Ayuda sa 4Ps, ipinasa sa konsumo sa kuryente

ni Mylene Alfonso @News | April 30, 2026

Photo: Sen. Bam Aquino / FB

Iginiit ni Senador Bam Aquino na dapat pondohan sa pamamagitan ng national budget ang mga subsidiya at iba pang diskwento sa kuryente upang maisulong ang mas mataas na antas ng transparency at sustainability, nang hindi nagpapataw ng dagdag na pasanin sa mga hindi nakatatanggap nito, partikular na ang mga low- at middle-income households.

Ito ang ikinatuwiran ni Aquino sa kanyang Senate Resolution No. 375, na humihiling sa Committee on Energy na imbestigahan ang disenyo, pagtukoy ng mga benepisyaryo, at pagpopondo ng mga subsidiya, partikular ang lifeline rate na itinatadhana sa ilalim ng Republic Act No. 9136 (Electric Power Industry Reform Act).

“Busisiin natin ang karagdagang bayad na ito. Marami nang naghihirap na Pilipino at middle class. Hindi na dapat dagdagan ang gastusin ng taumbayan kung may pera naman ang gobyerno para sa ayuda,” wika ni Aquino.

“Mahalagang malaman natin ang sistema ng pangongolekta at hindi ito napapasan ng mga kapwa naghihirap na kababayan natin sa middle class,” diin pa niya.

Dapat aniyang suriin ang iba pang alternatibong mekanismo sa pagpopondo, kabilang ang paggamit ng pambansang badyet upang mapondohan ang bahagi o kabuuan nito, nang sa gayon ay maisulong ang transparency, pananagutan, at pagpapanatili sa pagpapatupad ng mga hakbang para sa social protection.

Batay sa pagtaya, maaaring magdagdag ang mga singil na may kaugnayan sa subsidiya ng ilang sentimo kada kilowatt-hour (kWh) o humigit-kumulang P20 hanggang P100 kada buwan sa mga bayarin sa kuryente ng mga hindi benepisyaryo, depende sa antas ng konsumo.

Nagpapanggap na staff... Babala ng DSWD: Mag-ingat sa mga pekeng nag-aalok ng 4Ps!

ni Zel Fernandez | May 3, 2022

Pinag-iingat ng Department of Social Welfare and Development (DSWD) ang publiko sa mga nagpapakilala umanong DSWD personnel upang makapag-recruit sa Pantawid Pamilyang Pilipino Program (4Ps).

Batay sa report na natanggap ng ahensiya, may ilan katao umano na nakasuot ng pulang DSWD vest ang nag-iikot at pinapangakuan ang ilang mga indibidwal na mapapabilang ang mga ito sa ongoing recruitment ng naturang programa ng pamahalaan.

Kaugnay nito, ang modus umano ng mga nagpapakilalang DSWD staff ay kukunin ang personal na impormasyon at cash card account numbers ng mga biktima.

Paglilinaw ng DSWD, wala umanong ongoing registration para sa karagdagang 4Ps beneficiaries ang ahensiya at tanging mga maralitang kasambahayan na kasalukuyan nang nasa listahan ng kanilang database ang mga kuwalipikadong 4Ps beneficiaries.

Gayundin, wala rin anilang ipinakalat na mga tauhan ang DSWD para mangolekta ng mga cash card accounts dahil ito ay itinuturing na confidential information ng mga benepisyaryo.

Giit ng ahensiya, maging mapagmatyag ang publiko sa mga scammers at modus-operandi na may kinalaman sa mga pinansiyal na suportang ipinagkakaloob ng pamahalaan.

Para sa miyembro ng 4Ps… “No bakuna, no ayuda” policy — DILG

ni Jasmin Joy Evangelista | November 6, 2021

Pinag-iisipan ngayon ng gobyerno na magpatupad ng "no bakuna, no ayuda" policy sa mga ‘di bakunadong benepisyaryo ng Pantawid Pamilyang Pilipino Program (4Ps).

Ayon kay Department of the Interior and Local Government Undersecretary Epimaco Densing III, hindi nagkulang ang gobyerno sa panghihikayat at pagpapaliwanag ng kahalagahan ng pagbabakuna.

"Napag-usapan na dun sa 4Ps pinag-uusapan natin mga 6 -7 milyong kababayan natin. Kung hindi sila magpapabakuna hindi natin ire-release sa kanila 'yung kanilang ayuda under the 4Ps. Maghihigpit na tayo," ani Densing.

Sakaling hindi ito umubra ay may ibang paraan pang naiisip ang DILG.

“Ang isang tinitingnan natin ay baka pwedeng amiyendahan 'yung batas 'yung RA 11525, 'yun yung batas sa vaccination program natin na palitan ang isang provision dun na hindi na voluntary ang pagbabakuna kundi mandatory na po," ani Densing.

Kaugnay nito, pinag-iisipan din daw ng DILG na panagutin ang mga lokal na opisyal sa mga rehiyon na mabagal ang pagbabakuna.