Paulit-ulit binasa ang libro, sign na super-saya ng married life

ni Estrellia de Luna - @Panaginip gabay ng buhay | July 10, 2021

Analisahin natin ang panaginip na ipinadala ni David ng Zambales.

Dear Maestra,

Isa akong manunulat ng maikling kuwento, sanaysay at mga tula. Nagbabalak na akong magpakasal sa darating na buwan. Gayundin, mahilig akong magbasa ng iba’t ibang klase ng libro at halos punumpuno na ng mga libro ang bookshelves ko.

Madalas akong managinip ng mga libro. Napanaginipan ko kagabi na maghapon akong nagbasa ng libro. Kahit gutom na ako ay hindi ako tumigil sa pagbabasa.

Noong isang gabi naman, napanaginipan ko na may nagbigay sa akin ng libro. Tuwang-tuwa ako dahil love story ang nilalaman ng librong naturan. Pansamantala kong inilagay sa shelve ‘yung libro at kahit nabasa ko na ay paulit-ulit ko pa ring binabasa araw-araw. Napakaganda kasi ng love story ng librong ‘yun kaya hindi nakakasawang basahin. Ano ang ipinahihiwatig ng panaginip ko?

Naghihintay,

David

Sa iyo, David,

Ang ibig sabihin ng nagbabasa ka ng libro ay kikilalanin ka sa lipunang iyong ginagalawan. Makatatanggap ka ng karangalan at magiging sikat ka, saan ka man pumunta.

Ang panaginip na may nagbigay sa iyo ng libro ay nagpapahiwatig na ikakasal ka sa lalong madaling panahon, kung saan magiging masaya, payapa at panatag ang pag-aasawa mo.

Samantala, isang maaliwalas na bukas, punumpuno ng pagpapala at mga biyaya ang naghihintay sa inyo ng magiging asawa mo. ‘Yan naman ang ipinahihiwatig ng inilagay mo sa shelve ang naturang libro at paulit-ulit mo pa ring binabasa. Hanggang dito na lang. Binabati kita ng mapagpala, mabiyaya at maligayang araw ng kasal sa piling ng iyong napupusuan.

Matapat na sumasaiyo,

Maestra Estrellia de Luna

Kahulugan ng magandang bundok, malinis na lawa at ulap

ni Estrellia de Luna - @Panaginip gabay ng buhay | July 08, 2021

Analisahin natin ang panaginip na ipinadala ni Lerma ng Makati City.

Dear Maestra,

Nanaginip ako ng maganda, malaki at perpektong shape ng bundok. Bundok daw ‘yun ng Ama. Tapos sa kabilang panig, may lawa na parang salamin ang tubig. Pagsilip ko, bigla akong nalaglag at lumangoy ako para makaahon, tapos bumalik ako sa harap ng bundok. Para siyang buhay na bundok at may kaunting ulap sa paligid. Ngayon lang ako nanaginip ng ganu’n at parang totoong nangyari. Ano ang ipinahihiwatig nito?

Naghihintay,

Lerma

Sa iyo, Lerma,

Ang bundok sa panaginip mo ay nagpapahiwatig na dadaan ka pa sa mga hirap at pagsusumikap para mapasaiyo ang grasyang minimithi mo. ‘Yung lawa na parang salamin ang tubig ay nangangahulugan na may kaibigan ka pa rin na tapat sa iyo, sila ay mabait at nagmamalasakit sa kapakanan mo.

Ang sabi mo ay nalaglag ka at lumangoy para makaahon. Nagbababala ‘yan na may gulo pa rin na maaaring maganap sa darating na mga araw, anumang gulo ito, magtatagumpay ka sa dakong huli. Maaaring mawala sa iyo ang karapatan sa ipinaglalaban mo, pero huwag kang mag-alala dahil magtatagumpay ka sa ipinaglalaban mo. Nagpapahiwatig din ang panaginip mo na posibleng mawalan ka ng ari-arian.

‘Yung kaunting ulap sa paligid ng bundok ay nangangahulugan ng hindi pagkakaunawaan, ngunit ito ay panandalian lamang.

Samantala, ang bundok ng Ama na tinutukoy mo sa panaginip ay mismong Diyos Ama sa langit na patuloy na sumusubaybay sa iyo. Hindi ka Niya pababayaan. Makakaahon ka sa mga pasanin sa buhay. Lagi mong isaisip na sa kabila ng madilim na ulap, naghihintay ang liwanag.

Matapat na sumasaiyo,

Maestra Estrellia de Luna

Sobrang lungkot, kabaligtaran ang mangyayari sa totoong buhay

ni Estrellia de Luna - @Panaginip gabay ng buhay | July 06, 2021

Analisahin natin ang panaginip na ipinadala ni Ivy ng Laguna.

Dear Maestra,

Isa akong kasambahay at maayos naman ang kalagayan ko rito sa aking amo. Ang isasangguni ko sa inyo ay ang kaibigan ko na buntis ngayon. Napanaginipan niya raw na nakita niya ang kanyang sarili sa salamin. Malungkot na malungkot siya, tapos pati ang mga kasama niya sa bahay ay malungkot din lahat. Sobra siyang nag-aalala dahil sa panaginip niya. Ano ang ibig sabihin nito?

Naghihintay,

Ivy

Sa iyo, Ivy,

Una sa lahat, natutuwa ako sa iyo dahil may malasakit ka sa kaibigan mo. Bihira ang ganyan, ang iba kasi r’yan ay sarili lamang ang iniintindi. Walang pakialam sa iba at kung mayroon man ay walang ginawa kundi makipagtsismisan sa buhay ng may buhay.

Ang ibig sabihin ng panaginip ng kaibigan mo ay kabaligtaran. Magiging masaya siya sa mga darating na araw dahil magiging maayos ang kanyang panganganak. Dahil dito, matutuwa ang buong pamilya at magkakaroon ng kaunting selebrasyon.

Nagpapahiwatig din ito na isa sa pamilya niya ay susuwertehin. Maaaring ma-promote sa trabaho o kaya naman ay kumita ng malaki sa negosyo. Sabihin mo sa kaibigan mo na huwag siyang mag-alala sa kanyang panaginip dahil maganda naman ang ipinahihiwatig nito. Ingatan niya ang sarili sa kanyang pagbubuntis dahil kaligayahan ang hatid ng batang nasa sinapupunan niya.

Hanggang dito na lang. Salamat sa pagkonsulta mo sa akin. Mag-ingat ka palagi at pagpalain ka nawa ng Dakilang Lumikha.

Matapat na sumasaiyo,

Maestra Estrellia de Luna