Batis, sariwa at berdeng damo, sign ng suwerte sa negosyo at love life

ni Estrellia de Luna - @Panaginip gabay ng buhay | August 07, 2021

Analisahin natin ang panaginip na ipinadala ni Edward ng Batangas.

Dear Maestra,

Araw-araw akong nagbabasa ng BULGAR dahil tagasubaybay ako ng column ninyo. Binabati ko kayo sa napaka-informative and very interesting na pag-aanalisa ninyo ng mga panaginip. Single pa ako at may kaunting negosyo na pinagkakakitaan sa pang-araw-araw kong pamumuhay. May napupusuan na akong babae at balak ko na siyang pakasalan. Gusto kong ipaanalisa sa inyo ang panaginip ko.

Napanaginipan ko na may nadaanan akong batis, maganda ang mga berdeng damo sa paligid nito, sariwang-sariwa at parang basa pa ng hamog. Ang linis-linis din ng tubig at may mga tupa sa paligid, tapos sarap na sarap sa pag-inom ng tubig ang mga tupa. Ano ang ibig sabihin ng panaginip ko?

Naghihintay,

Edward

Sa iyo, Edward,

Maraming salamat sa pagsubaybay mo sa aking kolum at palaging pagbili ng BULGAR.

Ang ibig sabihin ng panaginip mo na may nadaanan kang batis na malinaw ang tubig, may berde at sariwang damo sa paligid ay tagumpay sa negosyo, karangalan at masayang pamumuhay. Susuwertehin ka rin sa love life mo, lalo na kung may balak ka nang magpakasal dahil magiging masaya ang pag-aasawa mo. Bibiyayaan kayo ng mga anak na matatalino, malusog at magbibigay ng karangalan sa inyong pamilya.

Ang mga tupa naman sa panaginip mo ay nagpapahiwatig na makapag-aasawa ka ng isang magandang babae, siya ay bata pa, mapang-akit at kahali-halina, pero walang kaalam-alam sa mga gawaing bahay. Malambing din siya at mapagmahal.

Hanggang dito na lang, hangad ko ang kaligayahan mo sa buhay. Nawa’y magkatotoo ang kahulugan ng panaginip na ipinadala mo sa akin.

Matapat na sumasaiyo,

Maestra Estrellia de Luna

Kahulugan ng bumagsak habang paakyat ng hagdan

ni Estrellia de Luna - @Panaginip gabay ng buhay | August 05, 2021

Analisahin natin ang panaginip na ipinadala ni Ben ng Makati City.

Dear Maestra,

Isa ako sa masugit na tagasubaybay ng iyong kolum. Negosyante ako at maraming tao ang nakikilala ko sa aking pagnenegosyo ng iba’t ibang produkto.

Napanaginipan ko na umaakyat ako sa mataas na hagdan. Pagdating sa kalagitnaan, nahilo ako at bumagsak. Ano ang ibig sabihin nito?

Naghihintay,

Ben

Sa iyo, Ben,

Natutuwa ako at isa ka sa mga tagasubaybay ng column ko.

Ang panaginip mo na umaakyat ka ng hagdan ay nagpapahiwatig na maganda ang tingin sa iyo ng mga tao. Isa ka sa tinitingala sa lipunang iyong ginagalawan dahil isa ka sa itinuturing nilang pinakamayaman sa lugar ninyo.

Gayunman, sabi mo ay nahilo ka habang umaakyat sa hagdan, ito ay nagsasabing mahihirapan kang i-adjust ang sarili mo sa mga papuri at pagtitiwala ng mga tao sa iyong paligid dahil masyadong mataas ang tingin nila sa iyo. Sa totoo lang, hindi naman ganu’n kayaman ang kalagayan mo gaya ng iniisip nila. Dahil d’yan, mas gugustuhin mo pa na simpleng buhay lang. Mas panatag ang iyong isipan dahil simple lang din ang mga suliranin at kayang-kaya mo itong lutasin.

Ang bumagsak ka habang umaakyat sa hagdan, nangangahulugan ito ng pagkabigo sa kasalukuyan mong mga pangarap sa buhay. Huwag kang masyadong malungkot kung hindi mo makamit agad ang iyong mga pangarap dahil hindi ‘yan nakukuha nang apurahan. Hinay-hinay lang, ‘ika nga, slowly but surely.

Sumaiyo nawa ang mga pagpapala ng Dakilang Lumikha. Mag-ingat palagi.

Matapat na sumasaiyo,

Maestra Estrellia de Luna

Kahulugan ng super-tagal dumating ng BF at nagtatawanang mga kapitbahay

ni Estrellia de Luna - @Panaginip gabay ng buhay | August 04, 2021

Analisahin natin ang panaginip na ipinadala ni Perlita ng Batangas City.

Dear Maestra,

Binabati ko kayo ng isang mapagpalang araw at ligtas sa anumang uri ng kapahamakan. Gusto kong malaman ang kahulugan ng panaginip ko nu’ng last Monday. Napanaginipan ko na hinihintay kong dumating ‘yung boyfriend ko, ang tagal ko nang naghihintay pero wala pa rin siya. Nang dumating siya, sobrang late na sa napag-usapan naming oras.

Tapos, biglang nagtawanan nang malakas ang mga kapitbahay namin at nakatingin sila sa amin ng boyfriend ko. Nagtataka ako kung bakit sila nagtawanan. Ano ang ipinahihiwtig ng panaginip ko?

Naghihintay,

Perlita

Sa iyo, Perlita,

Maraming salamat sa pagsangguni mo sa akin tungkol sa kahulugan ng iyong panaginip. Ang ibig sabihin ng sobrang late na ang boyfriend mo nang dumating, siya ay palaisip, matalino, tahimik ngunit malalim ang pagkatao. Hindi siya malambing at kulang din sa pagiging thoughtful. Habang ang nagtatawanan ang mga kapitbahay mo na parang kayong dalawa ang pinagtatawanan, ito ay nagpapahiwatig ng pagkabigo sa gusto mong makamit sa buhay. Kung in love ka sa boyfriend mo, nagbababala ang panaginip mo na mag-ingat ka sa mga ikinikilos mo dahil may posibilidad na magkatampuhan kayo ng iyong karelasyon at mauwi sa pakikipagbreak niya sa iyo.

Kalimitan, ang ibig sabihin ng tawanan sa panaginip ay luha at kalungkutan. Kabaligtaran ang ipinahihiwatig nito sa totoong buhay.

Matapat na sumasaiyo,

Maestra Estrellia de Luna