Kahulugan ng pinasabog ng artista ang bahay ng kamag-anak

ni Estrellia de Luna - @Panaginip gabay ng buhay | June 02., 2021

Analisahin natin ang panaginip na ipinadala ni Govinda ng Divisoria.

Dear Maestra,

Magandang araw sa inyong lahat! Sa panahong ito ng pandemya, ang tanging libangan ko ay manood sa YouTube ng mga paborito kong artista. Dahil d’yan, hanggang sa aking pagtulog ay napapanaginipan ko sila.

Ano ang ibig sabihin ng panaginip ko na si Luis Manzano ay gustong sunugin o pasabugin yung bahay ng kamag-anak ko? Nu’ng unang araw, gusto niyang pasabugin, tapos sabi ko, “Tara, labas na tayo.” Nakaalis kami, pero pagbalik ko kinabukasan, nagtagumpay siyang pasabugin kaya sabi ko, “May sakit na sa isip si Luis!”

Ang isa ay napanaginipan ko si Cristy Fermin na napakaaktibo, tumatakbo nagtatampisaw sa tubig at niyayaya akong maligo.

Naghihintay,

Govinda

Sa iyo, Govinda,

Magandang araw sa iyo at sa mga mahal mo sa buhay. Mabuti naman at may libangan ka sa panahong ito ng pandemya.

Ang iyong panaginip ay nagpapahiwatig na dapat kang mag-ingat sa pagpapasya o pagdedesisyon sa mga pinaplano mo sa buhay. May babala ang panaginip mo na kapag nagkamali ka ng desisyon, biglang guguho ang pangarap mo at kapahamakan ang idudulot nito sa buhay mo. Dahil d’yan, ang maipapayo ko sa iyo ay huwag kang pabigla-bigla sa pagpapasya. Hinay-hinay lang. Mag-isip ka muna ng pitong ulit bago magpasya sa mga plano mo. Hingin mo rin ang patnubay ng Holy Spirit at magdasal nang taimtim.

Kung ano ang unang pumasok sa isip mo, ‘yun ang sundin mo at huwag kang magpabago-bago ng isip. Nagpapahiwatig din ang panaginip mo na kapag tama ang iyong pagpapasya sa pinaplano mong gawin, may posibilidad na bigla kang yumaman. Mahahango ka na sa hirap at magkakamit ng kasaganaan sa darating na mga araw. Hanggang dito na lang, nawa’y makamit mo ang tagumpay sa tatahakin mong landas ng buhay.

Matapat na sumasaiyo,

Maestra Estrellia de Luna

Kahulugan ng nagdasal at natulog matapos magbasa ng pocket book

ni Estrellia de Luna - @Panaginip gabay ng buhay | June 01, 2021

Analisahin natin ang panaginip na ipinadala ni Josie ng Pandacan, Manila.

Dear Maestra,

Napakaganda ng column n’yo sa BULGAR. Isa ako sa napakarami n’yong tagasubaybay. Dalaga pa ako at nangangarap na magpakasal sa tinatangi kong minamahal sa kasalukuyan. Ipinagdarasal kong mawala na ang COVID-19 pandemic upang matuloy na kasal namin ng boyfriend ko.

Masarap basahin ang kahulugan ng mga panaginip na ipinaaanalisa sa inyo, kaya gusto ko ring malaman ang kahulugan ng aking panaginip. Napanaginipan ko na ako ay nagbabasa ng pocket book. Ganadong-ganado ako sa pagbabasa dahil love story ito at halos nangyari na ‘yun sa sarili kong buhay. Pagkatapos kong magbasa, nagdasal ako at natulog na. Ano ang ibig sabihin nito?

Naghihintay,

Josie

Sa iyo, Josie,

Napakaganda ng ibig sabihin ng panaginip mo dahil ito ay nangangahulugan na malapit ka nang ikasal sa kasintahan mo ngayon. Gayundin, liligaya ka sa piling niya at bubuhos ang mga biyaya sa inyo. Pagpapalain ang pagsasama n’yo at bibiyayaan kayo ng matatalino at malulusog na anak.

Masuwerte ka, Josie, dahil isa ka sa mga pinagpapala at kinalulugdan ng Diyos dahil sa malinis mong kalooban. Hindi ka mapagkunwari at may positibong pananaw sa buhay, at dahil sa kalinisan ng puso mo, may gantimpalang inilalaan sa iyo ang Diyos. Pagpapalain ka na Niya, bibigyan ng masaganang buhay sa piling ng iyong magiging kabiyak hanggang sa huling sandali ng iyong buhay.

Samantala, ipagpatuloy mo ang mabubuting gawa at pagmamahal sa kapwa upang lalo ka pang sumagana at pagpalain. Higit sa lahat, huwag mong kalimutan ang iyong pamilya at ipagpatuloy din ang pagtawag sa Diyos na makapangyarihan sa lahat. Pasalamatan mo Siya sa mga biyayang iyong natatanggap. Ugaliin mong magdasal sa gabi bago matulog kasama ang iyong pamilya.

Matapat na sumasaiyo,

Maestra Estrellia de Luna

Nahulog ang kotse sa kanal at nadumihang damit, pahiwatig na masisira ang reputasyon

ni Estrellia de Luna - @Panaginip gabay ng buhay | May 27, 2021

Analisahin natin ang panaginip na ipinadala ni Yolly ng Samar.

Dear Maestra,

Kumusta kayo? Nawa’y nasa maayos kayong kalagayan gayundin ang mga mahal n’yo sa buhay. Isa akong negosyante pero ngayon ay walang kita dahil sa pandemya. Gusto kong isangguni sa inyo ang aking panaginip.

Napanaginipan kong nahulog ang sinasakyan kong kotse sa malalim na kanal. Nakaligtas ako at nakaahon, tapos ang dumi-dumi ng damit ko at puro putik ang aking buong katawan. Ano ang ipinahihiwatig ng panaginip ko?

Naghihintay,

Yolly

Sa iyo, Yolly,

Ang panaginip mo ay may kaugnayan sa reputasyon mo sa inyong lugar. Nagbabadya ito na maaaring masira ang magandang pagkakakilala sa iyo ng mga kapitbahay mo dahil na rin sa sarili mong kapabayaan.

Mag-ingat ka lang sa araw-araw mong pakikisalamuha sa kapwa. Piliin mo ang mga kaibigan na iyong pagkakatiwalaan. Gayundin, mag-ingat ka sa pagpapalakad ng iyong negosyo. Kung sa kasalukuyan ay mahina ang kita nito, ang panaginip mo ay nagpapahiwatig na balak mong mag-iba na ng negosyo. Gamitin mo ang iyong talino sa pagpapalit ng negosyo. Huwag kang sugod nang sugod kung wala namang karanasan sa bagong negosyong gusto mong pasukan. Magtanong-tanong ka muna at um-attend ng seminar.

Matapat na sumasaiyo,

Maestra Estrellia de Luna