Sign na makakapag-asawa ng mayamang babae

ni Estrellia de Luna @Panaginip gabay ng buhay | November 6, 2023

Analisahin natin ang panaginip na ipinadala ni Benjo ng Zambales.

Dear Maestra,

Magandang buhay sa inyo r’yan sa Bulgar, matagal n’yo na akong tagahanga at ako ay isang millennial.

Napanaginipan ko na may magandang alagang peacock ang aming kapitbahay. Sumayaw ito sa ilalim ng puno ng peras habang pinapakita ang kanyang mga pakpak.

Natuwa ako sa panonood sa peacock, nang may biglang nagpaputok ng baril, mabuti na lang ay hindi ito natamaan.

Ano ang ibig sabihin ng panaginip ko?

Naghihintay,

Benjo

Sa iyo, Benjo,

Ang panaginip mo na ang ganda ng peacock na alaga ng kapitbahay n’yo, natuwa kang panoorin ito habang pinapakita ang kanyang pakpak, ito ay pahiwatig ng kapanatagan sa kasalukuyan mong kalagayan. Magiging panatag, payapa, sagana ang kalagayan mo ngayon.

Ang sabi mo ay millennial ka palang, ito ay tanda na makakatagpo ka ng isang babaeng magpapatibok sa puso mo. Siya ay nabibilang sa mataas na angkan, may posibilidad na siya na rin ang iyong mapangasawa, at tiyak na magiging masaya ang kasal n’yo.

Samantala, ang nagsasayaw ang peacock sa ilalim ng puno ng peras ay nangangahulugang mapo-promote ka sa trabaho at susuwertehin ka rin sa binabalak mong negosyo. Ito rin ay nangangahulugan ng kaligayahan sa pag-aasawa dulot ng tunay at wagas na pag-ibig.

Ang may nagpaputok ng baril pero sa kabutihang palad, hindi tinamaan ang peacock ay tanda ng kaligayahan at kasaganahan sa piling ng iyong magiging asawa’t anak na magbibigay sa iyo ng karangalan at kaligayahan.

Matapat na sumasaiyo,

Maestra Estrellia de Luna

Kahulugan ng nakipaglamay sa yumaong mahal sa buhay

ni Estrellia de Luna @Panaginip gabay ng buhay | November 5, 2023

Analisahin natin ang panaginip na ipinadala ni Violeta ng Batangas

Dear Maestra,

Napanaginipan ko na nakipaglamay kami ng nanay ko sa kamag-anak naming yumao.

Napag-usapan namin ang mga nagawa niyang kabutihan. Sobra kong nalungkot nang marinig ko ang mga awiting pinatugtog habang pinagluluksa namin ang namayapang mahal sa buhay.

Ano ang ibig sabihin ng panaginip ko?

Naghihintay,

Violeta

Sa iyo, Violeta,

Ang nakipaglamay kayo ng nanay mo sa kaanak n’yong namatay ay nangangahulugang makakamit mo na ang magagandang bagay na pinapangarap mo. Hindi magtatagal ay yayaman, sasagana at magiging maligaya ka na sa darating na mga araw.

Ang nagkuwentuhan kayo ng nanay mo sa mga bagay na nagawa niya sa inyo, ay nagpapahiwatig na may matatanggap kang nakakagulat na balita. Hindi mo sukat akalaing giginhawa ka, at matatapos na ang mga paghihirap mo.

Samantala, ang sobrang lungkot mo, lalo na nu’ng marinig mo ang awiting pinapatugtog habang pinagluluksa n’yo ang inyong namayapang kaanak, ay senyales na liligaya ka sa iyong pag-aasawa. Ikakasal ka na sa boyfriend mo at magsasama na kayo kasama ang inyong magiging mga anak.

Matapat na sumasaiyo,

Maestra Estrellia de Luna

Kahulugan ng sementeryo at may nakitang kalansay

ni Estrellia de Luna @Panaginip gabay ng buhay | November 4, 2023

Analisahin natin ang panaginip na ipinadala ni Betong ng Nueva Ecija.

Dear Maestra,

Napanaginipan ko na nagpunta ako sa sementeryo, naglakad ako dahil malapit lang sa bahay namin ang pantiyon, nang may nadaanan akong mga buto at bungo ng tao.

Inabot na ako ng dilim sa sementeryo, at gabi na rin ako nakauwi ako.

Ano’ng ibig sabihin ng panaginip ko?

Naghihintay,

Betong

Sa iyo, Betong,

Ang ibig sabihin ng panaginip mo na nagpunta ka sa sementeryo, naglakad ka ay dapat ka nang lumipat ng ibang kumpanya dahil may lihim kang kaaway sa pinapasukan mo ngayon. May binabalak siyang hindi maganda laban sa iyo.

Ang may nadaanan kang buto at bungo ng tao ay nangangahulugang may mamanahin kang malaking halaga mula sa mahal mo sa buhay.

Ang inabot ka na ng dilim sa sementeryo ay nagpapahiwatig na kailangan mo ang tulong ng iyong matalik kaibigan. Puwede mo siyang lapitan sa problemang kinakaharap mo ngayon.

Samantala, ang gabi ka na nakauwi ay paalala na hindi mo agad makakamit ang inaasam-asam mong tagumpay. Mayroon pang mga hadlang bago mo maisakatuparan ang iyong mga binabalak.

Matapat na sumasaiyo,

Maestra Estrellia de Luna