Sign na yayayaing magbakasyon at pahiwatig ng masayang kasalan

ni Estrellia de Luna - @Panaginip gabay ng buhay | July 17, 2021

Analisahin natin ang panaginip na ipinadala ni Gloria ng Antipolo.

Dear Maestra,

Single ako at mahilig akong mag-alaga ng mga ibon dahil ito ang libangan ko. Nasisiyahan ako at nawawala ang lungkot ko ‘pag nakikita ko ang alaga kong mga ibon.

Gusto kong ipaanalisa sa inyo ang panaginip ko. Napanaginipan ko na maaga akong gumising upang mag-jogging at salubungin ang sikat ng araw. Nagulat ako dahil pagtingin ko sa langit ay may eclipse. Pinagmasdan ko ‘yun nang mabuti at maya-maya ay umuwi na ako. Pag-uwi ko, naisip kong tingnan muna ang alaga kong mga ibon at natuwa ako dahil nangitlog na ang mga alaga ko. Tuwang-tuwa ako nang makita ko ang kanilang pugad na punumpuno ng mga itlog. Ano ang ibig sabihin ng panaginip ko?

Naghihintay,

Gloria

Sa iyo, Gloria,

Ang ibig sabihin ng panaginip mo na may nakita kang eclipse habang ikaw ay nagja-jogging ay may mga kaibigan ka from opposite sex na nagbabalak mag-out of town kasama ka. Gusto nilang magbakasyon sa isang maganda at malayong lugar kung saan kukumbinsihin ka nila na sumama upang mag-enjoy kayo at pansamantalang makalimutan ang mga kalungkutan sa buhay.

Habang ang mga itlog sa panaginip mo ay nagpapahiwatig ng masayang kasalan na mararanasan mo sa takdang panahon. Susuwertehin ka sa pag-aasawa at kahit ikaw ay matanda na, magiging maligaya ka pa rin sa piling ng iyong napiling pakasalan.

Matapat na sumasaiyo,

Maestra Estrellia de Luna

Nagsusuklay sa harap ng salamin, babala ‘di na labs ng dyowa

ni Estrellia de Luna - @Panaginip gabay ng buhay | July 15, 2021

Analisahin natin ang panaginip na ipinadala ni Dodong ng Taguig.

Dear Maestra,

Hangang-hanga ako sa pag-aanalisa n’yo ng mga panaginip at sa pagbibigay n’yo ng payo sa bandang huli dahil marami akong natututunan. May napupusuan na akong babae at balak ko nang pakasalan siya. Binabalak ko ring magtayo ng maliit na negosyo. Ibig kong malaman ang kahulugan ng aking mga panaginip.

Una ay napanaginipan kong nasa harap ako ng salamin at nagsusuklay. Napakagulo ng buhok ko at kulay gray ito, tapos last Friday, napanaginipan ko na may hawak akong martilyo at pilit kong pinupukpok ‘yung malaking pako sa pader. Ano ang ipinahihiwatig ng mga panaginip ko?

Naghihintay,

Dodong

Sa iyo, Dodong,

Ang ibig sabihin ng nagsusuklay ka ay babala na ang kasintahan mo ay hindi tapat sa iyo o may iba siyang minamahal kung saan palaging siya ang nasa isip niya sa halip na ikaw.

‘Yun namang kulay gray ang buhok mo ay nangangahulugan na daranas ka ng kabiguan at panghihinaan ng loob sa mga problemang kinakaharap mo sa buhay.

Habang ang panaginip na magulo ang buhok mo ay nagpapahiwatig na mapapaaway ka dahil sa sobrang kadaldalan o pagsasalita ng mga bagay na hindi nagugustuhan ng kausap mo. Dahil dito, maghinay-hinay ka sa pagsasalita. Iwasan mong makipagdebate sa mga kausap mo upang hindi ka mapaaway.

Samantala, ang huling panaginip mo tungkol sa martilyo ay nagpapahiwatig na uunlad ang binabalak mong negosyo, subalit makararanas ka muna ng matitinding problema sa umpisa. Gayunman, mabilis mong magagawan ng paraan at malulunasan ang anumang problema na kakaharapin mo.

Hanggang dito na lang. Ipinatag mo ang iyong kalooban. Huwag mong masyadong dibdibin ang mga problema.

Matapat na sumasaiyo,

Maestra Estrellia de Luna

Nagka-COVID ang pamilya at naghirap, kabaligtaran ang mangyayari sa tunay na buhay

ni Estrellia de Luna - @Panaginip gabay ng buhay | July 12, 2021

Analisahin natin ang panaginip na ipinadala ni Joyjoy ng Pangasinan.

Dear Maestra,

Matagal na akong tagasubaybay ng column n’yo. Kuntento na akong abangan kung may kapareho sa mga nabasa ko sa column n’yo ang panaginip ko at nagkataon na may kamukha nga pero hindi eksakto, kaya naisip kong ako na mismo ang magpaanalisa ng panaginip ko.

Napanaginipan ko na nabiktima kaming lahat ng COVID-19, kaming mag-asawa pati na rin ang dalawa naming anak. Ang tulong ng gobyerno ay hindi sapat para sa aming lahat at halos wala na kaming panggastos at pantustos sa gamot. Naubos na rin ang kabuhayan namin kaya nagkandahirap-hirap kami.

Nagdasal ako nang taimtim habang umiiyak at nagmakaawa sa Diyos na iligtas kaming mag-anak sa napakasakit na sinapit namin. Humagulgol ako nang humagulgol hanggang bigla akong nagising na tuyong-tuyo ang lalamunan at halos hindi makahinga. Ano ang ibig sabihin ng panaginip ko?

Naghihintay,

Joyjoy

Sa iyo, Joyjoy,

Huwag kang mabahala sa panaginip mo dahil kabaligtaran ang kahulugan nito. Hindi paghihirap ang mararanasan mo sa darating na mga araw, sa halip, may matatanggap kang pera mula sa malayong lugar. Maaaring sa kamag-anak mo na naninirahan sa abroad kung saan tatama sa lottery ang kamag-anak mo at isa ka sa babalatuhan niya.

Ang sabi mo ay nagdasal ka ng taimtim sa Diyos, ito ay nagpapahiwatig ng kaligayahan sa piling ng iyong mahal sa buhay at kalusugan ng katawan.

‘Yun namang umiiyak ka habang nagdarasal at humagulgol ka nang humagulgol ay nangangahulugang may kaligayahang naghihintay sa iyo sa susunod na mga araw. Matatapos na ang mga pagtitiis at pagdurusa mo. Malalagpasan mo ang matinding pagsubok na dumating sa buhay mo sa panahong ito ng pandemya. Gayundin, susuwertehin at pagpapalain ka na dahil may hindi inaasahang grasya na darating. Dahil d’yan, bilang pasasalamat sa Diyos, magse-celebrate ka kasama ng mga pinagkakatiwalaan mong kaibigan.

Matapat na sumasaiyo,

Maestra Estrellia de Luna