ang moonlighting.

Nagtatrabaho umano sila bilang iisa at may iisa lang silang mission at vission at hindi nila ito hahayaang masira.

Nabatid na 2019 sinimulan ang programa na ito, at ngayong taon, nasa 900 milyong piso ang inilaang pondo.

Hirit ng PAO at OSG sa SC.. Pagbasura sa kaso vs. 2 dentista na tumanggi sa HIV patient, repasuhin

ni Madel Moratillo | April 27, 2023

Hiniling ng Public Attorney’s Office at Office of the Solicitor General sa Korte Suprema na repasuhin ang pagkakabasura sa kasong kriminal laban sa 2 dentista na tumangging bigyan ng serbisyo ang isang HIV patient.

Una rito, pinagtibay ng Court of Appeals ang desisyon ng Taguig City regional trial court na nag-grant sa petition for demurrer to evidence na inihain nina Dr. Sarah Jane Mugar at Dr. Mylene Igrubay.

Ito ay kaugnay ng reklamong isinampa ni Henry Se dahil sa paglabag sa Republic Act 8504 o ang Acquired Immune Deficiency Syndrome (AIDS) Prevention and Control Act of 1998 laban sa dalawa.

Nakasaad sa petisyon na bumisita umano si Se sa Enhanced Dental Clinic sa Taguig City noong Pebrero 16, 2017 para magpakonsulta dahil sa masakit na ngipin.

Pero matapos niyang sabihin na sumasailalim siya sa medical treatment para sa HIV, pinayuhan umano siya ni Mugar na kumuha muna ng clearance mula sa kanyang doktor.

Matapos makakuha ng clearance ay nagpapa-schedule na sana umano siya para sa pagpapabunot ng ngipin subalit na-reject umano siya sa kadahilanang wala umanong UV type desterilization equipment ang nasabing clinic.

Ang sabi sa kanya, batay na rin umano ito sa instruction ng may-ari na si Igrubay.

Sa petisyon, sinabi ng OSG na ang provision and standard pagdating sa oral health care services ng mga pasyente ay dapat na patas anuman ang kondisyon nito.

Sa kanilang panig, iginiit naman ng PAO na dapat igiit dito ang RA 8504.

Giit ng PAO, kahit may batas sa anti-discrimination sa bansa, malibang kilalanin at ipatupad ito ng estado ay hindi matitigil ang diskriminasyon.

Ayon sa OSG, nagkaroon ng grave abuse of discretion ang CA nang sabihin nitong bigo ang prosekusyon na mapatunayang guilty beyond reasonable doubt ang dalawa.

Ayon kasi sa CA, ang pagtanggi ng EDC ay dahil sa kawalan ng kinakailangang desterilization equipment pero ayon sa OSG na-establish naman na ang nasabing klinika ay may first class materials, sterilized dental instruments, at disposable dental supplies'.

Ayon pa sa PAO, dapat ay ini-refer umano ang pasyente sa ibang klinika kung wala sila ng nasabing equipment.