Iba’t ibang kahulugan ng sinulid

ni Estrellia de Luna - @Panaginip gabay ng buhay | July 24, 2021

Analisahin natin ang panaginip na ipinadala ni Dexter ng Zamboanga.

Dear Maestra,

Isang mapagpala at mabiyayang araw sa inyo. Tagahanga at tagasubaybay ako ng inyong column tungkol sa panaginip. Gusto kong malaman ang kahulugan ng panaginip ko noong nakaraang araw. Isa akong mananahi ng mga wedding gown. Maganda naman ang kinikita ko sa pananahi, kaya lang, nang nagkaroon ng pandemic ay humina ang kita ko.

Napanaginipan ko na maraming sinulid na idineliver sa bahay ko. Nagulat ako dahil hindi naman ako umo-order ng sinulid kahit kanino. Gayunman, tinanggap ko ‘yung mga sinulid at inayos ko sa lalagyan. Habang inaayos ko, nagkabuhol-buhol ang mga ito. Pinilit kong alisin ang mga nabuhol na sinulid, pero nabigo ako, kaya pinutol ko na lang ito gamit ang gunting hanggang mawala ang buhol. Ano ang ibig sabihin nito?

Naghihintay,

Dexter

Sa iyo, Dexter,

Maraming salamat sa pagsangguni mo sa akin ng iyong panaginip. Labis akong nasisiyahan dahil humahanga ka sa pagbibigay-kahulugan ko sa mga panaginip na isinasangguni sa akin.

Ang ibig sabihin ng panaginip mo tungkol sa sinulid ay maging maingat ka at mapagmatyag. Idadamay ka ng mga kaibigan mo sa isang gulo na wala ka namang kaalam-alam sa ugat ng mga pangyayari. Gayundin, hindi magiging maganda ang kahihinatnan nito. Masasadlak ka sa kapahamakan kahit wala ka namang kinalaman sa naturang gulo.

Ang sabi mo ay nagkabuhol-buhol ‘yung sinulid, ito ay nagpapahiwatig na mawawalan ka ng pera sa darating na mga araw dahil may magtatangkang magnakaw sa pera mo. Magkakaproblema ka rin sa relasyon mo sa iyong mga mahal sa buhay, ‘yan naman ang ibig sabihin ng pinutol mo ang sinulid para matanggal sa pagkakabuhol.

Matapat na sumasaiyo,

Maestra Estrellia de Luna

Magaganda at mabangong bulaklak, pahiwatig na matutupad ang mga pangarap

ni Estrellia de Luna - @Panaginip gabay ng buhay | July 23, 2021

Analisahin natin ang panaginip na ipinadala ni Tiffany ng Bulacan.

Dear Maestra,

Isa akong Gen Z, in short, teenager na ako, pero medyo isip bata pa rin. Gusto kong malaman ang kahulugan ng panaginip ko.

Napanaginipan kong nakatayo ako sa gitna ng napakaganda, makapigil hininga at malawak na garden. Parang paraiso ito sa ganda, maraming bulaklak sa paligid at ambango-bango ng mga ito. May mga bata na nag-aawitan at parang mga anghel ang boses nila, tapos nakatanaw sila sa akin at tuwang-tuwa naman ako. Pakiramdam ko, ako ang prinsesa ng mga bulaklak sa hardin na ‘yun. Buong pagmamalaki kong ipinakilala ang aking sarili sa mga batang umaawit. Sabi ko, “I’m the Flower Princess of this garden of paradise,” tapos umawit ako nang paulit-ulit ng “I am the Flower Princess”. Ang saya-saya ko habang umaawit, ano ang ibig sabihin ng panaginip ko?

Naghihintay,

Tiffany

Sa iyo, Tiffany,

Ang panaginip mo na ikaw ay nakatayo sa garden at masayang umaawit ay nagpapahiwatig na maraming ideya ang nasa iyong isip na makakapagpaligaya sa mga taong nakapaligid sa iyo, lalo na sa pamilya at mga kaibigan mo. Kapag ito ay naisakatuparan mo na, magdudulot ito ng ibayong kaligayahan sa puso mo. Magkakamit ka rin ng mga biyaya at pagpapala kung saan hahangaan at kikilalanin ka sa lugar ninyo. Pararangalan ka rin sa mga nagawa mo tungo sa pag-unlad ng inyong lugar.

Habang ang mga batang nag-aawitan na parang anghel ay nangangahulugan na maliligtas ka sa anumang panganib o kapahamakan.

Ang mga bulaklak sa panaginip mo ay nagpapahiwatig na makakamit mo ang lahat ng iyong minimithi sa buhay at ikaw din ay magkakaroon ng magandang kalusugan ng pangangatawan at maging sa puso at isipan. Susuwertehin ka rin sa pag-ibig dahil parating na ang prince charming na pinapangarap mo.

Matapat na sumasaiyo,

Maestra Estrellia de Luna

Naging beach ang bahay at malinaw ang tubig, sign ng pag-unlad at kasaganaan

ni Estrellia de Luna - @Panaginip gabay ng buhay | July 22, 2021

Analisahin natin ang panagininip na ipinadala ni Joyjoy ng Masbate.

Dear Maestra,

Magandang araw sa inyong lahat d’yan. Ako ay 35-anyos, may apat na anak na dalawang babae at dalawang lalaki. Naisipan kong mag-online business kahit maliit lang ang puhunan. Ang mister ko naman ay kasasakay lang sa barko at nakatira kami ngayon sa isang subdivision kasama ng mama ko.

Napanaginipan ko na naging beach ‘yung bahay namin. Nag-swimming kami ng aking mga anak kasama ang mama ko. Malinaw ang tubig at habang kami ay nagkakatuwaang maligo, biglang tumayo ang mama ko at dala-dala niya ang maraming tubig sa pamamagitan ng kanyang mga kamay. Nalukuban siya ng tubig na para bang may taglay siyang kapangyarihan na kaya niyang kontrolin ang agos ng tubig at puwede niya itong patuyuin o paagusin nang walang tigil.

Nagulat kami ng aking mga anak. Ang sabi ko sa bunso, gayahin niya si mama, may powers na at nagising na ako. Ano ang ibig sabihin ng panaginip ko?

Naghihintay,

Joyjoy

Sa iyo, Joyjoy,

Nakakatuwa naman ang panaginip mo. Salamat sa pagtitiwala mo sa aking kakayahan na mag-interpret ng dream.

Mabuti naman at malinaw ang tubig sa panaginip mo dahil ito ay nangangahulugan ng kasaganaan at pag-unlad ng kabuhayan sa pamamagitan ng gabay at patnubay ng iyong ina. Nagpapahiwatig din ng maayos na pagsasamahan, pagmamahalan at pagmamalasakitan sa inyong tahanan.

Gayundin, ang sabi mo, ang loob ng bahay ninyo ay naging beach. Ang bahay ay nangangahulugan ng tagumpay sa negosyo. Kaya anuman ang ipinuhunan mo sa negosyo, mabilis mo itong mababawi at tuloy-tuloy na ang pagyaman mo.

‘Yun namang nagkaroon ng powers ang mama mo kung saan may kakayahan siyang patuyuin at paagusin ang tubig at lumukob din kamo sa buong katawan niya ang tubig, ang ibig sabihin nito ay buhos-buhos na biyaya ang parating sa kanya kahit hindi siya kumilos. Susuwertehin siya at parang agos ng tubig ang grasyang mahahawakan niya. At siyempre, dahil kasama mo siya sa bahay, damay na rin kayo ng mga anak mo sa suwerte niya.

Matapat na sumasaiyo,

Maestra Estrellia de Luna